Adani ಈಗ ಏಷ್ಯಾದ ನಂ.1 ಸಿರಿವಂತ-  ಶ್ರೀಮಂತಿಕೆಯಲ್ಲಿ ಅಂಬಾನಿ ಹಿಂದಿಕ್ಕಿದ ಅದಾನಿ

ಹೊಸದಿಲ್ಲಿ: ರಿಲಯನ್ಸ್‌ ಇಂಡಸ್ಟ್ರೀಸ್‌ನ ಮುಕೇಶ್‌ ಅಂಬಾನಿ ಅವರನ್ನು ಹಿಂದಿಕ್ಕಿ ಅದಾನಿ ಗ್ರೂಪ್‌ನ ಅಧ್ಯಕ್ಷ ಗೌತಮ್‌ ಅದಾನಿ ಏಷ್ಯಾದ ನಂಬರ್‌ 1 ಶ್ರೀಮಂತರಾಗಿ ಹೊರ­ಹೊಮ್ಮಿದ್ದಾರೆ. ಹಿಂಡನ್‌ಬರ್ಗ್‌ ವರದಿ ವಿಚಾರದಲ್ಲಿ ಸುಪ್ರೀಂ ಕೋರ್ಟ್‌ನಿಂದ ಅದಾನಿಗೆ ರಿಲೀಫ್ ಸಿಕ್ಕ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.

ಬ್ಲೂಮ್‌ಬರ್ಗ್‌ ಜಾಗತಿಕ ಶ್ರೀಮಂತರ ಪಟ್ಟಿ ಬಿಡುಗಡೆಯಾಗಿದ್ದು, ಅದರ ಪ್ರಕಾರ ಅದಾನಿ ಅವರ ಒಟ್ಟು ಆಸ್ತಿ ಮೌಲ್ಯ 97.6 ಬಿಲಿಯನ್‌ ಡಾಲರ್‌(8.12 ಲಕ್ಷ ಕೋಟಿ ರೂ.) ಇದೆ. ವಿಶ್ವದ ಶ್ರೀಮಂತರ ಸಾಲಿ­ನಲ್ಲಿ ಅದಾನಿ ಅವರು 12ನೇ ಸ್ಥಾನದಲ್ಲಿ­ದ್ದಾರೆ. ಮುಕೇಶ್‌ ಅಂಬಾನಿ ಅವರ ಒಟ್ಟು ಆಸ್ತಿ ಮೌಲ್ಯ 97 ಬಿಲಿಯನ್‌ ಡಾಲರ್‌(8.06 ಲಕ್ಷ ಕೋಟಿ ರೂ.) ಇದ್ದು, ವಿಶ್ವದ ಶ್ರೀಮಂತರ ಪಟ್ಟಿಯಲ್ಲಿ 13ನೇ ಸ್ಥಾನದಲ್ಲಿದ್ದಾರೆ. ಅಲ್ಲದೇ ಏಷ್ಯಾದ ಎರಡನೇ ಅತೀ ದೊಡ್ಡ ಶ್ರೀಮಂತರಾಗಿದ್ದಾರೆ. ಟೆಸ್ಲಾ ಮಾಲಕ ಎಲಾನ್‌ ಮಾಸ್ಕ್ ವಿಶ್ವದ ಅಗ್ರ ಶ್ರೀಮಂತರಾಗಿದ್ದಾರೆ. ಹಿಂಡನ್‌ಬರ್ಗ್‌ ವರದಿ ಪ್ರಕಟವಾದ ಅನಂತರ 2023ರ ಜನವರಿಯಲ್ಲಿ ಅದಾನಿ ಅವರು ತಮ್ಮ ಆಸ್ತಿ ಮೌಲ್ಯದಲ್ಲಿ ಶೇ.34ರಷ್ಟು ಕಳೆದುಕೊಂಡಿದ್ದರು. ಕಳೆದ ಒಂದು ವರ್ಷದಲ್ಲಿ ಅವರ ಆದಾಯದಲ್ಲಿ ಚೇತರಿಕೆ ಕಂಡಿದೆ. ಜಾಗತಿಕ ಶ್ರೀಮಂತರ ಟಾಪ್‌ 50 ಪಟ್ಟಿ ಯಲ್ಲಿ ಭಾರತೀಯರಾದ ಉದ್ಯಮಿ ಮಿಸ್ತ್ರಿ 38ನೇ ಸ್ಥಾನದಲ್ಲಿದ್ದು, ಎಚ್‌ಸಿಎಲ್‌ ಅಧ್ಯಕ್ಷ ನಾಡರ್‌ 45ನೇ ಸ್ಥಾನದಲ್ಲಿದ್ದಾರೆ.