ಜನರ ಸಮಸ್ಯೆಗೆ ಸ್ಪಂದಿಸಿ : ಲೋಬೋ

ಸುರತ್ಕಲ್‌ : ಆರು ದಿನಗಳಿಂದ ಪ್ರತಿಭಟನೆ ನಡೆಯುತ್ತಿದ್ದರೂ ಸಂಸದರು ಆಗಮಿಸಿ ಅಹವಾಲು ಸ್ವೀಕರಿಸುವ ಮನಸ್ಸು ಮಾಡಿಲ್ಲ. ಹೋರಾಟಕ್ಕೆ ಮಾನವೀಯ ಸ್ಪಂದನೆ ನೀಡದಿದ್ದರೆ ಅಂಥವರು ಜನಪ್ರತಿನಿಧಿಗಳಾಗಿರುವುದು ಖೇದಕರ ಎಂದು ಮಾಜಿ ಶಾಸಕ ಜೆ.ಆರ್‌. ಲೋಬೋ ಹೇಳಿದರು.

ಸುರತ್ಕಲ್‌ನಲ್ಲಿ ನಡೆಯುತ್ತಿರುವ ಟೋಲ್‌ಗೇಟ್‌ ವಿರೋಧಿ  ಹೋರಾಟದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು. ಇಲ್ಲಿನ ಹೆದ್ದಾರಿ, ಮೇಲ್ಸೇತುವೆ, ಕೆಳ ರಸ್ತೆಗಳು ಕಳಪೆಯಾಗಿದೆ. ಬಿಕರ್ನಕಟ್ಟೆ ಹೆದ್ದಾರಿಯ ಮೇಲ್ಸೇತುವೆ ಸಮೀಪ ಮೂಡಬಿದಿರೆಗೆ ಸಾಗುವ ರಸ್ತೆ ಗ್ರಾಮೀಣ ರಸ್ತೆಗಿಂತಲೂ ಕೆಟ್ಟದಾಗಿದೆ. ಇಡೀ ದೇಶದಲ್ಲಿ ಏಕಮುಖ ಮೇಲ್ಸೇತುವೆ ಇದ್ದರೆ ಬಹುಶಃ ಅದು ಜಿಲ್ಲೆಯಲ್ಲಿ ಮಾತ್ರ. ಗುತ್ತಿಗೆದಾರರ ಹೊಟ್ಟೆ ತುಂಬಿಸಲು ಟೋಲ್‌ಗ‌ಳು ಬೇಕಾಗಿಲ್ಲ ಎಂದರು.

ಸಂಸದರಾಗಿ ಒಂದು ಟೋಲ್‌ ಕೇಂದ್ರ ತೆಗೆಸಲು ಸಾಧ್ಯವಿಲ್ಲ ಎಂದ ಮೇಲೆ ಇವರ ಸಾಮರ್ಥ್ಯ ಇಷ್ಟೇ ಎಂದು ತಿಳಿದುಕೊಳ್ಳುವಂತಾಗಿದೆ. ಕಳಪೆ ಹೆದ್ದಾರಿ ನಿರ್ಮಾಣದಿಂದಾಗಿ ನಿತ್ಯ ಹಲವು ಮಂದಿಯ ಪ್ರಾಣ ಹಾನಿ ಮಾಡುತ್ತಿರುವ ಈ ರಸ್ತೆಗೆ ಟೋಲ್‌ ಕಟ್ಟಬೇಕಾಗಿಲ್ಲ. ನ. 1ರ ಬಳಿಕವೂ ಈ ಟೋಲ್‌ ಕೇಂದ್ರ ಮುಂದುವರಿದಲ್ಲಿ ಮುಂದಿನ ಉಗ್ರ ಹೋರಾಟಕ್ಕೆ ಸಂಸದರು ಹೊಣೆಯಾಗುತ್ತಾರೆ ಎಂದು ಮಿಥುನ್‌ ರೈ ಎಚ್ಚರಿಸಿದರು.

ಮಾಜಿ ಶಾಸಕ ವಿಜಯ್‌ಕುಮಾರ್‌ ಶೆಟ್ಟಿ, ಮಂಗಳೂರು ಉತ್ತರ ಯುವ ಕಾಂಗ್ರೆಸ್‌ ಅಧ್ಯಕ್ಷ ಗಿರೀಶ್‌ ಆಳ್ವ, ಯುವ ಕಾಂಗ್ರೆಸ್‌ ಮುಖಂಡ ಉತ್ತಮ್‌ ಆಳ್ವ, ಹಬೀಬ್‌ ಕಾಟಿಪಳ್ಳ, ವಿವಿಧ ಸಂಘಟನೆಗಳ ಮುಖಂಡರು, ರಾಜಕೀಯ ಪಕ್ಷಗಳ ಮುಖಂಡರು, ಕಾರ್ಮಿಕ ಸಂಘಟನೆಗಳ ನಾಯಕರು ಭಾಗವಹಿಸಿದ್ದರು.

ಅಲ್ಲಿ ಕೇಂದ್ರಕ್ಕೆ ಪತ್ರ, ಇಲ್ಲಿ ಗುತ್ತಿಗೆ: ಮಿಥುನ್‌ ರೈ ವ್ಯಂಗ್ಯ
ಜಿಲ್ಲಾ ಯುವ ಕಾಂಗ್ರೆಸ್‌ ಅಧ್ಯಕ್ಷ ಮಿಥುನ್‌ ರೈ ಮಾತ ನಾಡಿ, ಸಂಸದರು ಅಸಹಾಯಕತೆ ವ್ಯಕ್ತ ಪಡಿಸಿ ಕೇಂದ್ರಕ್ಕೆ ಪತ್ರ ಬರೆದಿದ್ದೇನೆ ಎಂದು ಹೇಳಿದ್ದಾರೆ. ಇದೇ ಸಂದರ್ಭ ಇತ್ತ ಕಡೆ ಗುತ್ತಿಗೆ ನೀಡಲು ಮೌನ ಸಮ್ಮತಿ ವ್ಯಕ್ತಪಡಿಸಿದ್ದಾರೆ. ಇದು ಒಂದು ಕಣ್ಣಿಗೆ ಬೆಣ್ಣೆ ಇನ್ನೊಂದು ಕಣ್ಣಿಗೆ ಸುಣ್ಣ ಎಂಬಂತೆ ವರ್ತಿಸುತ್ತಿದ್ದಾರೆ. ಭಾಷಾ ಜ್ಞಾನದ ಕೊರತೆಯಿಂದ ಯಾವ ಭಾಷೆಯಲ್ಲಿ ಪತ್ರ ಬರೆದಿದ್ದಾರೆ ಎಂಬುದು ತಿಳಿದಿಲ್ಲ. ಕೇಂದ್ರ ಹೆದ್ದಾರಿ ಸಚಿವ ನಿತಿನ್‌ ಗಡ್ಕರಿಯವರಿಗೆ ಕನ್ನಡ ಓದಲು ತಿಳಿದಿಲ್ಲ. ಹೀಗಾಗಿ ನೇರವಾಗಿ ಮಾಡುವ ಕೆಲಸವನ್ನು ಪತ್ರ ಬರೆದು ವಿಳಂಬಿಸುತ್ತಿದ್ದಾರೆ. ಇದು ಒಂದು ನಾಟಕ ಎಂದು ಆರೋಪಿಸಿದರು.