ಹೊಸತನದ ಕಲಾ ಪ್ರದರ್ಶನ

ಮಾನವನ ಬದುಕು ಸಾರ್ಥಕಗೊಳ್ಳುವುದು ಆಚಾರ, ವಿಚಾರ ಮತ್ತು ಸಂಸ್ಕಾರಗಳಿಂದ. ಹಾಗೆಯೇ ಶ್ರೀಮಂತಗೊಳ್ಳುವುದು ಲಲಿತ ಕಲೆಗಳಿಂದ. ಉಡುಪಿಯ ಚಿತ್ರಕಲಾ ಮಂದಿರ ಕಲಾ ವಿದ್ಯಾಲಯ ಮತ್ತು ಹಿರಿಯಡ್ಕದ ಸುವಾಸ ಕ್ರಿಯೇಟಿವ್‌ ಆರ್ಟ್‌ ಸೆಂಟರ್‌ ಇವರು ಜಂಟಿಯಾಗಿ ಮಣಿಪಾಲದ ಇಸ್ಕಾನ್‌ ಸಂಸ್ಥೆಯ ಭಜನ್‌ ಕುಟೀರದಲ್ಲಿ ಮೂರು ದಿನಗಳ ಚಿತ್ರಕಲಾ ಪ್ರದರ್ಶನವನ್ನು ಏರ್ಪಡಿಸಿದ್ದರು. ಇಲ್ಲಿನ ವಿಶೇಷವೆಂದರೆ ಭಗವದ್ಗೀತೆಯ ವಿಚಾರಧಾರೆಗಳೊಂದಿಗೆ, ಇಂಪಾದ ಭಜನೆಗಳನ್ನು ಆಲಿಸುವು ದರ ಜತೆಗೆ ಕಲಾಕೃತಿಗಳನ್ನು ನೋಡಿ ಆಸ್ವಾದಿಸುವ ಅವಕಾಶ. 

ಪ್ರದರ್ಶನಾಂಗಣದಲ್ಲಿದ್ದ ಸುಮಾರು ಐವತ್ತಕ್ಕೂ ಹೆಚ್ಚು ಕಲಾಕೃತಿಗಳಲ್ಲಿ ಸಾಕಷ್ಟು ಶ್ರೀಕೃಷ್ಣನ ಬಾಲಲೀಲೆ ಮತ್ತು ಜೀವನ ಚರಿತ್ರೆಯನ್ನು ಬಿಂಬಿಸುವ ಚಿತ್ರಣಗಳಿಂದ ಕೂಡಿದ್ದವು. ಸಮಕಾಲೀನ ಚಿಂತನೆಯ ಹತ್ತು ಹಲವು ವಿಷಯವನ್ನೊಳಗೊಂಡ ಕಲಾಕೃತಿಗಳ ಜತೆಗೆ ಮೈಸೂರು, ಕೇರಳ ಶೈಲಿಯ ಸಾಂಪ್ರದಾಯಿಕ ಕಲಾಕೃತಿಗಳು, ಗಂಜೀಫಾ, ವರ್ಲಿ, ಕಾಂಗ್ರಾ, ಅಜಂತಾ, ರಾಗಾಮಾಲಾ, ರಾಜಸ್ಥಾನಿ, ಜೇಮಿನಿರಾಯ್‌ ಶೈಲಿಯಿಂದ ಪ್ರಭಾವಿತವಾದ ಕಲಾಕೃತಿಗಳು, ಗ್ಲಾಸ್‌ ಪೈಂಟಿಂಗ್‌ ಹಾಗೆಯೇ ಭೂ ದೃಶ್ಯ ಕಲಾಕೃತಿಗಳಿದ್ದವು. ವಿಶೇಷವಾಗಿ ಆಕರ್ಷಿಸಿದ್ದು ಮಣಿಪಾಲದ ಕಲಾವಿದ ಸತೀಶ್ಚಂದ್ರರ ಸಂಗೀತಗಾರ, ಬುದ್ಧ, ನೃತ್ಯ ಕಲಾವಿದೆ, ಮುದ್ದು ಮುಖದ ಬಾಲಕೃಷ್ಣ ಹೀಗೆ ಹಲವಾರು ಸಾದೃಶ್ಯ ಕಲಾಕೃತಿಗಳು. 

ಒಟ್ಟಾರೆಯಾಗಿ ಎರಡೂ ಕಲಾ ಶಾಲೆಯ ವಿದ್ಯಾರ್ಥಿಗಳು ಅವರದೇ ಆದ ವಿಶಿಷ್ಟ ಶೈಲಿ ಮತ್ತು ತಂತ್ರಗಾರಿಕೆಯೊಂದಿಗೆ ತಮ್ಮ ಪ್ರತಿಭೆಯನ್ನು ಕಲಾಕೃತಿಗಳಲ್ಲಿ ಬಹಳ ಸೊಗಸಾಗಿ ಅನಾವರಣಗೊಳಿಸಿದ್ದಾರೆ. ಈ ಪ್ರದರ್ಶನವನ್ನು ಆಯೋಜಿಸಿದ ಕಲಾ ಶಾಲೆಯ ಪ್ರಾಂಶುಪಾಲರಾದ ರಾಜೇಂದ್ರ ತ್ರಾಸಿ, ಆರ್ಟ್‌ ಸೆಂಟರಿನ ರೂವಾರಿ ಸುರೇಂದ್ರನ್‌ ಮತ್ತು ಇಸ್ಕಾನ್‌ ಸಂಸ್ಥೆ ಅಭಿನಂದನಾರ್ಹರು.

ಕೆ. ದಿನಮಣಿ ಶಾಸ್ತ್ರೀ