ಕೊಚ್ಚಿ: ಮಾಲಿವುಡ್‌ ಸೂಪರ್‌ ಸ್ಟಾರ್‌ ಮಮ್ಮುಟ್ಟಿ ಅವರ ಕುಟುಂಬ ಮತ್ತೆ ದುಃಖದ ಕಡಲಲ್ಲಿ ಮುಳುಗಿದೆ. ನಟ ಮಮ್ಮುಟ್ಟಿ ಅವರ ತಂಗಿ ಅಮೀನಾ (70) ನಿಧನರಾಗಿದ್ದಾರೆ.
ಅಮೀನಾ (ನಸೀಮಾ ಎಂದು ಕರೆಯಲಾಗುತ್ತಿತ್ತು) ಅವರು ಕಳೆದ ಕೆಲ ಸಮಯದಿಂದ ಅನಾರೋಗ್ಯ ಕಾರಣದಿಂದ ಚಿಕಿತ್ಸೆ ಪಡೆಯುತ್ತಿದ್ದರು ಎನ್ನಲಾಗಿದೆ. ಇವರು ಕಂಜಿರಪಳ್ಳಿ ಪರಯ್ಕ್ಕಲ್ ಕುಟುಂಬದ ದಿವಂಗತ ಪಿ ಎಂ ಸಲೀಂ ಅವರ ಪತ್ನಿ.
ಇತ್ತೀಚೆಗೆ ಮಮ್ಮುಟ್ಟಿ(ಸೆ.7 ರಂದು) ತನ್ನ 72ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದರು. ಈ ಸಂತೋಷ ಇರುವಾಗಲೇ ಅವರ ಕುಟುಂಬಕ್ಕೆ ಮತ್ತೊಂದು ಆಘಾತಕಾರಿ ಪರಿಸ್ಥಿತಿ ಎದುರುರಾಗಿದೆ.
ಅಮೀನಾ ಮಮ್ಮುಟ್ಟಿಯ ಕಿರಿಯ ಸಹೋದರಿ ಆಗಿದ್ದರು. ಅಮೀನಾ ಅವರು ಒಡಹುಟ್ಟಿದವರಾದ ಮಮ್ಮುಟ್ಟಿ, ಇಬ್ರಾಹಿಂ ಕುಟ್ಟಿ, ಝಕರಿಯಾ ಪಾನಪರಂಬಿಲ್, ಸೌದಾ, ಮತ್ತು ಶಫೀನಾ ಅವರನ್ನು ಅಗಲಿದ್ದಾರೆ. ಅಮೀನಾ ಅವರು ಮಕ್ಕಳಾದ ಜಿಬಿನ್ ಸಲೀಂ, ಜೂಲಿ ಮತ್ತು ಜುಬಿ ಅವರನ್ನು ಅಗಲಿದ್ದಾರೆ.
ಇವರ ಅಂತಿಮ ವಿಧಿವಿಧಾನಗಳು ಬುಧವಾರ (ಸೆ.13) ನಡೆಯಲಿದೆ ಎಂದು ವರದಿ ತಿಳಿಸಿದೆ.
2023 ರ ಸೂಪರ್‌ ಸ್ಟಾರ್‌ ಮಮ್ಮುಟ್ಟಿ ಅವರ ಕುಟುಂಬಕ್ಕೆ ದುಃಖದಾಯಕ ವರ್ಷವಾಗಿದೆ ಎಂದರೆ ತಪ್ಪಾಗದು. ಇದೇ ವರ್ಷ ಮಮ್ಮುಟ್ಟಿ ಅವರ ತಾಯಿ ಫಾತಿಮಾ ಇಸ್ಮಾಯಿಲ್ (93) ಅವರು ನಿಧನರಾಗಿದ್ದರು.
