ಬೆಳೆಗಳಿಗೆ ಜಿಂಕೆಗಳ ಹಾವಳಿ ತಪ್ಪಿಸಲು ಜಿಲ್ಲಾಧಿಕಾರಿಗೆ ಮನವಿ

ರಾಯಚೂರು: ತಾಲೂಕಿನ ಮನ್ಸಲಾಪುರ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಬೆಳೆಗಳಿಗೆ ಜಿಂಕೆಗಳ ಹಾವಳಿ ಮಿತಿ ಮೀರುತ್ತಿದ್ದು, ಬೆಳೆಯೆಲ್ಲ ಹಾಳಾಗುತ್ತಿದೆ. ಕೂಡಲೇ ಅರಣ್ಯ ಇಲಾಖೆ ಅಧಿಕಾರಿಗಳು ಸೂಕ್ತ ಕ್ರಮ ವಹಿಸಬೇಕು ಎಂದು ಒತ್ತಾಯಿಸಿ ಗ್ರಾಮಸ್ಥರು ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿದರು.

ನಿತ್ಯ ಬೆಳಗ್ಗೆ, ಸಂಜೆ ಜಮೀನುಗಳಿಗೆ ಲಗ್ಗೆ ಇಡುತ್ತಿರುವ ಜಿಂಕೆಗಳ ಹಿಂಡುಗಳು ಈಗ ತಾನೆ ಮೊಳಕೆ ಬಂದಿರುವ ಬೆಳೆಯನ್ನೆಲ್ಲ ತಿಂದು, ತುಳಿದಾಡಿ ಹಾಳು ಮಾಡುತ್ತಿವೆ. ಇದರಿಂದ ರೈತರಿಗೆ ಲಕ್ಷಾಂತರ ರೂ. ನಷ್ಟವಾಗುತ್ತಿದೆ. ಮನ್ಸಲಾಪುರ, ಕುಕನೂರು, ಮರ್ಚೇಡ್‌, ಏಗನೂರು, ಚಿಕ್ಕಸೂಗೂರು, ಹೊಸಪೇಟೆ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಈ ಸಮಸ್ಯೆ ಎದುರಾಗಿದೆ. ತೊಗರಿ, ಹತ್ತಿ ಸೇರಿ ಇನ್ನಿತರ ಬೆಳೆಗಳನ್ನು ಲಕ್ಷಾಂತರ ರೂ. ಸಾಲ ಮಾಡಿ ಬೆಳೆಯಲಾಗಿದೆ. ಬೀಜ ಮೊಳಕೆ ಹೊಡೆದಿದ್ದು, ಮಳೆಗೆ ಚನ್ನಾಗಿ ಬರುತ್ತಿದೆ. ಪ್ರತಿ ಎಕರೆಗೆ 50 ರಿಂದ 80 ಸಾವಿರ ಖರ್ಚು ಮಾಡಿದ್ದು, ಜಿಂಕೆಗಳು ಬೆಳೆಯೆಲ್ಲ ಹಾಳು ಮಾಡುತ್ತಿವೆ. ಹಗಲಿರುವಳು ಜಿಂಕೆಗಳನ್ನು ಕಾಯುವುದೇ ಕಾಯಕವಾದಂತಾಗಿದೆ ಎಂದು ದೂರಿದರು.

ಅರಣ್ಯ ಇಲಾಖೆ ಹಾಗೂ ಜಿಲ್ಲಾಡಳಿತ ಈ ಬಗ್ಗೆ ಸೂಕ್ತ ಕ್ರಮ ವಹಿಸಬೇಕು. ಜಿಂಕೆಗಳ ಹಾವಳಿ ತಪ್ಪಿಸಿ ರೈತರ ಬೆಳೆಗಳನ್ನು ರಕ್ಷಿಸಬೇಕು ಎಂದು ಒತ್ತಾಯಿಸಿದರು.

ಮನ್ನಲಾಪುರ ಗ್ರಾಮಸ್ಥರಾದ ಮಲ್ಲಿಕಾರ್ಜುನ ಗೌಡ, ಮಲ್ಲಪ್ಪಗೌಡ, ಸಿದ್ದಯ್ಯ ಸ್ವಾಮಿ, ಶಶಿಧರ ಗೌಡ, ಲಿಂಗಯ್ಯ ದಿಡ್ಡಿ, ಶಂಕರಪ್ಪ ಗೌಡ, ಶರಣಪ್ಪ, ವೆಂಕಟೇಶ, ಮೂಕಪ್ಪ, ಸಾಜೀದ್‌, ಮಲ್ಲಯ್ಯ, ನಾಗಪ್ಪ, ಬೀಸಪ್ಪ, ಪಾಗುಂಟಪ್ಪ, ರಾಘವೇಂದ್ರ, ತಿಪ್ಪಣ್ಣ, ವೆಂಕ ಟರೆಡ್ಡಿ, ತಿಮ್ಮಪ್ಪ ಸೇರಿದಂತೆ ಅನೇಕರು ಇದ್ದರು.