ಮಣಿಹಳ್ಳ , ನಿಡಿಗಲ್ ಸೇತುವೆಗಳು ಬಹುತೇಕ ಪೂರ್ಣ

ಬಂಟ್ವಾಳ ಜು. 7: ಬಿ.ಸಿ. ರೋಡ್‌ – ಕಡೂರು ರಸ್ತೆಯ ರಾ. ಹೆ.- 234 ಆಗಿ ಮೇಲ್ದರ್ಜೆಗೇರಿದ ಬಳಿಕ ಮೊದಲ ಅನುದಾನವೆಂಬಂತೆ ಬಿ.ಸಿ. ರೋಡ್‌-ಚಾರ್ಮಾಡಿ ಮಧ್ಯೆ ಮೂರು ಸೇತುವೆ ಗಳಿಗೆ 28 ಕೋ. ರೂ. ಅನುದಾನ ಮಂಜೂ ರಾಗಿತ್ತು. ಪ್ರಸ್ತುತ ಮೂರರಲ್ಲಿ ಒಂದು ಸಂಚಾರಕ್ಕೆ ಮುಕ್ತಗೊಂಡಿದ್ದು, 2 ಸೇತುವೆಗಳ ಕಾಮಗಾರಿ ಬಹು ತೇಕ ಅಂತಿಮ ಹಂತದಲ್ಲಿದೆ.

ಬೆಳ್ತಂಗಡಿ ತಾ|ನ ನಿಡಿಗಲ್, ಚಾರ್ಮಾಡಿ ಹಳ್ಳ, ಬಂಟ್ವಾಳ ತಾ|ನ ಮಣಿಹಳ್ಳ ಹೀಗೆ 3 ಕಡೆ ಹೊಸ ಸೇತುವೆ ಮಂಜೂರಾಗಿತ್ತು. ಈ ಹಿಂದೆ ಇಲ್ಲಿ ಸೇತುವೆಗಳಿದ್ದರೂ ಕಿರಿದಾದ ಸೇತುವೆಯಲ್ಲಿ ಏಕಕಾಲದಲ್ಲಿ ಎರಡು ಘನ ವಾಹನಗಳ ಸಂಚಾರ ಅಸಾಧ್ಯ ಹಾಗೂ ಸೇತುವೆಗಳು ಹಳೆಯದಾದ ಹಿನ್ನೆಲೆಯಲ್ಲಿ ಹೊಸ ಸೇತುವೆಗಳಿಗೆ ಅನುದಾನ ಮಂಜೂರಾಗಿತ್ತು.

ಸಂಪರ್ಕ ರಸ್ತೆ ಕಾಮಗಾರಿ

ಕಳೆದ ವರ್ಷದ ಪ್ರಾರಂಭ ದಲ್ಲಿ ಸೇತುವೆಗಳ ಕಾಮಗಾರಿ ಪ್ರಾರಂಭಗೊಂಡಿದ್ದು, ಕಿರಿ ದಾದ ಚಾರ್ಮಾಡಿ ಹಳ್ಳ ದಲ್ಲಿ ಸೇತುವೆ, ಸಂಪರ್ಕ ರಸ್ತೆ ನಿರ್ಮಾಣವಾಗಿ ವಾಹನ ಸಂಚಾರಕ್ಕೆ ಮುಕ್ತಗೊಳಿಸಲಾಗಿದೆ. ನಿಡಿಗಲ್ ಸೇತುವೆಗೆ ಸಂಪರ್ಕ ರಸ್ತೆ ಈಗಾಗಲೇ ನಿರ್ಮಾಣ ಗೊಂಡಿದ್ದು, ನದಿ ನೀರಿಗೆ ಕೊಚ್ಚಿ ಹೋಗದಂತೆ ರಸ್ತೆಯ ಬದಿಗಳಲ್ಲಿ ತಡೆ ಗೋಡೆ ನಿರ್ಮಾಣ ಕಾಮಗಾರಿ ನಡೆಯು ತ್ತಿದೆ. ಒಂದು ತಿಂಗಳ ಮಳೆಯನ್ನು ನೋಡಿಕೊಂಡು ಹೊಸ ಸೇತುವೆಗಳಲ್ಲಿ ವಾಹನ ಸಂಚಾರಕ್ಕೆ ಅವಕಾಶ ಮಾಡಿ ಕೊಡಲಾಗುತ್ತದೆ ಎಂದು ರಾ.ಹೆ. ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ಮಣಿಹಳ್ಳ ಸೇತುವೆ ಕಾಮಗಾರಿ ಬಹು ತೇಕ ಪೂರ್ಣಗೊಂಡಿದ್ದರೂ ಸಂಪರ್ಕ ರಸ್ತೆ ಕಾಮಗಾರಿ ಆರಂಭಗೊಂಡಿಲ್ಲ. ಅಂದರೆ ಪ್ರಸ್ತುತ ಬಿ.ಸಿ. ರೋಡ್‌-ಪುಂಜಾಲಕಟ್ಟೆಯ ಹೆದ್ದಾರಿ ಕಾಮಗಾರಿ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಅದರ ಜತೆಗೆ ಸಂಪರ್ಕ ರಸ್ತೆಯ ಕಾಮಗಾರಿ ನಡೆಯಲಿದೆ. ಜತೆಗೆ ಇಲ್ಲಿ ಸಂಪರ್ಕ ರಸ್ತೆಗೆ ಭೂಸ್ವಾಧೀನ ಪ್ರಕ್ರಿಯೆಯೂ ನಡೆಯಬೇಕಿದೆ.

ಈ ಭಾಗಗಳಲ್ಲಿ ಹೊಸ ಸೇತುವೆ ನಿರ್ಮಾಣವಾಗಿದ್ದರೂ ಹಳೆ ಸೇತುವೆಗಳೂ ಪ್ರಸ್ತುತ ಸಂಚಾರಕ್ಕೆ ಯೋಗ್ಯ ಸ್ಥಿತಿಯಲ್ಲಿರುವ ಕಾರಣ ಸೇತುವೆಯಲ್ಲಿ ಏಕಮುಖ ಸಂಚಾರ ನಡೆಯುವ ಸಾಧ್ಯತೆ ಇದೆ. ಈ ಮೂರು ಸೇತುವೆಗಳ ನಿರ್ಮಾಣದ ನಡುವೆಯೇ ಬಂಟ್ವಾಳ ಭಂಡಾರಿಬೆಟ್ಟು ಬಳಿ ಕಿರುಸೇತುವೆಯೊಂದು ನಿರ್ಮಾಣ ಗೊಂಡು ಸಂಚಾರಕ್ಕೆ ಮುಕ್ತಗೊಂಡಿದೆ.

ಸೇತುವೆಗಳ ಉದ್ದಗಲ
ಮಂಜೂರಾಗಿರುವ ಮೂರು ಸೇತುವೆಗಳಲ್ಲಿ ನಿಡಿಗಲ್ ಸೇತುವೆಯು ಉದ್ದದ ಸೇತುವೆಯಾಗಿದ್ದು, ನೇತ್ರಾವತಿ ನದಿಗೆ ಸುಮಾರು 140 ಮೀ. ಉದ್ದಕ್ಕೆ ನಿರ್ಮಾಣ ಗೊಂಡಿದೆ. ಮಣಿಹಳ್ಳದಲ್ಲಿ ಬೃಹತ್‌ ತೋಡಿಗೆ 40 ಮೀ. ಉದ್ದದ ಸೇತುವೆ ನಿರ್ಮಾಣವಾಗಿದೆ. ಚಾರ್ಮಾಡಿ ಹಳ್ಳದಲ್ಲಿ ಸುಮಾರು 10 ಮೀ. ಉದ್ದದ ಕಿರುಸೇತುವೆ ನಿರ್ಮಾಣವಾಗಿದೆ. ಎಲ್ಲ್ಲ 3 ಸೇತುವೆಗಳೂ ಫ‌ುಟ್ಪಾತ್‌ ಸಹಿತ 16 ಮೀ. ಅಗಲವನ್ನು ಹೊಂದಿದೆ.