ಎ.ಜೆ.ಆಸ್ಪತ್ರೆ: ಅಪರೂಪದ ಶಸ್ತ್ರ ಚಿಕಿತ್ಸೆ

ಮಂಗಳೂರು, ಅ.21: ನಗರದ ಎ.ಜೆ. ಆಸ್ಪತ್ರೆಯ ವೈದ್ಯರು ಹಾವೇರಿ ಮೂಲದ ಮಹಿಳೆಯೊಬ್ಬರಿಗೆ ಅಪರೂಪದ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿ ಮಾನವೀಯತೆ ಮೆರೆದಿದ್ದಾರೆ. 55 ವರ್ಷದ ಮಹಿಳೆಯೊಬ್ಬರು ಹಸಿವಿಲ್ಲದಿರುವಿಕೆ ಹಾಗೂ ಹೊಟ್ಟೆ ಉಬ್ಬರಿಸುವಿಕೆಯ ಸಮಸ್ಯೆಯಿಂದ ಬಳಲುತ್ತಿದ್ದರು. ಅವರನ್ನು ಪರೀಕ್ಷಿಸಿದ ಎ.ಜೆ. ಆಸ್ಪತ್ರೆಯ ಪಚನಾಂಗವ್ಯೂಹ ವಿಭಾಗದ ಶಸ್ತ್ರಚಿಕಿತ್ಸಾ ತಜ್ಞ ಡಾ| ಅಶ್ವಿ‌ನ್‌ ಆಳ್ವ ಮತ್ತು ಡಾ| ರೋಹನ್‌ ಶೆಟ್ಟಿ ಅವರು ಮಹಿಳೆ ಹೊಟ್ಟೆಯಲ್ಲಿ ಗಡ್ಡೆ ಇರುವುದನ್ನು ಪತ್ತೆಹಚ್ಚಿ, ಸಿಟಿಸ್ಕ್ಯಾನ್‌ ಹಾಗೂ ಬಯಾಪ್ಸಿ ಮೂಲಕ ನರ ಅಂತಃಸ್ರಾವ (ನ್ಯೂರೋಎಂಡೋಕ್ರೈನ್‌) ಗಡ್ಡೆ ಎಂದು ಖಚಿತಪಡಿಸಿದರು. 

ಸುಮಾರು ಒಂದು ಕೆಜಿಯಷ್ಟು ತೂಕವಿದ್ದ ಈ ಅಪರೂಪದ ಗಡ್ಡೆಯನ್ನು ಡಾ | ಅಶ್ವಿ‌ನ್‌ ಆಳ್ವ, ಡಾ| ರೋಹನ್‌ ಶೆಟ್ಟಿ ಮತ್ತು ಅರಿವಳಿಕೆ ತಜ್ಞ ಡಾ| ತ್ರಿವಿಕ್ರಮ ತಂತ್ರಿ ತಂಡವು ಯಶಸ್ವಿಯಾಗಿ ಹೊರತೆಗೆದಿದೆ. ನರ ಅಂತಃಸ್ರಾವ ಗಡ್ಡೆಗಳು ಕಡಿಮೆ ಪ್ರಾಣಪಾಯವಿರುವ ಕ್ಯಾನ್ಸರ್‌ ಆಗಿದ್ದು, ಇವು ಹೊಟ್ಟೆ, ಕರುಳು, ಮೇದೋಜೀರಕ ಗ್ರಂಥಿ ಮತ್ತು ಯಕೃತ್ತಿನಂತಹ ವಿವಿಧ ಅಂಗಗಳಿಂದ ಹುಟ್ಟಿಕೊಳ್ಳುತ್ತವೆ. ಈ ರೀತಿಯ ಗಡ್ಡೆಯನ್ನು ತೆಗೆಯುವ ಮೂಲಕ ಕೀಮೊಥೆರಪಿ ಅಥವಾ ವಿಕಿರಣ ಚಿಕಿತ್ಸೆಯಂತಹ ಮತ್ತಷ್ಟು ಚಿಕಿತ್ಸೆ ಅಗತ್ಯವಿಲ್ಲದೆ ಸಂಪೂರ್ಣ ಗುಣಪಡಿಸಲಾಗುವುದು. 

ಇತರ ಕ್ಯಾನ್ಸರ್‌ ಗಡ್ಡೆಗಳಿಗೆ ಹೋಲಿಸಿದರೆ ಇಂತಹ ಅಪರೂಪ ಗಡ್ಡೆಗಳ ಪ್ರಮಾಣವು ಕೇವಲ ಶೇ.0.5ರಷ್ಟು ಇದ್ದು, ಯಾವುದೇ ಪ್ರಮುಖ ಲಕ್ಷಣಗಳನ್ನು ಹೊಂದಿಲ್ಲದಿರುವುದರಿಂದ ಅವುಗಳನ್ನು ಆರಂಭಿಕ ಹಂತದಲ್ಲಿ ಕಂಡು ಹಿಡಿಯಲು ಸಾಧ್ಯವಾಗುವುದಿಲ್ಲ