ಅನಂತ್ ಕುಮಾರ್ ಹೆಗಡೆಗೆ ಸಂಸ್ಕೃತಿ ಇಲ್ಲ, ಮನುವಾದಿ; ಸಿಎಂ

ಹುಬ್ಬಳ್ಳಿ: ಕೇಂದ್ರ ಸಚಿವ ಅನಂತ ಕುಮಾರ್ ಹೆಗಡೆಗೆ ಸಂಸ್ಕೃತಿ ಇಲ್ಲ. ರಾಜಕೀಯ ಭಾಷೆ, ಸಾಂವಿಧಾನಿಕ ಭಾಷೆ ಗೊತ್ತಿಲ್ಲ. ಹೆಗಡೆ ಒಬ್ಬ ಮನುವಾದಿ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ವಾಗ್ದಾಳಿ ನಡೆಸಿದ್ದಾರೆ.

ಹುಬ್ಬಳ್ಳಿಯಲ್ಲಿ ಸುದ್ದಿಗಾರರ ಜತೆ ಮಾತನಾಡಿದ ಅವರು, ಜಾತ್ಯತೀತವಾದಿಗಳು ಮತ್ತು  ವಿಚಾರವಾದಿಗಳ ಕುರಿತು ನೀಡಿದ್ದ ಹೇಳಿಕೆಗೆ ಸೋಮವಾರ ಪ್ರತಿಕ್ರಿಯೆ ನೀಡಿದರು.

ಹೆಗಡೆಯವರು ಸಂವಿಧಾನ ಬದಲಾವಣೆ ಮಾಡುತ್ತೇವೆ ಎಂದು ಹೇಳುತ್ತಾರೆ. ಸಂವಿಧಾನ ರಚನೆಯಾಗಿ ಎಷ್ಟು ವರ್ಷ ಆಯ್ತು, ಭಾರತ ದೇಶದ 125 ಕೋಟಿ ಜನರು ಭಾರತೀಯರು. ಎಲ್ಲಾ ಧರ್ಮಗಳು ಸಮಾನವಾಗಿ ಇರಬೇಕು ಎಂಬುದೇ ಪ್ರಜಾಪ್ರಭುತ್ವದ ಆಶಯ.

ಸಂವಿಧಾನದ ಮೂಲ ಪರಿಕಲ್ಪನೆಯೇ ಜಾತ್ಯತೀತ ರಾಷ್ಟ್ರದ ಉದ್ದೇಶವಾಗಿದೆ. ಈ ಹಿನ್ನೆಲೆಯಲ್ಲಿ ಒಂದು ಧರ್ಮಕ್ಕೆ ದೇಶವನ್ನು ಸೀಮಿತಗೊಳಿಸಲು ಸಾಧ್ಯವಿಲ್ಲ ಎಂದು ಹೇಳಿದರು.