ಕಿರುತೆರೆಯ “ಪುಟ್ಟಕ್ಕನ ಮಕ್ಕಳು’ ಧಾರಾವಾಹಿಯನ್ನು ನೋಡಿರುವವರಿಗೆ ಈ ಧಾರಾವಾಹಿಯಲ್ಲಿ ಪ್ರಮುಖ ಪಾತ್ರದಲ್ಲಿ ಅಭಿನಯಿಸುತ್ತಿರುವ ಪವನ್‌ ಕುಮಾರ್‌ ಹಾಗೂ ಸಂಜನಾ ಬುರ್ಲಿ ಜೋಡಿಯ ಪರಿಚಯವಿರುತ್ತಿದೆ. ಈಗ ಇದೇ ಕಿರುತೆರೆ ಜೋಡಿ ಒಟ್ಟಾಗಿ ಅಭಿನಯಿಸಿರುವ “ಲವ್‌ ರೀಸೆಟ್‌’ ಎಂಬ ಕಿರುಚಿತ್ರ ತ್ತೀಚೆಗೆ ಬಿಡುಗಡೆಯಾಗಿದೆ.
ಮೂಲತಃ ಐಟಿ ಉದ್ಯೋಗಿಯಾಗಿರುವ ಶ್ರೀಗಣೇಶ್‌, “ಲವ್‌ ರೀಸೆಟ್‌’ ಕಿರುಚಿತ್ರವನ್ನು ನಿರ್ದೇಶಿಸಿದ್ದಾರೆ. ಸಿನಿಮಾ ಮಾಡ ಬೇಕೆಂಬ ಕನಸನ್ನು ಹೊತ್ತಿರುವ ಶ್ರೀಗಣೇಶ್‌, ಅದರ ಪೂರ್ವಭಾವಿಯಾಗಿ ಈ ಕಿರುಚಿತ್ರ ನಿರ್ದೇಶಿಸಿದ್ದಾರೆ.
“ಟೈಟಲ್ಲೇ ಹೇಳುವಂತೆ, ಇದೊಂದು ಪ್ರೇಮ ಕಥಾನಕ. ಈಗಿನ ಪ್ರೇಮಿಗಳ ಮನಸ್ಥಿತಿ ಯನ್ನು 25 ನಿಮಿಷಗಳಲ್ಲಿ ತೋರಿಸುವ ಪ್ರಯತ್ನ ಮಾಡಿದ್ದೇನೆ. ಇದರಲ್ಲಿ ವಿ. ನಾಗೇಂದ್ರ ಪ್ರಸಾದ್‌ ಬರೆದಿರುವ “ಅನುರಾಗದ ನೆನಪೀಗ ಕೊನೆಯಾಗಲಿ’ ಎಂಬ ಸುಂದರವಾದ ಹಾಡೊಂದಿದೆ. ಸರಿಗಮಪ ಖ್ಯಾತಿಯ ಸುನೀಲ್, ಅನನ್ಯಾ ಪ್ರಕಾಶ್‌ ದನಿಯಾಗಿದ್ದಾರೆ. ‘ ಎಂಬುದು ನಿರ್ದೇಶಕ ಶ್ರೀಗಣೇಶ್‌ ಮಾತು.
ತಮ್ಮ ಪಾತ್ರದ ಬಗ್ಗೆ ಮಾತನಾಡಿರುವ ನಟ ಪವನ್‌ ಕುಮಾರ್‌ ಮತ್ತು ಸಂಜನಾ ಬುರ್ಲಿ “”ಪುಟ್ಟಕ್ಕನ ಮಕ್ಕಳು’ ಧಾರಾವಾಹಿಯಲ್ಲಿ ನಮ್ಮ ಪಾತ್ರವನ್ನು ಎಲ್ಲರೂ ಮೆಚ್ಚಿಕೊಂಡಿದ್ದಾರೆ. ಪ್ರೀತಿ ಹಾಗೂ ಕೆರಿಯರ್‌ ವಿಷಯ ಬಂದಾಗ ಹುಡುಗ ಯಾವುದನ್ನು ಆಯ್ಕೆ ಮಾಡಿಕೊಳ್ಳುತ್ತಾನೆ ಎಂಬುದನ್ನು ನಿರ್ದೇಶಕರು ಈ ಕಿರುಚಿತ್ರದಲ್ಲಿ ತೋರಿಸಿದ್ದಾರೆ. ಕಥೆ ಬಹಳ ಡಿಫ‌ರೆಂಟ್‌ ಆಗಿದೆ. ನಮ್ಮ ಪಾತ್ರ ಕೂಡ ಚೆನ್ನಾಗಿದೆ. ನೋಡಿ ಹಾರೈಸಿ’ ಎಂದರು.
“ಲವ್‌ ರೀಸೆಟ್‌’ ಕಿರುಚಿತ್ರಕ್ಕೆ ಪ್ರಜ್ವಲ್‌ ಭಾರದ್ವಾಜ್‌ ಛಾಯಾಗ್ರಹಣವಿದ್ದು, ಗೀತೆಯೊಂದಕ್ಕೆ ಜೋಯಲ್‌ ಹಾಗೂ ಅಭಿಲಾಶ್‌ ಸಂಗೀತ ನೀಡಿದ್ದಾರೆ.
