ನಟ ಪವರ್‌ಸ್ಟಾರ್‌ ಪುನೀತ್‌ ರಾಜಕುಮಾರ್‌ ಚಿತ್ರರಂಗಕ್ಕೆ ಬರುವ ಅನೇಕ ಪ್ರತಿಭಾವಂತರಿಗೆ ಪ್ರೇರಣೆ. ಪುನೀತ್‌ ಅಗಲಿ ವರ್ಷ ಕಳೆದರೂ, ಅವರ ನೆನಪಿನ “ಅಪ್ಪು’ಗೆಯಲ್ಲಿ ಚಿತ್ರರಂಗಕ್ಕೆ ಬರುತ್ತಿರುವವರ ಸಂಖ್ಯೆ ಲೆಕ್ಕಕ್ಕೆ ಸಿಲುಕದ್ದು. ಪುನೀತ್‌ ರಾಜಕುಮಾರ್‌ ಅವರಿಂದ ಪ್ರೇರಣೆ ಪಡೆದುಕೊಂಡ ಇಂಥದ್ದೇ ಒಂದು ತಂಡ ಈಗ ಅವರ ನೆನಪಿನಲ್ಲಿಯೇ ಒಂದು ಸಿನಿಮಾವನ್ನು ತೆರೆಗೆ ತರುವ ಯೋಜನೆ ಹಾಕಿಕೊಂಡಿದೆ. ಈಗಾಗಲೇ ಸಾರಿಗೆ, ರಿಯಲ್‌ ಎಸ್ಟೇಟ್‌ ಮೊದಲಾದ ಉದ್ಯಮಗಳಲ್ಲಿ ಗುರುತಿಸಿ ಕೊಂಡಿರುವ, ಪುನೀತ್‌ ರಾಜಕುಮಾರ್‌ ಅವರ ಅಪ್ಪಟ ಅಭಿಮಾನಿಯೂ ಆಗಿರುವ ಮಹಿ ಶಿವ ಶಂಕರ್‌ ಇಂಥದ್ದೊಂದು ಪ್ರಯತ್ನಕ್ಕೆ ಕೈ ಹಾಕಿದ್ದಾರೆ.
ಇದರ ಮೊದಲ ಭಾಗವಾಗಿ ಪುನೀತ್‌ ರಾಜಕುಮಾರ್‌ ಜನ್ಮದಿನದ ಸಂದರ್ಭದಲ್ಲಿ “ಅಪ್ಪು ಕಥಾ ಗಾನ’ ಎಂಬ ವಿಡಿಯೋ ಹಾಡನ್ನು ಚಿತ್ರತಂಡ ಬಿಡುಗಡೆಗೊಳಿಸಿದೆ. ನಿರ್ಮಾಪಕ ಮಹಿ ಶಿವಶಂಕರ್‌ ನಿರ್ಮಿಸಿ, ಅಭಿನಯಿಸಿರುವ ಈ ವಿಡಿಯೋ ಹಾಡಿಗೆ ಚರಣ್‌ ಅರ್ಜುನ್‌ ಸಂಗೀತ ಸಂಯೋಜನೆ ಮಾಡಿದ್ದಾರೆ.
ಇದೇ ವೇಳೆ ಮಾತನಾಡಿದ ನಟ ಕಂ ನಿರ್ಮಾಪಕ ಮಹಿ ಶಿವಶಂಕರ್‌, “ನಾನು ಮೊದಲಿನಿಂದಲೂ ಪುನೀತ್‌ ರಾಜಕುಮಾರ್‌ ಅವರ ಅಪ್ಪಟ ಅಭಿಮಾನಿ. ಅವರೊಂದಿಗೆ ಸಿನಿಮಾ ಮಾಡಬೇಕೆಂಬ ಕನಸು ನನಸಾಗಲಿಲ್ಲ. ಹಾಗಾಗಿ ಅವರ ನಿಧನದ ನಂತರ ಅವರ ಬಗ್ಗೆಯೇ ಸಿನಿಮಾ ಮಾಡೋಣ ಎಂಬ ನಿರ್ಧಾರಕ್ಕೆ ಬಂದೆವು. ಪುನೀತ್‌ ರಾಜಕುಮಾರ್‌ ಅವರನ್ನು ಹೃದಯದಲ್ಲಿ ಆರಾಧಿಸುವ ಅಭಿಮಾನಿಯೊಬ್ಬನ ಕಥೆ ಈ ಸಿನಿಮಾದಲ್ಲಿದೆ. ಪುನೀತ್‌ ಅಗಲಿಕೆಯ ನೋವು ಆತನ ಮೇಲೆ ಹೇಗೆಲ್ಲ ಪರಿಣಾಮ ಬೀರುತ್ತದೆ ಎಂಬುದು ಈ ಸಿನಿಮಾದ ಕಥೆಯ ಒಂದು ಎಳೆ. ಸದ್ಯ ಈ ಸಿನಿಮಾದ ಕೆಲಸ ಶುರುವಾಗಿದ್ದು, ಪುನೀತ್‌ ಅವರ ಮೇಲಿನ ಹಾಡನ್ನೇ ಮೊದಲು ಚಿತ್ರೀಕರಿಸಲಾಗಿದೆ. ಪುನೀತ್‌ ಅವರ ಜನ್ಮದಿನದ ಅಂಗವಾಗಿ ಸಿನಿಮಾದಲ್ಲಿ ಬರುವ ಈ ಹಾಡನ್ನು ಮೊದಲು ಬಿಡುಗಡೆ ಮಾಡುತ್ತಿದ್ದೇವೆ’ ಎಂದು ಮಾಹಿತಿ ನೀಡಿದರು.
ಚಿತ್ರದ ಬಗ್ಗೆ ಮಾತನಾಡಿದ ನಿರ್ದೇಶಕ ಸೋಹನ್‌ ಅಭಿರಾಮ್‌, “ಈ ಸಿನಿಮಾಕ್ಕೆ “ಅಪ್ಪು’ ಎಂದು ಟೈಟಲ್‌ ಇಡಬೇಕೆಂದು ನಿರ್ಧರಿಸಿ, ಟೈಟಲ್‌ ನೀಡುವಂತೆ ವಾಣಿಜ್ಯ ಮಂಡಳಿಗೆ ಮನವಿ ಮಾಡಿದ್ದೇವೆ. ಈ ಟೈಟಲ್‌ ಸಿಕ್ಕರೆ, ಅದೇ ಹೆಸರಿನಲ್ಲಿ ಸಿನಿಮಾ ಮಾಡುತ್ತೇವೆ’ ಎಂದು ವಿವರಣೆ ನೀಡಿದರು.
