ಬಿಹಾರದ 59 ಕಾರಾಗೃಹದಲ್ಲಿ 62,000 ಕೈದಿಗಳು !

ನವದೆಹಲಿ: ಜೈಲು ಕಾನೂನು ತಿದ್ದುಪಡಿ ಅನ್ವಯ ಬಿಹಾರದಲ್ಲಿ 27 ಕೈದಿಗಳು ಬಿಡುಗಡೆಗೊಂಡಿರುವ ವಿಚಾರ ಚರ್ಚೆಗೆ ಗ್ರಾಸವಾಗಿರುವ ನಡುವೆಯೇ, ಅಲ್ಲಿನ ಗೃಹ ಸಚಿವಾಲಯ ಇತ್ತೀಚೆಗೆ ಬಿಡುಗಡೆಗೊಳಿಸಿದ ವರದಿ ಆತಂಕ ಮೂಡಿಸಿದೆ. ಆ ರಾಜ್ಯದ ಒಟ್ಟು 59 ಜೈಲುಗಳಲ್ಲಿ 62,000 ಕೈದಿಗಳಿದ್ದು, ಇದು ಜೈಲುಗಳ ಸಾಮರ್ಥ್ಯ ಮೀರಿದ್ದು ಎಂದು ಸಚಿವಾಲಯ ತಿಳಿಸಿದೆ.

ವರದಿಗಳ ಪ್ರಕಾರ, 8 ಕೇಂದ್ರ ಕಾರಾಗೃಹಗಳು ಸೇರಿದಂತೆ 59 ಜೈಲುಗಳಲ್ಲಿನ ಒಟ್ಟು ಸಾಮರ್ಥ್ಯ 47,750 ಕೈದಿಗಳಾಗಿದೆ. ಆದರೆ 61,891 ಕೈದಿಗಳು ಈ ಜೈಲುಗಳಲ್ಲಿದ್ದಾರೆ. ಇದರರ್ಥ ಜೈಲುಗಳು ತಮ್ಮ ಸಾಮರ್ಥ್ಯಕ್ಕಿಂತ ಶೇ.30ರಷ್ಟು ಹೆಚ್ಚು ಕೈದಿಗಳನ್ನು ಹೊಂದಿವೆ ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಕೈದಿಗಳ ಸಂಖ್ಯೆ ಇಳಿಮುಖಗೊಳಿಸುವುದು ಅಗತ್ಯ ಎನ್ನಲಾಗಿದೆ.

ಇನ್ನು ಸಾಮರ್ಥ್ಯ ಮೀರಿದ ಕೈದಿಗಳನ್ನು ಹೊಂದುವ ಮೂಲಕ ಅತೀ ನಿಕೃಷ್ಟ ಪರಿಸ್ಥಿತಿ ಎದುರಿಸುತ್ತಿರುವುದು ಬಿಹಾರದ ಜಾಮುಯಿ ಜಿಲ್ಲಾ ಕೇಂದ್ರ ಕಾರಾಗೃಹವಾವಾಸಿಗಳು. 188 ಕೈದಿಗಳಿಗೆ ಮೀಸಲಾದ ಈ ಜೈಲಿನಲ್ಲಿ ಮಾ.31ರವರೆಗೆ 822 ಕೈದಿಗಳಿದ್ದಾರೆ ಎನ್ನಲಾಗಿದೆ. ಇಂಥ ಪರಿಸ್ಥಿತಿ ನಿವಾರಣೆಗಾಗಿ ಹಲವು ಕ್ರಮ ಕೈಗೊಳ್ಳಲಾಗಿದೆ. ಆ ಪೈಕಿ 14 ವರ್ಷದ ಮೇಲೆ ಜೈಲು ಶಿಕ್ಷೆ ಅನುಭವಿಸಿರುವವರನ್ನು ಬಿಡುಗಡೆಗೊಳಿಸುವುದು ಕೂಡ ಇಂಥದ್ದೇ ಕ್ರಮ ಎಂದು ಮೂಲಗಳು ತಿಳಿಸಿವೆ.