ಪೊಲೀಸರ ನಂಬಿಕೆ ಇಲ್ಲದಿದ್ದರೆ ರಾಜ್ಯ ಬಿಡಲಿ; ಅಮೃತಾ ಫಡ್ನವೀಸ್‌ ವಿರುದ್ಧ ಅನಿಲ್‌ ಪರಬ್ ಕಿಡಿ

ಮುಂಬಯಿ: ಮಾಜಿ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್‌ ಅವರ ಪತ್ನಿ ಅಮೃತಾ ಫಡ್ನವೀಸ್‌ ಅವರು ರಾಜ್ಯ ಅಸುರಕ್ಷಿತರೆಂದು ಭಾವಿಸಿದರೆ ಮತ್ತು ಅವರಿಗೆ ಮುಂಬಯಿ ಪೊಲೀಸರ ಮೇಲೆ ನಂಬಿಕೆ ಇಲ್ಲದಿದ್ದರೆ, ಅವರು ರಾಜ್ಯವನ್ನು ತೊರೆಯಬೇಕು ಎಂದು ಶಿವಸೇನೆ ಮುಖಂಡ ಅನಿಲ್‌ ಪರಬ್‌ ಹೇಳಿದ್ದಾರೆ.

ಮುಂಬಯಿ ತನ್ನ ಮಾನವೀಯತೆಯನ್ನು ಕಳೆದುಕೊಂಡಿದೆ ಮತ್ತು ಸುಶಾಂತ್‌ ಪ್ರಕರಣವನ್ನು ಮಹಾನಗರ ಪೊಲೀಸರು ನಿಭಾಯಿಸುತ್ತಿರುವ ವಿಧಾನವನ್ನು ನೋಡುವಾಗ ಇದು ಬದುಕಲು ಹೆಚ್ಚು ಸುರಕ್ಷಿತವಲ್ಲ ಎಂದು ಭಾಸವಾಗುತ್ತದೆ ಎಂದು ಅಮೃತಾ ಫಡ್ನವೀಸ್‌ ಅವರು ಟ್ವೀಟ್‌ ಮಾಡಿದ ಒಂದು ದಿನದ ಬಳಿಕ ಪರಬ್‌ ಅವರಿಂದ ಈ ಹೇಳಿಕೆಗಳು ಬಂದಿವೆ.

ಇಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಸಾರಿಗೆ ಸಚಿವರು, ಸರಕಾರ ಬದಲಾಗಿದೆ (ಕಳೆದ ವರ್ಷ), ಆದರೆ ಪೊಲೀಸ್‌ ಪಡೆ ಅದೇ ಆಗಿದೆ. ಕಳೆದ ಐದು ವರ್ಷಗಳಲ್ಲಿ ಅವರನ್ನು (ಅಮೃತಾ) ರಕ್ಷಿಸಿದ ಮತ್ತು ಈಗಲೂ ರಕ್ಷಿಸುತ್ತಿರುವ ಪೊಲೀಸ್‌ ಸಿಬಂದಿಗಳ ಮೇಲೆ ಅವರಿಗೆ ನಂಬಿಕೆ ಇಲ್ಲದಿದ್ದರೆ ಅವರು ಈ ರಾಜ್ಯವನ್ನು ತೊರೆಯಬೇಕು ಎಂದಿದ್ದಾರೆ. ಕಳೆದ 5 ವರ್ಷಗಳಲ್ಲಿ ಬಿಜೆಪಿ ಪೊಲೀಸರನ್ನು ಹೊಗಳುತ್ತಿತ್ತು, ಆದರೆ ಅಧಿಕಾರ ಕಳೆದುಕೊಂಡ ಬಳಿಕ ಅದು ತನ್ನ ನಿಲುವನ್ನು ಬದಲಾಯಿಸಿದೆ ಎಂದಿದ್ದಾರೆ.

ಅಧಿಕಾರವನ್ನು ಕಳೆದುಕೊಂಡ ಹಿನ್ನೆಲೆ ಅವರು ಅಸುರಕ್ಷಿತರೆಂದು ಭಾವಿಸುತ್ತಿದ್ದರೆ, ಇದಕ್ಕೆ ರಾಜ್ಯವನ್ನು ತೊರೆಯುವುದು ಅವರ ಮುಂದೆ ಉಳಿದಿರುವ ಏಕೈಕ ಆಯ್ಕೆಯಾಗಿದೆ ಎಂದರು. ಅಮೃತಾ ಫಡ್ನವೀಸ್‌ ಅವರ ಹೇಳಿಕೆಯು ಅಧಿ ಕಾರವನ್ನು ಕಳೆದುಕೊಳ್ಳುವ ಬಗ್ಗೆ  ಬಿಜೆಪಿಯ ಹತಾಶೆಯನ್ನು ಒತ್ತಿಹೇಳುತ್ತದೆ ಮತ್ತು ಅದರ ಹಿಂದೆ ಶೇ. 100ರಷ್ಟು ರಾಜಕೀಯವಿದೆ ಎಂದು ಸಚಿವರು ತಿಳಿಸಿದ್ದಾರೆ.