ಮಲೆಯಲ್ಲಿ ಇನ್ನಷ್ಟು ಮಹಿಳಾ ಶೌಚಾಲಯ

ತಿರುವನಂತಪುರ: ಶಬರಿಮಲೆ ಅಯ್ಯಪ್ಪ ದೇಗುಲಕ್ಕೆ ಮಹಿಳೆಯರ ಪ್ರವೇಶಕ್ಕೆ ಅವಕಾಶ ಕಲ್ಪಿಸಿ ಸುಪ್ರೀಂಕೋರ್ಟ್‌ ತೀರ್ಪು ನೀಡಿದ ಬೆನ್ನಲ್ಲೇ ದೇವಾಲಯದ ಸಂಕೀರ್ಣದಲ್ಲಿ ಸದ್ಯದಲ್ಲೇ ಮಹಿಳೆಯರಿಗೆ ಶೌಚಾಲಯ ವ್ಯವಸ್ಥೆ ಕಲ್ಪಿಸುವುದಾಗಿ ತಿರುವಾಂಕೂರು ದೇವಸ್ವಂ ಮಂಡಳಿ (ಟಿಡಿಬಿ) ಅಧ್ಯಕ್ಷ ಎ. ಪದ್ಮಕುಮಾರ್‌ ಹೇಳಿದ್ದಾರೆ. ಈ ಕುರಿತು ಈಗಾಗಲೇ ಸಿಎಂ ಪಿಣರಾಯಿ ವಿಜಯನ್‌ರೊಂದಿಗೆ ಮಾತುಕತೆ ನಡೆಸಿದ್ದು, ಶೀಘ್ರವೇ ನಿಲಕ್ಕಲ್‌ನಲ್ಲಿ ಶೌಚಾಲಯ ನಿರ್ಮಾಣದ ಕೆಲಸಗಳನ್ನು ಆರಂಭಿಸಲಿದ್ದೇವೆ ಎಂದು ಅವರು ತಿಳಿಸಿದ್ದಾರೆ. ಸನ್ನಿಧಾನಂವರೆಗೆ ಇರುವ 6.5 ಕಿ.ಮೀ. ವ್ಯಾಪ್ತಿಯಲ್ಲಿ 20ಕ್ಕೂ ಹೆಚ್ಚು ಪುರುಷರ ಶೌಚಾಲಯಗಳಿದ್ದು, ಮಹಿಳೆಯರಿಗೆಂದು 6 ಶೌಚಾಲಯ ಇದ್ದವು. ಇನ್ನು ಈ ಸಂಖ್ಯೆ ಹೆಚ್ಚಿಸಲಾಗುವುದು ಎಂದಿದ್ದಾರೆ.

ಇದೇ ವೇಳೆ, ಸುಪ್ರೀಂಗೆ ಮರುಪರಿಶೀಲನೆ ಅರ್ಜಿ ಸಲ್ಲಿಸುವ ಕುರಿತು ಬುಧವಾರ ಚರ್ಚಿಸಿ ನಿರ್ಧರಿಸಲಾಗುವುದು ಎಂದೂ ಅವರು ಹೇಳಿದ್ದಾರೆ. ಅಲ್ಲದೆ, ಅಯ್ಯಪ್ಪನ ನೈಜ ಮಹಿಳಾ ಭಕ್ತರು ಶಬರಿಮಲೆಗೆ ಬರುವ ಸಾಧ್ಯತೆಗಳಿಲ್ಲ, ಕೇವಲ ಹೋರಾಟಗಾರರಷ್ಟೇ ಬರುವ ಸಾಧ್ಯತೆಯಿದೆ ಎಂದೂ ಅವರು ಹೇಳಿದ್ದಾರೆ.