ಜ್ವೆರೇವ್‌ಗೆ ದ್ವಿತೀಯ ಎಟಿಪಿ ಫೈನಲ್ಸ್‌ ಪ್ರಶಸ್ತಿ

ಟ್ಯುರಿನ್‌ (ಇಟಲಿ): ಡ್ಯಾನಿಲ್‌ ಮೆಡ್ವೆಡೇವ್‌ ಎದುರಿನ ಸೋಲಿನ ಸರಪಳಿಯನ್ನು ಕಡಿದ ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೇವ್‌ ತಮ್ಮ 2ನೇ ಎಟಿಪಿ ಫೈನಲ್ಸ್‌ ಪ್ರಶಸ್ತಿ ಜಯಿಸಿದರು. ಭಾನುವಾರ ರಾತ್ರಿಯ ಫೈನಲ್‌ ಸೆಣಸಾಟವನ್ನು ಅವರು 6-4, 6-4 ನೇರ ಸೆಟ್‌ಗಳಿಂದ ಗೆದ್ದರು.

ಸೆಮಿಫೈನಲ್‌ನಲ್ಲಿ ನಂ.1 ಟೆನಿಸಿಗ ನೊವಾಕ್‌ ಜೊಕೋವಿಕ್‌ ಅವರನ್ನು ಮಣಿಸಿದ ಜ್ವೆರೇವ್‌, ಫೈನಲ್‌ನಲ್ಲಿ ವಿಶ್ವದ ನಂ.2 ಆಟಗಾರ ಮೆಡ್ವೆಡೇವ್‌ಗೆ ಆಘಾತವಿಕ್ಕಿದರು.

2020ರ ಬಳಿಕ ಮೆಡ್ವೆಡೇವ್‌ ವಿರುದ್ಧ ಸತತ 5 ಪಂದ್ಯಗಳಲ್ಲಿ ಸೋತಿದ್ದ ಜ್ವೆರೇವ್‌, ಈ ಕೂಟದ ಲೀಗ್‌ ಪಂದ್ಯದಲ್ಲೂ ಎಡವಿದ್ದರು. 3ನೇ ಸೆಟ್‌ ಅನ್ನು ಟೈ ಬ್ರೇಕರ್‌ನಲ್ಲಿ ಕಳೆದುಕೊಂಡಿದ್ದರು. ಆದರೆ ಪ್ರಶಸ್ತಿ ಸೆಣಸಾಟದಲ್ಲಿ ಗೆಲುವಿನ ಸಂಭ್ರಮ ಆಚರಿಸಿದರು.

ಇದು ಈ ವರ್ಷದ 6 ಫೈನಲ್‌ಗ‌ಳಲ್ಲಿ ಅಲೆಕ್ಸಾಂಡರ್‌ ಜ್ವೆರೇವ್‌ ಗೆದ್ದ 6ನೇ ಪ್ರಶಸ್ತಿ ಎಂಬುದು ವಿಶೇಷ. ಇದರಲ್ಲಿ ಒಲಿಂಪಿಕ್ಸ್‌ ಚಿನ್ನವೂ ಸೇರಿದೆ.