ಮಿಷನ್‌ ಶಕ್ತಿ ಶಿಷ್ಟಾಚಾರ ಹೊಣೆ ಅಜಿತ್‌ ದೋವಲ್‌ ಹೆಗಲಿಗೆ

ಹೊಸದಿಲ್ಲಿ: ಉಪಗ್ರಹ ನಿಗ್ರಹ ತಂತ್ರಜ್ಞಾನವನ್ನು (ಮಿಷನ್‌ ಶಕ್ತಿ) ಅಳವಡಿಸಿ ಕೊಂಡ ನಂತರ, ಆ ತಂತ್ರಜ್ಞಾನದ ಮೇಲೆ ತನ್ನದೇ ಆದ ಸ್ವಾತಂತ್ರ್ಯ ಹಾಗೂ ಅಧಿಕಾರವನ್ನು ಹೊಂದುವ ನಿಟ್ಟಿನಲ್ಲಿ ಪ್ರತ್ಯೇಕ ಶಿಷ್ಟಾಚಾರಗಳನ್ನು ರೂಪಿಸಲು ಭಾರತ ಮುಂದಾಗಿದೆ. ಇಂಥ ಶಿಷ್ಟಾಚಾರಗಳ ಅವಶ್ಯಕತೆ ಮನಗಂಡಿರುವ ಪ್ರಧಾನಿ ಮೋದಿ, ಈ ಮಹತ್ವದ ಜವಾಬ್ದಾರಿಯನ್ನು ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್‌ ದೋವಲ್‌ಗೆ ವಹಿಸಿದ್ದಾರೆ. ಶುಕ್ರವಾರ, ಡಿಆರ್‌ಡಿಒ ಮತ್ತು ವಿದೇಶಾಂಗ ಸಚಿವಾಲಯದ ಹಿರಿಯ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಿದ ಮೋದಿ, ಮಿಷನ್‌ ಶಕ್ತಿಗಾಗಿ ಹೊಸ ಶಿಷ್ಟಾಚಾರಗಳನ್ನು ರೂಪಿಸಬೇಕು ಹಾಗೂ ಈ ಶಿಷ್ಟಾಚಾರಗಳು ಭಾರತವೇ ಸ್ಥಾಪಿಸಿರುವ ಪರಮಾಣು ನಿರ್ವಹಣಾ ಪ್ರಾಧಿಕಾರದ ನಿಯಮಗಳಿಗೆ ಅನುಗುಣವಾಗಿರಬೇಕೆಂದು ಆಶಿಸಿದರೆಂದು ಹೇಳಲಾಗಿದೆ.