ಮುಂಬಯಿ: ಇತ್ತೀಚೆಗೆ ನಿಶ್ಚಿತಾರ್ಥವಾಗಿದ್ದ ತಜಕಿಸ್ತಾನಿ ಗಾಯಕ, ಸೋಶಿಯಲ್‌ ಮೀಡಿಯಾ ಪ್ರಭಾವಿ, ಬಿಗ್‌ ಬಾಸ್ 16 (Bigg Boss) ಖ್ಯಾತಿಯ ಅಬ್ದು ರೋಝಿಕ್ (Abdu Rozik) ಅವರ ವಿವಾಹ ಮುರಿದು ಬಿದ್ದಿದೆ.
ಇದೇ ವರ್ಷದ ಏ.24 ರಂದು ಅಬ್ದು ರೋಝಿಕ್ ಎಮಿರಾಟಿ(ದುಬೈ) ಮೂಲದ 19 ವರ್ಷದ ಅಮೀರಾ ಅವರೊಂದಿಗೆ ಶಾರ್ಜಾದಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿರುವ ಫೋಟೋವನ್ನು ಹಂಚಿಕೊಂಡಿದ್ದರು. ಜುಲೈ7ರಂದು ತಾವು ವಿವಾಹವಾಗುವುದಾಗಿ ಘೋಷಿಸಿದ್ದರು.
“ಜೀವನದಲ್ಲಿ ನಾನು ಕೂಡ ಪ್ರೀತಿಯನ್ನು ಪಡೆಯುವ ಅದೃಷ್ಟಶಾಲಿ ಆಗುತ್ತೇನೆ ಎಂದು ಯಾವತ್ತೂ ಊಹಿಸಿರಲಿಲ್ಲ. ಜುಲೈ 7 ರ ದಿನಾಂಕವನ್ನು ನೆನಪು ಇಟ್ಟುಕೊಳ್ಳಿ” ಎಂದು ಅಬ್ದು ಹೇಳಿದ್ದರು.
ಆದರೆ ಇದೀಗ ತಮ್ಮ ಮದುವೆ ರದ್ದಾಗಿದ ಎಂದು ಅಬ್ದು ಹೇಳಿದ್ದಾರೆ. ಇ ಟೈಮ್ಸ್ ಜೊತೆ ಮಾತನಾಡಿರುವ ಅವರು, “ನಾನು ನನ್ನ ಮದುವೆಯನ್ನು ರದ್ದುಗೊಳಿಸಿದ್ದೇನೆ ಎಂದು ಘೋಷಿಸಲು ನನಗೆ ದುಃಖವಾಗಿದೆ. ನಿಶ್ಚಿತಾರ್ಥದ ಬಳಿಕ ನಮ್ಮಿಬ್ಬರ ನಡುವೆ ಕೆಲವು ಸಾಂಸ್ಕೃತಿಕ ವ್ಯತ್ಯಾಸಗಳಿರುವುದು ಸ್ಪಷ್ಟವಾಯಿತು. ಆ ಕಾರಣದಿಂದ ಈ ನಿರ್ಧಾರಕ್ಕೆ ಬರಲಾಗಿದೆ. ನಿಮಗೆಲ್ಲರಿಗೂ ತಿಳಿದಿರುವಂತೆ ನಾನು ನನ್ನ ದೈನಂದಿನ ಜೀವನದಲ್ಲಿ ಅನೇಕ ಸವಾಲುಗಳನ್ನು ಹೊಂದಿದ್ದೇನೆ. ಅದನ್ನು ನಿಭಾಯಿಸಲು ಸಮರ್ಥರಾಗಿರುವ ಮತ್ತು ಮಾನಸಿಕವಾಗಿ ಬೆಂಬಲಿಸುವ ಸಂಗಾತಿಯ ಅಗತ್ಯವಿದೆ” ಎಂದು ಅಬ್ದು ಹೇಳಿದ್ದಾರೆ.
“ನನ್ನ ಆರೋಗ್ಯಕ್ಕಾಗಿ ನಾನು ಎಂದೆಂದಿಗೂ ಕೃತಜ್ಞನಾಗಿದ್ದೇನೆ. ನನ್ನೊಂದಿಗಿರುವ ಸ್ನೇಹವನ್ನು ಮತ್ತು ಸಂಬಂಧವನ್ನು ನಾನು ಶಾಶ್ವತವಾಗಿ ಪಾಲಿಸುತ್ತೇನೆ. ಭವಿಷ್ಯದಲ್ಲಿ ನಾನು ಮತ್ತೆ ಪ್ರೀತಿಯನ್ನು ಕಂಡುಕೊಳ್ಳುತ್ತೇನೆ ಮತ್ತು ನಿಮ್ಮೆಲ್ಲರ ಶುಭ ಹಾರೈಕೆಗಳಿಗಾಗಿ ಆಶಿಸುತ್ತೇನೆ” ಅವರು ಹೇಳಿದ್ದಾರೆ.
ಬಿಗ್‌ ಬಾಸ್ 16 ನಲ್ಲಿ ಸ್ಪರ್ಧಿಯಾಗಿ ಭಾಗಿಯಾದ ಬಳಿಕ ಭಾರತದಲ್ಲಿ ಅಬ್ದು ಅಪಾರ ಅಭಿಮಾನಿಗಳ ಬಳಗವನ್ನು ಹೊಂದಿದ್ದಾರೆ. ಅವರ ಹಾಡುಗಳು ವೇಗವಾಗಿ ವೈರಲ್ ಆಗಿವೆ. ಉದ್ಯಮದಲ್ಲೂ ಅವರು ಗುರುತಿಸಿಕೊಂಡಿದ್ದಾರೆ.
