ಅಪರೂಪದ ತ್ರಿವಳಿ ಸಂಗಮ

ಕಟೀಲು ಮೇಳದ ಪ್ರಮುಖ ಭಾಗವತ ಪಟ್ಲ ಸತೀಶ ಶೆಟ್ಟಿ, ಬಡಗಿನ ಸಾಲಿಗ್ರಾಮ ಮೇಳದ ಭಾಗವತ ರಾಘವೇಂದ್ರ ಮಯ್ಯ ಮತ್ತು ಪೆರ್ಡೂರು ಮೇಳದ ಭಾಗವತ ಜನ್ಸಾಲೆ ರಾಘವೇಂದ್ರ ಆಚಾರ್ಯ ಈ ಮೂವರು ಒಂದೇ ವೇದಿಕೆಯಲ್ಲಿ ಗಾನ ರಸಧಾರೆ ಹರಿಸಿದ ಗಾನವೈಭವ  ಇತ್ತೀಚೆಗೆ ಸಾಲಿಗ್ರಾಮ ಗಿರಿಜಾ ಕಲ್ಯಾಣ ಮಂಟಪದಲ್ಲಿ ಹೊಟೇಲ್‌ ಉದ್ಯಮಿ ರಾಘವೇಂದ್ರ ಹೆಬ್ಟಾರ್‌ ಅವರ ಪುತ್ರ ಶಶಿಧರನ ಬ್ರಹ್ಮೋಪದೇಶ ಪ್ರಯುಕ್ತ ನಡೆಯಿತು.

ಈ ತ್ರಿವಳಿ ಸಂಗಮ ಕಾರ್ಯಕ್ರಮದಲ್ಲಿ ಸುಮಾರು ಎರಡು ಸಾವಿರಕ್ಕೂ ಹೆಚ್ಚು ಪ್ರೇಕ್ಷಕರು ಆಯ್ದ ಪ್ರಸಂಗಗಳ ಅತ್ಯುತ್ತಮ ಪದ್ಯಗಳ ಗಾನ- ನಿನಾದ ಸವಿದು ಪುಳಕಿತರಾದರು. ದೇವತಾ ಪ್ರಾರ್ಥನೆಯಿಂದ ಆರಂಭಗೊಂಡು ಶೃಂಗಾರ, ಹಾಸ್ಯ, ವೀರ, ಕರುಣ ಮುಂತಾದ ರಸಗಳ ಪದಗಳು ಮೂವರು ಭಾಗವತರ ಕಂಚಿನ ಕಂಠದಿಂದ ಅದ್ಭುತವಾಗಿ ಮೂಡಿಬಂದವು. ಕೆಲವೊಂದು ಪದ್ಯಗಳನ್ನು ಮೂವರು ದ್ವಂದ್ವವಾಗಿ ಹಾಡಿ ಪ್ರೇಕ್ಷಕರ ಮನರಂಜಿಸಿದರು. 

ಈ ಕಾರ್ಯಕ್ರಮದಲ್ಲಿ ಕೃಷ್ಣಪ್ರಕಾಶ ಉಳಿತ್ತಾಯ, ಪದ್ಮನಾಭ ಉಪಾಧ್ಯ, ಪರಮೇಶ್ವರ ಭಂಡಾರಿ ಕರ್ಕಿ, ಕೋಟ ಶಿವಾನಂದ, ಸುನಿಲ್‌ ಭಂಡಾರಿ, ಶ್ರೀನಿವಾಸ್‌ ಪ್ರಭು ಉತ್ತಮವಾಗಿ ಚೆಂಡೆ-ಮದ್ದಲೆ ಹಿಮ್ಮೇಳದ ಝೆಂಕಾರ ಹರಿಸಿದರು. ವಾದಿರಾಜ ಕಲ್ಲೂರಾಯರ ನಿರೂಪಣೆ ಕಾರ್ಯಕ್ರಮಕ್ಕೆ ಮೆರಗು ನೀಡಿತು. 

ರಾಜೇಶ ಅಚ್ಲಾಡಿ