ತಾಪಂ-ಗ್ರಾಪಂ ಅಧಿಕಾರಿಗಳ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿ ಮನವಿ

ಯಾದಗಿರಿ: ಜಿಲ್ಲೆಯ ಸುರಪುರ ತಾಲೂಕು ಪಂಚಾಯತ್‌ ಕಾರ್ಯನಿರ್ವಾಹಕ ಅಧಿಕಾರಿಗಳು ಮತ್ತು 42 ಗ್ರಾಮ ಪಂಚಾಯತಿಯ ಅಭಿವೃದ್ಧಿ ಅಧಿಕಾರಿ ಹಾಗೂ
ಹಗರಣದಲ್ಲಿ ಶಾಮೀಲಾದ ಜೆಇಗಳ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳದಿರುವುದನ್ನು ಖಂಡಿಸಿ ದಸಂಸ ಜಿಲ್ಲಾ ಸಂಚಾಲಕ ಶಿವಪುತ್ರ ಜವಳಿ ನೇತೃತ್ವದಲ್ಲಿ ಸಮಿತಿ ಕಾರ್ಯಕರ್ತರು ಪ್ರತಿಭಟಿಸಿದರು.

ಜಿಪಂ ಕಾರ್ಯಾಲಯ ಎದುರು ಗುರುವಾರ ಸೇರಿದ ಕಾರ್ಯಕರ್ತರು, ಭ್ರಷ್ಟ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿದರು. ಈ ಸಂದರ್ಭದಲ್ಲಿ ಮನವಿ ಸಲ್ಲಿಸಿದ ಮುಖಂಡರು, ಪ್ರಮುಖ ಬೇಡಿಕೆಯಾದ ತಾಲೂಕಿನ 42 ಗ್ರಾಮ ಪಂಚಾಯತ್‌ ಅಭಿವೃದ್ಧಿ ಅಧಿಕಾರಿಗಳನ್ನು ಸೇವೆಯಿಂದ ಅಮಾನತುಗೊಳಿಸಿ ದಕ್ಷ ಹಾಗೂ ಪ್ರಾಮಾಣಿಕ ಅಧಿಕಾರಿಗಳನ್ನು ನೇಮಿಸುವುದು, 42 ಗ್ರಾಮ ಪಂಚಾಯಿತಿಗೆ ಸಂಬಂಧಿಸಿದ ಗುತ್ತಿಗೆದಾರರ ಪರವಾನಗಿಯನ್ನು ಕಪ್ಪುಪಟ್ಟಿಗೆ ಸೇರಿಸುವುದು ಹಾಗೂ 14ನೇ ಹಣಕಾಸು ಯೋಜನೆಗೆ ಸಂಬಂಧಿಸಿದ ದುರ್ಬಳಕೆಯಾದ ಅನುದಾನವನ್ನು ಇಲಾಖೆವಾರು ತನಿಖೆ ಕೈಗೊಂಡು ಸಂಬಂಧಿಸಿದ ಅಧಿಕಾರಿಗಳ ಮೇಲೆ ಕ್ರಿಮಿನಲ್‌ ಪ್ರಕರಣ ದಾಖಲಿಸುವುದು ಸೇರಿದಂತೆ ಹಲವು ಬೇಡಿಕೆಗಳನ್ನು ಈಡೇರಿಸಲು ಆಗ್ರಹಿಸಿದರು.

ಜಿಲ್ಲಾ ಸಹ ಸಂಚಾಲಕ ಚಂದಪ್ಪ ಮುನಿಯಪ್ಪನವರ, ಶಿವಲಿಂಗ ಎಂ, ಶಿವಕುಮಾರ ತಳವಾರ್‌, ಹನುಮಂತಪ್ಪ, ಬಾಲರಾಜು ಖಾನಾಪುರ್‌, ಮಲ್ಲಿಕಾರ್ಜುನ್‌ ಹುರಸಗುಂಡಗಿ, ಮಲ್ಲಪ್ಪ ಪೂಜಾರಿ, ಶೇಖರ್‌ ಬಡಿಗೇರ, ಆಕಾಶ ಕಟ್ಟಿಮನಿ, ವೆಂಕಟೇಶ ದೇವಪುರ, ಖಾಜಾ ಅಜ್ಮಿರ್‌, ಚೆನ್ನಪ್ಪ ದೇವಪುರ,
ರಮೇಶ ಬಾಚಿಮಟ್ಟಿ, ಯಲ್ಲಾಲಿಂಗ ಹೊಸಮನಿ, ಸಾಬಣ್ಣ ಸದಬ, ಚಂದ್ರಶೇಖರ ಬಲಶೆಟ್ಟಿ ಹಾಳ, ಚೌಡಪ್ಪ ಯಡಹಳ್ಳಿ, ಎಲ್ಲಪ್ಪ ಗುಂಡಲಗೇರಿ, ಗೋಪಾಲ ಕಾಮನಟಗಿ, ಎಂ.ಪಟೇಲ್‌, ನಾಗರಾಜ ಹುರುಸಗುಂಡಗಿ, ಸುಭಾಷ, ಭೀಮರಾಯ ವಡಿಗೇರಾ ಇದ್ದರು.