ಕೋವಿಡ್ ಸೋಂಕು ನಿವಾರಣೆಯಲ್ಲಿ ಆಲ್ಕೋಹಾಲ್ ಭರಿತ ಸೋಂಕುನಿವಾರಕ ಪರಿಣಾಮಕಾರಿ

ಜಿನೇವಾ: ನಮ್ಮ ಕೈಗಳನ್ನು ತೊಳೆಯಲು ಆಲ್ಕೋಹಾಲ್‌ ಆಧಾರಿತ ಸೋಂಕು ನಿವಾರಕಗಳನ್ನು ಬಳಸುವುದು ಕೋವಿಡ್ ವಿರುದ್ಧ ಪರಿಣಾಮಕಾರಿ ಎಂದು ಡಬ್ಲ್ಯುಎಚ್‌ಒ ಶಿಫಾರಸ್ಸು ಮಾಡಿದೆ.

ಜರ್ಮನಿಯ ಸಂಶೋಧಕ ಪ್ರೊಫೆಸರ್‌ ಸ್ಟೆಫ‌ನಿ ಫಾಂಡರ್‌ ನೇತೃತ್ವದ ವೈದ್ಯರ ತಂಡ ನಡೆಸಿದ ಸಂಶೋಧನೆಯಲ್ಲಿ ಈ ಅಂಶ ಬಹಿರಂಗವಾಗಿದ್ದು, ಈ ಸಂಶೋಧನೆ ಆಧರಿಸಿ ವಿಶ್ವ ಆರೋಗ್ಯ ಸಂಸ್ಥೆ ಈ ಸಲಹೆ ನೀಡಿದೆ.

ಕೋವಿಡ್ ವೈರಸ್‌ ವಿರುದ್ಧ 30 ಸೆಕೆಂಡುಗಳ ಕಾಲ ಕೈ ತೊಳೆಯಲು ಬಳಸುವ ಆಲ್ಕೋಹಾಲ್‌ ಆಧರಿತ ಸೋಂಕು ನಿವಾರಕಗಳನ್ನು ಬಳಸಲಾಯಿತು. ಬಳಿಕ ಈ ವೈರಸ್‌ಗಳನ್ನು ಕೋಶದೊಳಗೆ ಸೇರಿಸಿ ಪರೀಕ್ಷಿಸಲಾಯಿತು. ಆಗ ಈ ವೈರಸ್‌ಗಳು ಸಾಕಷ್ಟು ಸಂಖ್ಯೆಯಲ್ಲಿ ನಿಷ್ಕ್ರಿಯಗೊಂಡಿದ್ದು ಕಂಡು ಬಂತು.

ಈ ವೈರಸ್‌ಗಳು ಎಥೆನಾಲ್‌ ಮತ್ತು ಐಸೋಪ್ರಾಫೆನಾಲ್‌ ವಿರುದ್ಧವೂ ನಿಷ್ಕ್ರಿಯತೆ ತೋರುತ್ತವೆ ಎಂದು ಸಂಶೋಧನಾ ತಂಡ ತಿಳಿಸಿದೆ. ವಿಶ್ವ ಆರೋಗ್ಯ ಸಂಸ್ಥೆ ಶಿಫಾರಸ್ಸು ಮಾಡಿದ ಈ ಸೋಂಕು ನಿವಾರಕ, ಶೇ.80ರಷ್ಟು ಎಥೆನಾಲ್‌, ಶೇ.1.45ರಷ್ಟು ಗ್ಲಿಸರಿನ್‌ ಮತ್ತು ಶೇ.0.125 ಪರಿಮಾಣದ ಹೈಡ್ರೋಜನ್‌ ಪೆರಾಕ್ಸೈಡ್‌ ಗಳನ್ನು ಒಳಗೊಂಡಿದೆ.