ಫಿರ್‌ ಹೇರಾ ಫೆರಿ ಖ್ಯಾತಿಯ ನಿರ್ದೇಶಕ ನೀರಜ್‌ ವೋರಾ ವಿಧಿವಶ 

ಮುಂಬಯಿ : ‘ಫಿರ್‌ ಹೇರಾ ಫೆರಿ’ ಖ್ಯಾತಿಯ ಬಾಲಿವುಡ್‌ ನಿರ್ದೇಶಕ, ನಟ ಮತ್ತು ಬರಹಕಾರ ನೀರಜ್‌ ವೋರಾ ಅವರು ಗುರುವಾರ ನಸುಕಿನ 4 ಗಂಟೆಯ ವೇಳೆಗೆ ನಗರದ ಕೃತಿ ಕೇರ್‌ ಆಸ್ಪತ್ರೆಯಲ್ಲಿ ಬಹು ಅಂಗಾಂಗ ವೈಫ‌ಲ್ಯದಿಂದ ಕೊನೆಯುಸಿರೆಳೆದಿದ್ದಾರೆ. ಅವರಿಗೆ 54 ವರ್ಷ ವಯಸ್ಸಾಗಿತ್ತು.

2016 ರ ಅಕ್ಟೋಬರ್‌ನಲ್ಲಿ ತೀವ್ರ ಹೃದಯಾಘಾತ ಮತ್ತು ಲಕ್ವಾ ಪೀಡಿತರಾಗಿದ್ದ ವೋರಾ ಅವರು ಕಳೆದ ನಾಲ್ಕು ದಿನಗಳಿಂದ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು.

ವೋರಾ ನಿಧನದ ಸುದ್ದಿಯನ್ನು ಅವರ ಆಪ್ತ ನಟ ಪರೇಶ್‌ ರಾವಲ್‌ ಅವರು ಟ್ವೀಟ್‌ನಲ್ಲಿ ಖಚಿತ ಪಡಿಸಿದ್ದಾರೆ. 

ವೋರಾ ಅಂತ್ಯಕ್ರಿಯೆಯನ್ನು ಇಂದು ಅಂತಿಮ ದರ್ಶನದ ಬಳಿಕ 3 ಗಂಟೆಯ ವೇಳೆಗೆ ಸಾಂತಾ ಕ್ರೂಜ್‌ ಪಶ್ಚಿಮದ ರುದ್ರ ಭೂಮಿಯಲ್ಲಿ ನಡೆಸಲಾಗುತ್ತಿದೆ.