ಸೌಂದರ್ಯ ರಾಣಿಯನ್ನು ಕೊಂದ 60 ವರ್ಷ ಬಳಿಕ ಪಾದ್ರಿಗೆ ಜೀವಾವಧಿ

ಸ್ಯಾನ್‌ ಅಂಟಾನಿಯೋ : 60 ವರ್ಷಗಳ ಹಿಂದೆ ತನ್ನ ಬಳಿ ಪಾಪ ನಿವೇದನೆಗಾಗಿ ಬಂದಿದ್ದ ಓರ್ವ ಮಾಜಿ ಸೌಂದರ್ಯ ರಾಣಿ ಯನ್ನು ಕೊಲೆಗೈದ ಅಪರಾಧಕ್ಕಾಗಿ 87ರ ಹರೆಯದ ನಿವೃತ್ತ ಕ್ಯಾಥೋಲಿಕ್‌ ಪ್ರೀಸ್ಟ್‌ ಗೆ ದಕ್ಷಿಣ ಟೆಕ್ಸಾಸ್‌ನ ನ್ಯಾಯಾಧೀಶರು ಜೀವಾವಧಿ ಜೈಲು ಶಿಕ್ಷೆ ವಿಧಿಸಿದ್ದಾರೆ.

ಪಾದ್ರಿ ಜಾನ್‌ ಫೀಟ್‌ ಅವರು ಈ ಕೊಲೆ ನಡೆಸಿದ್ದಾಗ 27ರ ಹರೆಯದ ತರುಣರಾಗಿದ್ದರು. ಕೊಲೆಗೀಡಾಗಿದ್ದ ಸೌಂದರ್ಯ ರಾಣಿ ಐರೀನ್‌ ಗಾರ್ಜಾ 25ರ ಹರೆಯದವಳಾಗಿದ್ದಳು. 1960ರ ಆ ದಿನಗಳಲ್ಲಿ  ಪಾದ್ರಿ ಜಾನ್‌ ಫೀಟ್‌,  ಟೆಕ್ಸಾಸ್‌ನ ಮೆಕಾಲೆನ್‌ ನಲ್ಲಿ ಸಂದರ್ಶಕ ಪಾದ್ರಿಯಾಗಿದ್ದರು. ಪವಿತ್ರ ಸಪ್ತಾಹದ ಒಂದು ದಿನ ಐರೀನ್‌ ಗಾರ್ಜಾ ಪಾಪ ನಿವೇದನೆಗಾಗಿ ಚರ್ಚಿಗೆ ಬಂದಿದ್ದಳು. ಆಗ ಪಾದ್ರಿ ಜಾನ್‌ ಫೀಟ್‌ ಅವರು ಪಾಪ ನಿವೇದನ ಕಾರ್ಯಕ್ರಮವನ್ನು ನಡೆಸಿಕೊಡತ್ತಿದ್ದರು. ಆಗಲೇ ಗಾರ್ಜಾಳೊಂದಿಗೆ ಸಂಪರ್ಕ ಬೆಳೆಸಿಕೊಂಡ ಪಾದ್ರಿ ಫೀಟ್‌ ಆಕೆಯನ್ನು ಕೊಂದು ಮುಗಿಸಿದರು. 

ಈ ಕೊಲೆ ಕೃತ್ಯ ನಡೆದ 60 ವರ್ಷಗಳ ತರುವಾಯ ಅಪರಾಧ ಸಾಬೀತಾಗಿ ಆರೋಪಿ ಪಾದ್ರಿಯು ದೋಷಿ ಎಂದು ನಿರ್ಧಾರವಾದದ್ದು ಮೊನ್ನೆ ಗುರುವಾರ. ಅಂದು ಟೆಕ್ಸಾಸ್‌ ನ್ಯಾಯಾಲಯ, ಈಗ 87ರ ಹರೆಯದವರಾಗಿರುವ ಆರೋಪಿ ಪಾದ್ರಿ ಜಾನ್‌ ಫೀಟ್‌ ಅವರನ್ನು ಕೊಲೆ ಅಪರಾಧಿ ಎಂದು ಘೋಷಿಸಿತ್ತು. ನಿನ್ನೆ ಶುಕ್ರವಾರ ಅವರಿಗೆ ನ್ಯಾಯಾಲಯ ಜೀವಾವಧಿ ಜೈಲು ಶಿಕ್ಷೆಯನ್ನು ಪ್ರಕಟಿಸಿತು.

ಪಾದ್ರಿ ಹುದ್ದೆಯಿಂದ ನಿವೃತ್ತರಾದ ಬಳಿಕ ಫೀಟ್‌ ಅವರು ಅರಿಜೋನಾದಲ್ಲಿನ ವಿಶ್ರಾಂತಿ ಗೃಹದಲ್ಲಿ ವಾಸಿಸಿಕೊಂಡಿದ್ದರು. ಅವರ ವಿರುದ್ಧ ದೋಷಾರೋಪ ದಾಖಲಾದೊಡನೆಯೇ ಅವರನ್ನು ಟೆಕ್ಸಾಸ್‌ಗೆ ಗಡೀಪಾರು ಮಾಡಿಸಿಕೊಳ್ಳಲಾಯಿತು. 

ಗಾರ್ಜಾಳನ್ನು ತಾನು ಕೊಂದದ್ದು ಹೌದೆಂದು ಪಾದ್ರಿ ಫೀಟ್‌ ನನ್ನಲ್ಲಿ ತಪ್ಪೊಪ್ಪಿಕೊಂಡಿದ್ದರು ಎಂದು ಮಿಸೋರಿ ಮೊನಾಸ್ಟರಿಯಿಂದ ಸಾಕ್ಷ್ಯ ನುಡಿಯಲು ಬಂದಿದ್ದ ನಿವೃತ್ತ  ಟ್ರ್ಯಾಪಿಸ್ಟ್‌ ಸನ್ಯಾಸಿಯೊಬ್ಬರು ನ್ಯಾಯಾಲಯದಲ್ಲಿ ಹೇಳಿದ್ದರು. 

ಪಾದ್ರಿ ಫೀಟ್‌ ಅವರು ಗಾರ್ಜಾಳ ಕೊಲೆ ಮಾಡಿದ್ದ ಸಂದರ್ಭದಲ್ಲಿ ಟೆಕ್ಸಾಸ್‌ನ ಕ್ರೈಸ್ತ ಸಮುದಾಯ ತುಂಬಾ ವಿಚಲಿತವಾಗಿತ್ತು. ಆಗ ಜಾನ್‌ ಎಫ್ ಕೆನಡಿ ಅವರು ಅಮೆರಿಕ ಅಧ್ಯಕ್ಷೀಯ ಚುನಾವಣಾ ಕಣದಲ್ಲಿದ್ದರು. ಕೆನಡಿ ಅವರು ಕ್ರೈಸ್ತ ಮತಸ್ಥರಾಗಿರುವುದರಿಂದ ಅವರಿಗೆ ಕ್ರೈಸ್ತ ಪಾದ್ರಿ ಫೀಟ್‌ ನಡೆಸಿದ ಗಾರ್ಜಾ ಕೊಲೆಯ ಕಳಂಕ ತಟ್ಟದಿರಲೆಂಬ ಕಾರಣಕ್ಕೆ ಗಾರ್ಜಾಳ ಕೊಲೆಯನ್ನು ಮುಚ್ಚಿ ಹಾಕುವ ಹುನ್ನಾರವೂ ನಡೆದಿತು. 

ಈಗ 60 ವರ್ಷಗಳ ತರುವಾಯ ಕೊಲೆಗಾರ ಪಾದ್ರಿ ಫೀಟ್‌ನ ಅಪರಾಧ ಸಾಬೀತಾಗಿ, 87ರ ಹರೆಯದಲ್ಲಿರುವ ಆತನಿಗೆ ಜೀವಾವಧಿ ಜೈಲು ಶಿಕ್ಷೆಯಾಗಿರುವುದು ಕಾನೂನು ಕೈಗಳು ಎಷ್ಟು ಉದ್ದ ಎಂಬುದು ಅಮೆರಿಕದ ನ್ಯಾಯಾಂಗ ಚರಿತ್ರೆಯಲ್ಲಿ ದಾಖಲಾಗುವಂತಾಯಿತು.