ಇಂಡೋನೇಷ್ಯಾದಲ್ಲಿ 63 ಸಾವಿರ ದಾಟಿದ ಸೋಂಕು

ಜಕಾರ್ತಾ: ಪ್ರವಾಸೋದ್ಯಮಕ್ಕೆ ಅನುವುಮಾಡಿಕೊಡಲು ಇಂಡೋನೇಷ್ಯಾ ಚಿಂತನೆ ನಡೆಸುತ್ತಿರುವಂತೆಯೇ ಇಲ್ಲಿನ ಕೋವಿಡ್‌ ಪ್ರಕರಣಗಳ ಸಂಖ್ಯೆ 63 ಸಾವಿರದ ಗಡಿ ದಾಟಿದೆ. ದಿನವೊಂದಕ್ಕೆ ಪತ್ತೆಯಾಗುತ್ತಿರುವ ಪ್ರಕರಣಗಳ ಸಂಖ್ಯೆಯಲ್ಲೂ ಏರಿಕೆಯಾಗತೊಡಗಿದೆ. ಆದಿತ್ಯವಾರ ಒಂದೇ ದಿನದಲ್ಲಿ 1607 ಪ್ರಕರಣಗಳು ಕಂಡು ಬಂದಿವೆ. ಈ ಮೊದಲು ದಿನದ ಕೇಸುಗಳ ಸಂಖ್ಯೆ 900-1000 ಆಸುಪಾಸಿನಲ್ಲಿತ್ತು. ಇದರೊಂದಿಗೆ 81 ಮಂದಿ ಮೃತಪಟ್ಟಿದ್ದು ಒಟ್ಟು ಮೃತರ ಪ್ರಮಾಣ 3171ಕ್ಕೆ ಏರಿಕೆಯಾಗಿದೆ.

ಇದೇ ವೇಳೆ ಸೋಂಕಿನಿಂದ ಗುಣಮುಖರಾದವರ ಸಂಖ್ಯೆ 29105ಕ್ಕೆ ಏರಿಕೆಯಾಗಿದೆ.  ಇಂಡೋನೇಷ್ಯಾದ ರಾಜಧಾನಿ ಜಕಾರ್ತದಲ್ಲೇ ಒಂದೇ ದಿನ 257 ಪ್ರಕರಣಗಳು ಕಂಡುಬಂದಿದ್ದು, ಒಟ್ಟು ಕೇಸುಗಳ ಸಂಖ್ಯೆ 12435 ಆಗಿದೆ. ಪೂರ್ವ ಜಾವಾದಲ್ಲಿ 552 ಪ್ರಕರಣಗಳು ಇದ್ದರೆ, ಕೇಂದ್ರ ಜಾವಾದಲ್ಲಿ 208, ದಕ್ಷಿಣ ಸುಲಾವೆಸಿಯಲ್ಲಿ 136 ಮತ್ತು ಪಶ್ಚಿಮ ಜಾವಾದಲ್ಲಿ 106 ಮತ್ತು ಬಾಲಿಯಲ್ಲಿ 52 ಪ್ರಕರಣಗಳು ಕಂಡುಬಂದಿವೆ, ಇಂಡೋನೇಷ್ಯಾದ 34 ಪ್ರಾಂತ್ಯಗಳಿಗೆ ವೈರಸ್‌ ವ್ಯಾಪಿಸಿದೆ ಎಂದು ಅಲ್ಲಿನ ಆರೋಗ್ಯ ಇಲಾಖೆ ಹೇಳಿದೆ.