ಹೊಸದಿಲ್ಲಿ: ದೆಹಲಿಯ ಆಮ್‌ ಆದ್ಮಿ ಪಕ್ಷದ ಶಾಸಕ ಅನಿಲ್ ಬಾಜ್ಪೈ ಶುಕ್ರವಾರ ಬಿಜೆಪಿ ಸೇರಿದ್ದಾರೆ. ಕಳೆದ ಎರಡು ತಿಂಗಳಲ್ಲಿ ಎಎಪಿಯಿಂದ ಬಿಜೆಪಿಗೆ ಸೇರಿದ ಎರಡನೇ ಶಾಸಕರು ಇವರು. ಎಎಪಿ ಶಾಸಕರನ್ನು ಬಿಜೆಪಿ ಆಮಿಷ ಒಡ್ಡಿ ಸೆಳೆಯುತ್ತಿದೆ ಎಂದು ದೆಹಲಿ ಸಿಎಂ ಅರವಿಂದ ಕೇಜ್ರಿವಾಲ್ ಸೇರಿದಂತೆ ಹಲವು ಮುಖಂಡರು ಆರೋಪಿಸಿದ ಮಧ್ಯೆಯೇ ಈ ಪಕ್ಷಾಂತರ ನಡೆದಿದೆ. 10 ಕೋಟಿ ರೂ. ಆಮಿಷ ಒಡ್ಡಿ ಬಿಜೆಪಿ ಶಾಸಕರನ್ನು ಸೆಳೆಯಲಾಗುತ್ತಿದೆ. ಹೇಗಾದರೂ ಮಾಡಿ ಅಧಿಕಾರಕ್ಕೇರುವ ಹಪಾಹಪಿ ಬಿಜೆಪಿಗೆ ಇದೆ ಎಂದು ಆರೋಪಿಸಲಾಗಿದೆ. ಶುಕ್ರವಾರ ಬಿಜೆಪಿಯ ದೆಹಲಿ ಕಚೇರಿಯಲ್ಲಿ ಕೇಂದ್ರ ಸಚಿವ ವಿಜಯ್‌ ಗೋಯೆಲ್ ಹಾಗೂ ಇತರ ಮುಖಂಡರ ಸಮ್ಮುಖದಲ್ಲಿ ಅನಿಲ್ ಬಿಜೆಪಿ ಸೇರಿದ್ದಾರೆ. ಆದರೆ ಯಾವುದೇ ಲಂಚವನ್ನು ಬಿಜೆಪಿಯಿಂದ ಪಡೆದಿಲ್ಲ. ಕೇಜ್ರಿವಾಲ್ಗೆ ಸುಳ್ಳು ಹೇಳಿ, ನಂತರ ಕ್ಷಮೆ ಕೇಳುವ ಹವ್ಯಾಸವೇ ಇದೆ ಎಂದಿದ್ದಾರೆ.
