ವಿರಾಟ್‌ ಕೊಹ್ಲಿ  ಹಿಂದಿಕ್ಕಿದ ಮೊಹಮ್ಮದ್‌ ಶಾಜಾದ್‌

ಗ್ರೇಟರ್‌ ನೋಯ್ಡಾ: ಅಫ್ಘಾನಿಸ್ಥಾನದ ಸ್ಫೋಟಕ ಬ್ಯಾಟ್ಸ್‌ಮನ್‌ ಮೊಹಮ್ಮದ್‌ ಶಾಜಾದ್‌ ಅವರು ಟ್ವೆಂಟಿ-20 ಕ್ರಿಕೆಟ್‌ನ ಗರಿಷ್ಠ ರನ್‌ಗಳಿಸಿದವರ ಪಟ್ಟಿಯಲ್ಲಿ ಭಾರತ ತಂಡದ ನಾಯಕ ವಿರಾಟ್‌ ಕೊಹ್ಲಿ ಅವರನ್ನು ಹಿಂದಿಕ್ಕಿದ್ದಾರೆ.

ರವಿವಾರ ನಡೆದ ಅಯರ್‌ಲ್ಯಾಂಡ್‌ ವಿರುದ್ಧದ ಪಂದ್ಯದಲ್ಲಿ ಶಾಜಾದ್‌ ಅವರು ಈ ಸಾಧನೆಗೈದರು. ಕೊಹ್ಲಿ ಅವರನ್ನು ಹಿಂದಿಕ್ಕಿದ ಶಾಜಾದ್‌ ಗರಿಷ್ಠ ರನ್‌ ಗಳಿಸಿದವರಲ್ಲಿ ನಾಲ್ಕನೇ ಸ್ಥಾನ ಪಡೆದರು. 58 ಪಂದ್ಯ ವನ್ನಾಡಿದ ಶಾಜಾದ್‌ 1779 ರನ್‌ ಗಳಿಸಿದ್ದಾರೆ. ಕೊಹ್ಲಿ ಅವರಿಗಿಂತ 70 ರನ್‌ ಮುನ್ನಡೆಯಲ್ಲಿದ್ದಾರೆ. 48 ಪಂದ್ಯವನ್ನಾಡಿರುವ ಕೊಹ್ಲಿ 1709 ರನ್‌ ಗಳಿಸಿದ್ದು ಐದನೇ ಸ್ಥಾನದಲ್ಲಿದ್ದಾರೆ. 

ಟ್ವೆಂಟಿ-20 ಕ್ರಿಕೆಟ್‌ನ ಐಸಿಸಿ ರ್‍ಯಾಂಕಿಂಗ್‌ನ ಬ್ಯಾಟ್ಸ್‌ಮನ್‌ ಯಾದಿಯಲ್ಲಿ ಶಾಜಾದ್‌ ಏಳನೇ ಸ್ಥಾನದಲ್ಲಿದ್ದಾರೆ. 29ರ ಹರೆಯದ ಶಾಜಾದ್‌ ಅಯರ್‌ಲ್ಯಾಂಡ್‌ ವಿರುದ್ಧದ ಸರಣಿಯಲ್ಲಿ 123 ರನ್‌ ಗಳಿಸಿದ್ದು ಎರಡನೇ ಗರಿಷ್ಠ ರನ್‌ ಗಳಿಸಿದ ಆಟಗಾರ ಎಂದೆನಿಸಿಕೊಂಡಿದ್ದಾರೆ. ಮೊಹಮ್ಮದ್‌ ನಬಿ (124) ಗರಿಷ್ಠ ರನ್‌ ಗಳಿಸಿದ ಆಟಗಾರ ಆಗಿದ್ದಾರೆ.