ಬೀದರ್ ನಲ್ಲಿ ಮತ್ತೆ ನಾಲ್ವರು ಕೋವಿಡ್ ಸೋಂಕಿಗೆ ಬಲಿ: 82 ಹೊಸ ಸೋಂಕು ಪ್ರಕರಣಗಳು

ಬೀದರ್: ಗಡಿ ನಾಡು ಬೀದರ್ ನಲ್ಲಿ ಕೋವಿಡ್ ಮರಣ ಮೃದಂಗ ಮುಂದುವರೆದಿದೆ. ಗಣೇಶ ಚತುರ್ಥಿ ದಿನವಾದ ಶನಿವಾರ ಮತ್ತೆ ನಾಲ್ವರನ್ನು ಕೋವಿಡ್ -19 ಸೋಂಕು ಬಲಿ ಪಡೆದಿದೆ. ಇನ್ನೊಂದೆಡೆ 82 ಹೊಸಬರಿಗೆ ವೈರಸ್ ಒಕ್ಕರಿಸಿದೆ.

ಶುಕ್ರವಾರವಷ್ಟೇ ನಾಲ್ಕು ಜನರು ಕೋವಿಡ್ ನಿಂದ ಸಾವನ್ನಪ್ಪಿದ್ದರು.‌ ಮತ್ತೆ ಶನಿವಾರವೂ ನಾಲ್ಕು ಜನ ಸಾವಿನ ಕದ ತಟ್ಟಿದ್ದಾರೆ. ಇದರೊಂದಿಗೆ ಜಿಲ್ಲೆಯಲ್ಲಿ ಮೃತರ‌ ಸಂಖ್ಯೆ ಈಗ 127ಕ್ಕೆ ಏರಿಕೆ ಆಗಿದೆ.

ಇಂದು ಹೊಸದಾಗಿ ಪತ್ತೆಯಾಗಿರುವ 82 ಪಾಸಿಟಿವ್ ಕೇಸ್ ಗಳಲ್ಲಿ ಬೀದರ ನಗರ- ತಾಲೂಕು ಸೇರಿ 30, ಔರಾದ ತಾಲೂಕು 22, ಬಸವ ಕಲ್ಯಾಣ ತಾಲೂಕು 13, ಭಾಲ್ಕಿ ತಾಲೂಕು 9 ಮತ್ತು ಹುಮನಾಬಾದ ತಾಲೂಕಿನ 8 ಪ್ರಕರಣಗಳು ಸೇರಿವೆ.

ಜಿಲ್ಲೆಯಲ್ಲಿ ಈಗ ಸೋಂಕಿತರ ಸಂಖ್ಯೆ ಈಗ 4031ಕ್ಕೆ ತಲುಪಿದೆ. ಶನಿವಾರ 144 ಜನ ಸೇರಿ ಈವರೆಗೆ 3146 ಸೋಂಕಿತರು ಚಿಕಿತ್ಸೆಯಿಂದ ಗುಣಮುಖರಾಗಿ ಡಿಸ್ಚಾರ್ಜ್ ಆಗಿದ್ದಾರೆ. ಇನ್ನೂ 754 ಸಕ್ರಿಯ ಪ್ರಕರಣಗಳಿವೆ.