ರೈಲಿನಿಂದ ಬೀಳುತ್ತಿದ್ದ ತಂದೆ-ಮಗಳ ಜೀವ ಉಳಿಸಿದ ಲೋಕೋ ಪೈಲಟ್‌

ಬೆಳಗಾವಿ: ಚಲಿಸುತ್ತಿರುವ ರೈಲು ಹತ್ತುವಾಗ ಕೈ ಜಾರಿ ಬೀಳುತ್ತಿದ್ದ ತಂದೆ-ಮಗಳ ಕೈ ಹಿಡಿದು ಮೇಲೆತ್ತಿ ಪ್ರಾಣ ರಕ್ಷಿಸಿ ರೈಲ್ವೆ ಸಹಾಯಕ ಲೋಕೋ ಪೈಲಟ್‌ ಸಾಹಸ ಮೆರೆದಿದ್ದಾರೆ.

ಶನಿವಾರ ಬೆಳಗ್ಗೆ 11ರ ಸುಮಾರಿಗೆ ಅಜ್ಮೇರ್-ಬೆಂಗಳೂರು ರೈಲು ಬೆಳಗಾವಿ ರೈಲು ನಿಲ್ದಾಣಕ್ಕೆ ಬಂದಿತ್ತು. ಕೆಲ ಸಮಯ ನಿಲ್ದಾಣದಲ್ಲಿ ನಿಂತಿತ್ತು. ಈ ವೇಳೆ ತಂದೆ-ಮಗಳು ನೀರು ತರಲು ಕೆಳಗಿಳಿದಿದ್ದರು. ನೀರು ತೆಗೆದುಕೊಂಡು ಹೋಗುವಷ್ಟರಲ್ಲಿಯೇ ರೈಲು ಚಲಿಸತೊಡಗಿದೆ. ಆಗ ತಂದೆ-ಮಗಳು ಬೆನ್ನತ್ತಿ ರೈಲು ಹತ್ತಲು ಯತ್ನಿಸಿ ಕೈ ಜಾರಿ ಕೆಳಗೆ ಬಿದ್ದಿದ್ದರು. ರೈಲಿನ ಚಕ್ರದಡಿ ಕಾಲು ಹೋಗಿತ್ತು. ತತ್‌ಕ್ಷಣ ಅಲ್ಲಿ ಕರ್ತವ್ಯದಲ್ಲಿದ್ದ ಸಹಾಯಕ ಲೋಕೋ ಪೈಲಟ್‌ ಅನಿರುದ್ಧ ಗೋಸ್ವಾಮಿ ಓಡಿ ಹೋಗಿ ತಂದೆ-ಮಗಳ ಕೈ ಹಿಡಿದು ಮೇಲಕ್ಕೆತ್ತಿ ಜೀವ ಉಳಿಸಿದ್ದಾರೆ. ಈ ವೇಳೆ ಅನಿರುದ್ಧ ಕಾಲಿಗೂ ಸ್ವಲ್ಪ ಗಾಯವಾಗಿದೆ. ತಮ್ಮ ಪ್ರಾಣದ ಹಂಗು ತೊರೆದು ಇಬ್ಬರ ಜೀವ ಉಳಿಸಿದ ಅನಿರುದ್ಧ ಸಾಹಸಕ್ಕೆ ಪ್ರಶಂಸೆ ವ್ಯಕ್ತವಾಗಿದೆ.