ಅಕ್ಷಯ ತೃತೀಯ: ಮಂಕಾದ ಚಿನ್ನ ಖರೀದಿ

ರಾಯಚೂರು: ಗಗನಕ್ಕೆ ಜಿಗಿದ ಚಿನ್ನದ ಬೆಲೆಯಿಂದ ಈ ಬಾರಿ ಅಕ್ಷಯ ತೃತೀಯಕ್ಕೆ ಚಿನ್ನ ಖರೀದಿ ಸಾಕಷ್ಟು ಇಳಿಮುಖ ಕಂಡಿತ್ತು. ಇದರಿಂದ ಅಕ್ಷಯ ತೃತೀಯ ಸಡಗರ ಸಂಭ್ರಮ ಈ ವರ್ಷಗೂ ನಿರೀಕ್ಷೆಯಂತೆ ಇರಲಿಲ್ಲ.

ಪ್ರತಿ ವರ್ಷ ಅಕ್ಷಯ ತೃತೀಯ ಬಂದರೆ ಒಂದು ವಾರ ಬಂಗಾರ ಬಜಾರ್‌ ಗಡಿಬಿಡಿಯಿಂದ ಕೂಡಿರುತ್ತಿತ್ತು. ಆದರೆ, ಈ ಬಾರಿ ಅಕ್ಷಯ ತೃತೀಯ ದಿನದಂದು ಕೂಡ ಬಜಾರ್‌ ಬಹಳಷ್ಟು ಮಂಕಾಗಿತ್ತು. ವ್ಯಾಪಾರಕ್ಕೆ ಜನ ಆಗಮಿಸಿದರೂ ಕಡಿಮೆ ಪ್ರಮಾಣದ ಚಿನ್ನ ಖರೀದಿಸುತ್ತಿದ್ದವರೇ ಹೆಚ್ಚಾಗಿ ಕಂಡು ಬಂದರು.

ಹಿಂದೆಯೆಲ್ಲ ವಾರದ ಮುಂಚೆಯೇ ಆಗಮಿಸಿ ತಮಗೆ ಬೇಕಾದ ಆಭರಣ ಸಿದ್ಧತೆಗೆ ಹಣ ನೀಡಿ ಹೋಗುತ್ತಿದ್ದರು, ಅಕ್ಷಯ ತೃತೀಯ ದಿನದಂದು ಆಗಮಿಸಿ ಖರೀದಿಸುತ್ತಿದ್ದರು. ಗ್ರಾಮೀಣ ಭಾಗದ ಜನ ಯುಗಾದಿಯಂದೇ ಹೆಚ್ಚಾಗಿ ಚಿನ್ನ ಖರೀದಿಸುತ್ತಾರೆ. ನಗರ ವಾಸಿಗಳು ಅಕ್ಷಯ ತೃತೀಯ ದಿನದಂದು ಚಿನ್ನ ಖರೀದಿಸುವುದು ಹೆಚ್ಚು.

ಕಳೆದ ಎರಡು ವರ್ಷಗಳಿಂದ ಕೋವಿಡ್‌ ಕಾರಣಕ್ಕೆ ಜನರಿಗೆ ನಿರೀಕ್ಷಿತ ಮಟ್ಟದ ಆದಾಯವಿಲ್ಲದಾಗಿದೆ. ಅಲ್ಲದೇ, ಚಿನ್ನ ಹೊಸ ತೂಕದ ಬೆಲೆ 53 ಸಾವಿರ ಗಡಿ ದಾಟಿರುವುದು ಗ್ರಾಹಕರಿಗೆ ಬಿಸಿ ಮುಟ್ಟಿಸಿದೆ.