50 ರೂ. ವಿಚಾರಕ್ಕೆ ಚಾಕು ಇರಿತ

ಬೆಂಗಳೂರು: ಕೇವಲ 50 ರೂ. ವಿಚಾರಕ್ಕೆ ಕೂಲಿ ಕಾರ್ಮಿಕ ಬಾಲಾಜಿ ಎಂಬಾತನ ಕಾಲಿಗೆ ಚಾಕು ಇರಿದ ಪ್ರಕರಣ ಕೆ.ಆರ್‌.ಮಾರ್ಕೆಟ್‌ ಮೆಟ್ರೋ ಗೆಸ್ಟ್‌ಹೌಸ್‌ ಬಳಿ ನಡೆದಿದೆ. ಈ ಸಂಬಂಧ ಸಂತೋಷ್‌ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ.

ಮಾರ್ಕೆಟ್‌ ಸೇರಿದಂತೆ ಇತರೆ ಕಡೆ ಕೂಲಿ ಕೆಲಸ ಮಾಡುವ ಬಾಲಾಜಿ ಹಾಗೂ ಸಂತೋಷ್‌ ಮತ್ತಿತರರು ಮಧ್ಯಾಹ್ನ ಮೆಟ್ರೋ ಗೆಸ್ಟ್‌ ಹೌಸ್‌ ಬಳಿಯೇ ಉಳಿದುಕೊಳ್ಳುತ್ತಿದ್ದು, ಶನಿವಾರ ಮಧ್ಯಾಹ್ನ 3 ಗಂಟೆ ಸುಮಾರಿಗೆ ಪಾನಮತ್ತರಾಗಿ ಗೆಸ್ಟ್‌ಹೌಸ್‌ ಬಳಿ ಬಂದಿದ್ದಾರೆ.

ಈ ವೇಳೆ ಕೂಲಿ ಕೆಲಸದಲ್ಲಿ ಬಾಕಿ ಬರಬೇಕಿದ್ದ 50 ರೂ. ನೀಡುವಂತೆ ಬಾಲಾಜಿ ಜತೆಗಿದ್ದ ಸಂತೋಷ್‌ನನ್ನು ಕೇಳಿದ್ದಾನೆ. ಇದೇ ವಿಚಾರಕ್ಕೆ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆದು ಜಗಳ ವಿಕೋಪಕ್ಕೆ ಹೋಗಿದ್ದು, ಕೋಪಗೊಂಡ ಸಂತೋಷ್‌ ಹರಿತವಾದ ಚಾಕುವಿನಿಂದ ಬಾಲಾಜಿ ಇರಿಯಲು ಮುಂದಾದ.

ಈ ವೇಳೆ ಬಾಲಾಜಿ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದಾಗ ಚಾಕು ಆತನ ಕಾಲಿಗೆ ಚುಚ್ಚಿಕೊಂಡಿದೆ. ಇದರಿಂದ ರಕ್ತಸ್ರಾವ ಆಗುತ್ತಿದ್ದರೂ ಜಗಳ ಮುಂದುವರಿದಿರುವುದನ್ನು ಗಮನಿಸಿದ ಸ್ಥಳೀಯರು ಜಗಳ ಬಿಡಿಸಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ. ಈ ಸಂಬಂಧ ಕಲಾಸಿಪಾಳ್ಯ  ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.