ರಾಂಚಿಯಲ್ಲಿ ಒಂದೇ ಕುಟುಂಬದ 7 ಮಂದಿಯಿಂದ ಸಾಮೂಹಿಕ ಆತ್ಮಹತ್ಯೆ

ರಾಂಚಿ : ರಾಷ್ಟ್ರ ರಾಜಧಾನಿಯ ಬುರಾರಿಯಲ್ಲಿ ಒಂದೇ ಕುಟುಂಬದ 11 ಮಂದಿ ಈಚೆಗೆ ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಂಡ ಘಟನೆ ಜನಮನದಲ್ಲಿ ಇನ್ನೂ ಮಾಸದಿರುವ ನಡುವೆಯೇ ಇದೀಗ ಜಾರ್ಖಂಡ್‌ ರಾಜಧಾನಿ ರಾಂಚಿಯಲ್ಲಿ ಒಂದೇ ಕುಟುಂಬದ 7 ಮಂದಿ ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ನಡೆದಿದೆ. 

ರಾಂಚಿಯ ಕಾಂಕೇ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ನಡೆದಿರುವ ಈ ಸಾಮೂಹಿಕ ಆತ್ಮಹತ್ಯೆ ಘಟನೆಯನ್ನು ಪೊಲೀಸರು ತನಿಖೆ ನಡುಸುತ್ತಿದ್ದಾರೆ; ಆದರೆ ಆತ್ಮಹತ್ಯೆಗೆ ಕಾರಣವೇನೆಂಬುದು ಮಾತ್ರ ಈ ತನಕ ಗೊತ್ತಾಗಿಲ್ಲ. 

ಈ ತಿಂಗಳ ಆದಿಯಲ್ಲಿ  ಜಾರ್ಖಂಡ್‌ನ‌ ಹಜಾರಿಬಾಗ್‌ನಲ್ಲಿನ ಅಪಾರ್ಟ್‌ಮೆಂಟ್‌ ಒಂದರಲ್ಲಿ ಒಂದೇ ಕುಟುಂಬದ ಆರು ಮಂದಿ ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಇದೀಗ ಅದೇ ರೀತಿ ಒಂದೇ ಕುಟುಂಬದ 7 ಮಂದಿ ಆತ್ಮಹತ್ಯೆ ಮಾಡಿಕೊಂಡಿದ್ದು ಹಣಕಾಸು ಬಿಕ್ಕಟ್ಟೇ ಈ ಘಟನೆಗಳಿಗೆ ಕಾರಣ ಇರಬಹುದೆಂದು ಪೊಲೀಸರು ಶಂಕಿಸಿದ್ದಾರೆ. 

ದಿಲ್ಲಿಯ ಬುರಾರಿಯ ಕುಟುಂಬದ 11 ಮಂದಿಯ ಸಾಮೂಹಿಕ ಆತ್ಮಹತ್ಯೆ ನಿಗೂಢ ಪ್ರಕರಣವಾಗಿತ್ತು. ಅದಾಗಿ ಕೇವಲ ಒಂದು ತಿಂಗಳ ಒಳಗೆ ಜಾರ್ಖಂಡ್‌ ರಾಜಧಾನಿಯಲ್ಲಿ  ಈ ಎರಡು ಘಟನೆಗಳು ಸಂಭವಿಸಿವೆ. 

ದಿಲ್ಲಿಯ ಬುರಾರಿಯಲ್ಲಿನ ಭಾಟಿಯಾ ಕುಟುಂಬದ 11 ಮಂದಿಯ ಸಾಮೂಹಿಕ ಆತ್ಮಹತ್ಯೆಗೆ ಮೋಕ್ಷ  ಪಡೆಯುವ ಅಪೇಕ್ಷೆ ಕಾರಣವೆಂದು ಕೂಡ ಶಂಕಿಸಲಾಗಿತ್ತು.