ಲಾಕ್‌ಡೌನ್‌ ವೇಳೆ  ಅಂಬಾನಿ ಆದಾಯ ಗಂಟೆಗೆ 90 ಕೋಟಿ!

ನವದೆಹಲಿ: ಕೋವಿಡ್ ಲಾಕ್‌ಡೌನ್‌ ಅವಧಿಯಲ್ಲಿ  ರಿಲಯನ್ಸ್‌ ಇಂಡಸ್ಟ್ರೀಸ್‌ ಲಿ. ಮುಖ್ಯಸ್ಥ ಮುಕೇಶ್‌ ಅಂಬಾನಿ ಅವರು ಗಂಟೆಗೆ 90 ಕೋಟಿ ರೂ.ಗಳಂತೆ ಆದಾಯ ಗಳಿಸುತ್ತಿದ್ದರು. ಈ ಅವಧಿಯಲ್ಲಿ ಭಾರತದ 100 ಟಾಪ್‌ ಕೋಟ್ಯಧಿಪತಿಗಳ ಸಂಪತ್ತು 12.97 ಲಕ್ಷ ಕೋಟಿ ರೂ.ಗಳಷ್ಟು ಹೆಚ್ಚಳವಾಗಿದೆ ಎಂದು ಆಕ್ಸ್‌ಫಾಮ್‌ ಸಂಸ್ಥೆಯ ವರದಿ ಹೇಳಿದೆ.

“ಅಸಮಾನತೆಯ ವೈರಸ್‌’ ಎಂಬ ಶೀರ್ಷಿಕೆಯ ವರದಿಯಲ್ಲಿ ಈ ಕುರಿತು ಮಾಹಿತಿ ನೀಡಿರುವ ಆಕ್ಸ್‌ಫಾಮ್‌, “100 ಮಂದಿ ಕೋಟ್ಯಧಿಪತಿಗಳು ಗಳಿಸಿದ್ದ ಈ ಸಂಪತ್ತನ್ನು ದೇಶದ 13.8 ಕೋಟಿ ಬಡವರಿಗೆ ಹಂಚಿದರೆ, ಪ್ರತಿಯೊಬ್ಬ ಬಡವನಿಗೂ ತಲಾ 94,045 ರೂ. ದೊರೆಯುತ್ತಿತ್ತು’ ಎಂದೂ ವಿಶ್ಲೇಷಿಸಲಾಗಿದೆ.

ವಿಶ್ವ ಆರ್ಥಿಕ ವೇದಿಕೆಯ “ದಾವೋಸ್‌ ಡಯಲಾಗ್ಸ್‌’ನಲ್ಲಿ ಈ ವರದಿಯನ್ನು ಬಿಡುಗಡೆ ಮಾಡಲಾಗಿದೆ.ಕೋವಿಡ್ ಸೋಂಕು ಜಗತ್ತಿನ ಅತ್ಯಂತ ಕೆಟ್ಟ ಆರೋಗ್ಯ ಬಿಕ್ಕಟ್ಟಾಗಿದ್ದು,  ಅದು 1930ರ ದಶಕದ “ಬಹುದೊಡ್ಡ ಹಿಂಜರಿತ’ದಷ್ಟೇ ದೊಡ್ಡ ಬಿಕ್ಕಟ್ಟು ಎಂದೂ ವರದಿ ಹೇಳಿದೆ.