ಹೆಚ್ಚು ಆದಾಯ ಗಳಿಕೆ ಟಾಪ್‌ ಟೆನ್‌ನಲ್ಲಿ ಅಕ್ಷಯ್‌

ವಿಶ್ವದಲ್ಲಿ ಅತಿ ಹೆಚ್ಚು ಸಂಭಾವನೆ ಗಳಿಸುವ ಟಾಪ್‌ 10 ಸಿನೆಮಾ ನಟರ ಪಟ್ಟಿಯೊಂದನ್ನು ಫೋರ್ಬ್ಸ್ ಸಂಸ್ಥೆ ಬಿಡುಗಡೆ ಮಾಡಿದೆ. ಆ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವ ಭಾರತದ ಏಕೈಕ ಸಿನೆಮಾ ನಟ ಅಕ್ಷಯ್‌ ಕುಮಾರ್‌. ಈ ಪಟ್ಟಿಯಲ್ಲಿ ಅವರು 6ನೇ ಸ್ಥಾನ ಪಡೆದಿದ್ದಾರೆ. 2019ರ ಜೂ. 1ರಿಂದ 2020ರ ಜೂ. 1ರ ವರೆಗೆ ಗಳಿಸಿದ ಆದಾಯದ ಆಧಾರದಲ್ಲಿ ಈ ಪಟ್ಟಿ ತಯಾರಿಸಲಾಗಿದೆ. 2019ರ ಪಟ್ಟಿಯಲ್ಲಿ ಅವರು 4ನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದ್ದರು.

ಅಕ್ಷಯ್‌ ವರಮಾನವೆಷ್ಟು?
ಪ್ರಸಕ್ತ ವರ್ಷದಲ್ಲಿ ಅಕ್ಷಯ್‌ 362 ಕೋಟಿ ರೂ.ಗಳ ಆದಾಯ ಗಳಿಸಿದ್ದಾರೆ. ಅದರಲ್ಲಿ ಹೆಚ್ಚಿನ ಪಾಲು ಗೃಹೋಪಯೋಗಿ ವಸ್ತುಗಳ ಜಾಹೀರಾತುಗಳ ಮೂಲಕ ಬಂದಿದೆ. ಇದರಲ್ಲಿ ಅವರು ಇದೇ ಮೊದಲ ಬಾರಿಗೆ ನಟಿಸುತ್ತಿರುವ ವೆಬ್‌ ಸರಣಿಯಾದ “ಎಂಡ್‌’ಗಾಗಿ ಪಡೆದಿರುವ 74 ಕೋಟಿ ರೂ. ಆದಾಯವೂ ಸೇರಿದೆ. ಈ ಆದಾಯವು ನಿವ್ವಳ ಆದಾಯವಾಗಿದ್ದು, ಅಕ್ಷಯ್‌ ಅವರು ಸರಕಾರಕ್ಕೆ ಕಟ್ಟಬೇಕಿರುವ ತೆರಿಗೆ, ತನ್ನ ಸಹಾಯಕರಿಗೆ ನೀಡುವ ವೇತನ, ಕಮೀಷನ್‌ ಖರ್ಚನ್ನು ಕಡಿತಗೊಳಿಸಿಲ್ಲ ಎಂದು ಫೋರ್ಬ್ಸ್ ಸ್ಪಷ್ಟನೆ ನೀಡಿದೆ.