ಚೆನ್ನೈ: ಭಾರತದ ಬ್ಯಾಡ್ಮಿಂಟನ್ ಸ್ಟಾರ್ ಪಿವಿ ಸಿಂಧು ಜತೆ ತಾನು ಮದುವೆಯಾಗಲು ವ್ಯವಸ್ಥೆ ಮಾಡಿಕೊಡಬೇಕು. ಒಂದು ವೇಳೆ ಅದು ಸಾಧ್ಯವಾಗದಿದ್ದರೆ ಆಕೆಯನ್ನು ಅಪಹರಿಸಿ ಮದುವೆಯಾಗುತ್ತೇನೆ…ಇದು 70 ವರ್ಷದ ವ್ಯಕ್ತಿಯೊಬ್ಬರು ಜಿಲ್ಲಾಧಿಕಾರಿಗೆ ಅಧಿಕೃತವಾಗಿ ಸಲ್ಲಿಸಿದ ಮನವಿ!
ನಿಮಗೆ ಈ ಸುದ್ದಿ ಓದಿ ಅಚ್ಚರಿಯಾಗಬಹುದು ಇಲ್ಲವೇ ಜೋಕ್ ಎನಿಸಬಹುದು. ಆದರೆ ತಮಿಳುನಾಡು ಜಿಲ್ಲೆಯ ರಾಮನಾಥಪುರಂನ ನಿವಾಸಿ 70 ವರ್ಷದ ಮಲಯ್ಯಸಾಮಿ ಎಂಬಾತ ಪಿವಿ ಸಿಂಧುವನ್ನು ಮದುವೆಯಾಗುವ ಇಚ್ಛೆ ವ್ಯಕ್ತಪಡಿಸಿ ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿದ ವ್ಯಕ್ತಿ!
ತಾನು ಪಿವಿ ಸಿಂಧುವನ್ನು ಮದುವೆಯಾಗಬೇಕು. ಅದಕ್ಕೆ ಬೇಕಾದ ಅನುಕೂಲ ಕಲ್ಪಿಸಿಕೊಡಬೇಕು. ಒಂದು ವೇಳೆ ಮದುವೆಯಾಗಲು ಅಗತ್ಯ ನೆರವು ಕೊಡದಿದ್ದಲ್ಲಿ ಆಕೆಯನ್ನು ಅಪಹರಿಸಿ ವಿವಾಹವಾಗುವುದಾಗಿಯೂ ತಿಳಿಸಿರುವುದಾಗಿ ವರದಿ ವಿವರಿಸಿದೆ.
ಜಿಲ್ಲಾಧಿಕಾರಿಯವರು ವಾರಕ್ಕೊಮ್ಮೆ ನಡೆಸುವ ಸಾರ್ವಜನಿಕ ಸಭೆಯಲ್ಲಿ ಮಲಯ್ಯಸಾಮಿ ಈ ಮನವಿ ಸಲ್ಲಿಸಿದ್ದಾರೆ. ಕುತೂಹಲದ ವಿಷಯ ಏನೆಂದರೆ ಪಿವಿ ಸಿಂಧು ಫೋಟೊ ಮತ್ತು ತನ್ನ ಫೋಟೋವನ್ನು ಮನವಿ ಪತ್ರದ ಜತೆ ಲಗತ್ತಿಸಿದ್ದು!
ಅದೇ ರೀತಿ ತಾನು 2004ರ ಏಪ್ರಿಲ್ 4ರಂದು ಜನಿಸಿದ್ದು, ಕೇವಲ 16ವರ್ಷವಷ್ಟೇ ಆಗಿದೆ. ಹೀಗಾಗಿ ಪಿವಿ ಸಿಂಧುವನ್ನು ತಾನು ಮದುವೆಯಾಗಿ ಆಕೆಯ ಬದುಕಿನ ಏಳಿಗೆಗೆ ಪ್ರೋತ್ಸಾಹ ನೀಡುವುದಾಗಿ ಮಲಯ್ಯ ಸಾಮಿ ತಿಳಿಸಿದ್ದಾರೆ.
