Bollywood: ಖಾನ್‌ ನಟರಿಂದ ಕಥೆಗಾಗಿ ಶೋಧ

ಬಾಲಿವುಡ್‌ನ‌ ಮುಂಚೂಣಿ ನಾಯಕ ನಟರಾಗಿರುವ ಶಾರುಖ್‌ ಖಾನ್‌, ಸಲ್ಮಾನ್‌ ಖಾನ್‌ ಹಾಗೂ ಅಮೀರ್‌ ಖಾನ್‌ ಒಟ್ಟಿಗೆ ಚಿತ್ರವೊಂದರಲ್ಲಿ ನಟಿಸುತ್ತಿದ್ದಾರೆ ಎಂಬ ಸುದ್ದಿ ಬಹುದಿನಗಳಿಂದ ಹರಿದಾಡುತ್ತಿದೆ.

ಈ ಮೂರು ಸ್ಟಾರ್‌ ನಟರನ್ನು ಒಟ್ಟಿಗೆ ತೆರೆ ಮೇಲೆ ನೋಡುವುದು ಅವರ ಅಭಿಮಾನಿಗಳಿಗೆ ಒಂದು ಸಂಭ್ರಮವೇ ಸರಿ. ಅಂದಹಾಗೆ ಈ ಮೂರು ನಟರು ಒಟ್ಟಿಗೆ ಚಿತ್ರದಲ್ಲಿ ನಟಿಸುವರೆಂಬ ಮಾಹಿತಿ ಖಚಿತವಾಗಿದೆ. ಈ ಬಗ್ಗೆ ಸ್ವತಃ ಅಮೀರ್‌ ಖಾನ್‌ ಮಾಹಿತಿ ಹಂಚಿಕೊಂಡಿದ್ದಾರೆ.

ಇತ್ತೀಚೆಗೆ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತ, “ಇದೊಂದು ಸುವರ್ಣ ಅವಕಾಶ, ಇದನ್ನು ಕೈತಪ್ಪದಂತೆ ನೋಡಿಕೊಳ್ಳಬೇಕು. ಈಗಾಗಲೇ ನಾನು ಶಾರುಖ್‌ ಹಾಗೂ ಸಲ್ಮಾನ್‌ ಅವರ ಬಳಿ ಮೂವರು ಒಟ್ಟಿಗೆ ಸಿನಿಮಾ ಮಾಡುವುದರ ಬಗ್ಗೆ ಚರ್ಚಿಸಿದ್ದೇನೆ. ಅವರೂ ಸಹ ಸಮ್ಮತಿ ನೀಡಿದ್ದಾರೆ. ಶೀಘ್ರ ಚಿತ್ರ ಮಾಡುತ್ತೇವೆ. ಸದ್ಯ ಇದಕ್ಕೆ ಅತ್ಯುತ್ತಮ ಕಥೆಯ ಹುಡುಕಾಟದಲ್ಲಿದ್ದೇವೆ. ಈ ರೀತಿಯ ಸಿನಿಮಾ ಎಂದರೆ ಸ್ಕ್ರಿಪ್ಟ್ ಕೂಡ ಚೆನ್ನಾಗಿರಬೇಕು’ ಎನ್ನುವುದು ಅಮೀರ್‌ ಖಾನ್‌ ಅಭಿಪ್ರಾಯ.

ಸದ್ಯ ಶಾರುಖ್‌ ಖಾನ್‌ “ಕಿಂಗ್‌’ ಸಿನಿಮಾ, ಸಲ್ಮಾನ್‌ ಖಾನ್‌ “ಸಿಕಂದರ್‌’ ಹಾಗೂ ಅಮೀರ್‌ ಖಾನ್‌ “ಸಿತಾರೆ ಜಮೀನ್‌ ಪರ್‌’ ಚಿತ್ರಗಳಲ್ಲಿ ತೊಡಗಿಕೊಂಡಿದ್ದಾರೆ. ಈ ಮೂವರು ಸ್ಟಾರ್‌ ನಟರ ಸಿನಿಮಾವನ್ನು ಶೀಘ್ರ ತೆರೆ ಮೇಲೆ ನೋಡಲು ಪ್ರೇಕ್ಷಕರು ಕಾತುರದಿಂದ ಕಾಯುತ್ತಿರುವುದಂತೂ ಸತ್ಯ.