ಲೋಕಲ್‌ ರೈಲುಗಳಲ್ಲಿ ಜನ ದಟ್ಟಣೆ ನಿಯಂತ್ರಣಕ್ಕೆ ಆ್ಯಪ್‌, ಕಲರ್‌ ಕೋಡಿಂಗ್‌:  ಸರಕಾರ ಚಿಂತನೆ

ಮುಂಬಯಿ: ಚಾಲ್ತಿಯಲ್ಲಿರುವ ಕೋವಿಡ್‌-19 ಪ್ರಕೋಪದ ಮಧ್ಯೆ ಮುಂಬಯಿ ಮತ್ತು ನೆರೆಯ ಜನನಿಬಿಡ ಮುಂಬಯಿ ಮಹಾನಗರ ಪ್ರದೇಶದಲ್ಲಿ (ಎಂಎಂಆರ್‌) ಶೀಘ್ರ ಮೂರು ನಿರ್ದಿಷ್ಟ ಸಮಯದ ಸ್ಲಾಟ್‌ಗಳಲ್ಲಿ ಎಲ್ಲ ಪ್ರಯಾಣಿಕರಿಗೆ ಉಪನಗರ ಲೋಕಲ್‌ ರೈಲು ಸೇವೆಗಳನ್ನು ಉಪಲಬ್ಧಗೊಳಿಸುವ ಯೋಚನೆಯಲ್ಲಿರುವ ಮಹಾರಾಷ್ಟ್ರ ಸರಕಾರವು ರೈಲುಗಳಲ್ಲಿ ಜನದಟ್ಟಣೆ ತಡೆಯಲು ತಂತ್ರಜ್ಞಾನವನ್ನು ಬಳಸಲು ಚಿಂತನೆ ನಡೆಸಿದೆ. ಎರಡು ದಿನಗಳ ಹಿಂದೆ ರಾಜ್ಯ ಸರಕಾರವು ಪಶ್ಚಿಮ ಮತ್ತು ಮಧ್ಯ ರೈಲ್ವೇಗೆ ಬರೆದ ಪತ್ರದಲ್ಲಿ ಮಾನ್ಯ ಟಿಕೆಟ್‌ ಹೊಂದಿರುವ ಯಾವುದೇ ವ್ಯಕ್ತಿಗೆ ಬೆಳಗ್ಗೆ 7.30 ರವರೆಗೆ, ಬೆಳಗ್ಗೆ 11 ರಿಂದ ಸಂಜೆ 4 ರವರೆಗೆ ಮತ್ತು ರಾತ್ರಿ 8ರಿಂದ ಸೇವೆಗಳ ಅಂತ್ಯದವರೆಗೆ ಪೀಕ್‌ ಅವರ್‌ ಅಲ್ಲದ ಅವಧಿಯಲ್ಲಿ ಲೋಕಲ್‌ ರೈಲುಗಳಲ್ಲಿ ಹತ್ತಲು ಅವಕಾಶ ನೀಡಬೇಕು ಎಂದು ಸೂಚಿಸಿದೆ. ಈ ಪತ್ರಕ್ಕೆ ಪ್ರತಿಕ್ರಿಯಿಸಿರುವ ರೈಲ್ವೇ ಆಡಳಿತವು ಜನಸಂದಣಿಯ ನಿಯಂತ್ರಣಕ್ಕೆ ತಂತ್ರಜ್ಞಾನವನ್ನು ಬಳಸುವಂತೆ ರಾಜ್ಯ ಸರಕಾರಕ್ಕೆ ತಿಳಿಸಿದೆ.

ರೈಲ್ವೇಯ ಪ್ರಸ್ತಾವನೆಯ ಕುರಿತು ಕೆಲಸವನ್ನು ಪ್ರಾರಂಭಿಸಿರುವ ರಾಜ್ಯವು ಪೀಕ್‌ ಅವರ್‌ ಅಲ್ಲದ ಅವಧಿಯಲ್ಲಿ ಸಾರ್ವಜನಿಕರು ಉಪನಗರ ಲೋಕಲ್‌ ರೈಲುಗಳನ್ನು ಹತ್ತುವಾಗ ಜನದಟ್ಟಣೆಯಾಗದಂತೆ ನೋಡಿಕೊಳ್ಳಲು ವೆಬ್‌ ಆಧಾರಿತ ಆ್ಯಪ್‌ ಒಂದನ್ನು ಅಭಿವೃದ್ಧಿಪಡಿಸುತ್ತಿದೆ ಮತ್ತು ಕಲರ್‌ ಕೋಡಿಂಗ್‌ ಕಾರ್ಯವಿಧಾನವನ್ನು ಪರಿಚಯಿಸಲು ಯೋಜಿಸುತ್ತಿದೆ.

ನಾವು ಆ್ಯಪ್‌ ಅನ್ನು ಅಭಿವೃದ್ಧಿಪಡಿಸಲಿದ್ದೇವೆ. ಉಪನಗರ ರೈಲುಗಳಲ್ಲಿನ ಪ್ರಯಾಣಿಕರ ಸಂಖ್ಯೆಯನ್ನು ನಿರ್ಬಂಧಿಸಲು ನಾವು ಕಲರ್‌ ಕೋಡಿಂಗ್‌ ಕಾರ್ಯವಿಧಾನದ ಮೇಲೆಯೂ ಕೆಲಸ ಮಾಡುತ್ತಿದ್ದೇವೆ ಎಂದು ರಾಜ್ಯ ಸರಕಾರದ ಪರಿಹಾರ ಮತ್ತು ಪುನರ್ವಸತಿ ಇಲಾಖೆಯ ಕಾರ್ಯದರ್ಶಿ ಕಿಶೋರ್‌ ರಾಜೇ ನಿಂಬಾಳ್ಕರ್‌ ಹೇಳಿದ್ದಾರೆ.

ಆ್ಯಪ್‌ ಮೂಲಕ ಕಲರ್‌ ಕೋಡ್‌ ಟಿಕೆಟ್‌
ಪ್ರಯಾಣಿಕರಿಗೆ ಟಿಕೆಟ್‌ ಕಾಯ್ದಿರಿಸಲು ಮತ್ತು ಅವರು ಪ್ರಯಾಣಿಸಲು ಬಯಸುವ ಸಮಯ ಸ್ಲಾಟ್‌ ಅನ್ನು ನಿರ್ಧರಿಸಲು ಈ ಆ್ಯಪ್‌ ಸಹಾಯ ಮಾಡಲಿದೆ. ರೈಲುಗಳಲ್ಲಿ ಜನದಟ್ಟಣೆ ತಡೆಗಟ್ಟಲು ರೈಲ್ವೇ ಅಧಿಕಾರಿಗಳಿಗೆ ನಿಗದಿತ ಸಂಖ್ಯೆಯ ಟಿಕೆಟ್‌ಗಳನ್ನು ನೀಡಲು ಇದು ಅನುವು ಮಾಡಿಕೊಡಲಿದೆ. ಪ್ರಯಾಣಿಕರಿಗೆ ಪ್ರಯಾಣಿಸುವ ಸಮಯವನ್ನು ಸೂಚಿಸುವ ಕಲರ್‌ ಕೋಡ್‌ ಹೊಂದಿರುವ ಟಿಕೆಟ್‌ಗಳನ್ನು ನೀಡಲಾಗುವುದು ಎಂದು ಮಂತ್ರಾಲಯದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಈ ಮಧ್ಯೆ ಪಶ್ಚಿಮ ಮತ್ತು ಮಧ್ಯ ರೈಲ್ವೇಯ ಆಡಳಿತಗಳು ತಮ್ಮ ಸಾಮರ್ಥ್ಯದ ಬಗ್ಗೆ ಕಳವಳ ವ್ಯಕ್ತಪಡಿಸಿವೆ. ಉಭಯ ರೈಲ್ವೇ ವಿಭಾಗಗಳು ದೈನಂದಿನ 3,100 ರೈಲುಗಳನ್ನು ಓಡಿಸುವ ಸಾಮರ್ಥ್ಯವನ್ನು ಹೊಂದಿವೆ. ಎರಡೂ ರೈಲ್ವೇಗಳು ತಮ್ಮ ಅಸಹಾಯಕತೆಯನ್ನು ಸಮರ್ಥಿಸಿಕೊಂಡಿದ್ದು, ಪ್ರತಿ ರೈಲಿನಲ್ಲಿ 700 ಪ್ರಯಾಣಿಕರಿಗೆ ಮತ್ತು ಕೋವಿಡ್‌-19 ಪೂರ್ವದಲ್ಲಿದ್ದ 70 ಲಕ್ಷಕ್ಕೆ ಹೋಲಿಸಿದರೆ ಪ್ರತಿದಿನ ಸುಮಾರು 22 ಲಕ್ಷ ಪ್ರಯಾಣಿಕರಿಗೆ ಅವಕಾಶ ನೀಡುವುದಾಗಿ ಹೇಳಿವೆ.

ನಾವು ಖಾಸಗಿ ವಲಯದ ಶೇ.30ರಷ್ಟು ಉದ್ಯೋಗಿಗಳಿಗೆ ರೈಲುಗಳಲ್ಲಿ ಪ್ರಯಾಣಿಸಲು ಅವಕಾಶ ನೀಡಿದ್ದೇವೆ, ಇದು ಪ್ರತಿದಿನ ಸುಮಾರು 20 ಲಕ್ಷ ಪ್ರಯಾಣಿಕರನ್ನು ಕಡಿಮೆ ಮಾಡಿದೆ. ಇದಲ್ಲದೆ, ಶಾಲೆಗಳು, ಕಾಲೇಜುಗಳು ಮತ್ತು ಇತರ ಶಿಕ್ಷಣ ಸಂಸ್ಥೆಗಳು ಮುಚ್ಚಿರುವುದರಿಂದ ಹೆಚ್ಚುವರಿ 20 ಲಕ್ಷ ಪ್ರಯಾಣಿಕರು ಕಡಿಮೆಯಾಗಿದ್ದಾರೆ. ಹೀಗಾಗಿ, ರೈಲ್ವೇ ಆಡಳಿತಗಳು ತಮ್ಮ 3,100 ರೈಲು ಸೇವೆಗಳ ಸಂಪೂರ್ಣ ಸಾಮರ್ಥ್ಯದೊಂದಿಗೆ ಕಾರ್ಯನಿರ್ವಹಿಸಿದರು ಕೂಡ ಪೀಕ್‌ ಅವಧಿಯಲ್ಲಿ ಯಾವುದೇ ಜನದಟ್ಟಣೆ ಸಂಭವಿಸುವುದಿಲ್ಲ. ಅಲ್ಲದೆ ಮಹಿಳಾ ಪ್ರಯಾಣಿಕರಿಗಾಗಿ ಪ್ರತಿ ಗಂಟೆಗೆ ವಿಶೇಷ ರೈಲು ಓಡಿಸಲು ನಾವು ಸೂಚಿಸಿದ್ದೇವೆ. ಈ ಕ್ರಮವು ವಿವಿಧ ಶಿಫ್ಟ್‌ಗಳಲ್ಲಿ ವಿಭಜಿಸಲಾಗಿರುವ ಕಚೇರಿ ಸಮಯವನ್ನು ಪ್ರೋತ್ಸಾಹಿಸುವುದಕ್ಕೆ ಅನುಗುಣವಾಗಿರುತ್ತದೆ. ಹೆಚ್ಚಿನ ಮಹಿಳಾ ವಿಶೇಷ ರೈಲುಗಳು ಮಹಿಳಾ ಪ್ರಯಾಣಿಕರಿಗೆ ಪೀಕ್‌ ಅಲ್ಲದ ಸಮಯದಲ್ಲಿ ಪ್ರಯಾಣಿಸಲು ಸಹಾಯ ಮಾಡಲಿವೆ ಎಂದು ತಮ್ಮ ಹೆಸರು ಬಹಿರಂಗಪಡಿಸಲು ಇಚ್ಛಿfಸದ ರಾಜ್ಯ ಸರಕಾರಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ.