ಫೇಸ್‌ಬುಕ್‌ ಪರಿಚಯ: 48 ಲ. ರೂ. ಕಳಕೊಂಡ ಖಾಸಗಿ ಶಾಲೆಯ ಮುಖ್ಯ ಶಿಕ್ಷಕಿ!

ಶಿವಮೊಗ್ಗ: ಫೇಸ್‌ಬುಕ್‌ನಲ್ಲಿ ಪರಿಚಿತನಾಗಿದ್ದ ವ್ಯಕ್ತಿಯೊಬ್ಬ ಸಾಗರದ ಖಾಸಗಿ ಶಾಲೆಯ ಮುಖ್ಯ ಶಿಕ್ಷಕಿಗೆ 48 ಲ.ರೂ. ವಂಚಿಸಿದ್ದಾನೆ ಎಂದು ಶಿವಮೊಗ್ಗ ಸೈಬರ್‌ ಕ್ರೈಂ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಶಾಲೆ ನಡೆಸಲು ದಾನಿಗಳಿಂದ ಲಕ್ಷಾಂತರ ರೂ. ನೆರವಿನ ಅಗತ್ಯವಿದೆ ಎಂದು ಹೈಡಾ ಎಂಬವರು ಫೇಸ್‌ಬುಕ್‌ನಲ್ಲಿ ಪೋಸ್ಟ್‌ ಹಾಕಿದ್ದರು. ಇದನ್ನು ಗಮನಿಸಿದ್ದ ಡಾ| ಮಾರ್ಕ್‌ ಡಬ್ಲ್ಯೂ ಡೊನಾಲ್ಡ್‌ ಎಂಬ ವ್ಯಕ್ತಿ ಶಿಕ್ಷಕಿಗೆ ಫ್ರೆಂಡ್‌ ರಿಕ್ವೆಸ್ಟ್‌ ಕಳುಹಿಸಿ ಪರಿಚಯ ಮಾಡಿಕೊಂಡಿದ್ದ. ಅನಂತರ ಅನುದಾನ ನೀಡುವುದಾಗಿ ನಂಬಿಸಿ, ವಿದೇಶಿ ಕರೆನ್ಸಿಯನ್ನು ಭಾರತದ ರೂಪಾಯಿಗೆ ವರ್ಗಾಯಿಸಲು ಹಣ ಭರಿಸಬೇಕಾಗುತ್ತದೆ ಎಂದು 3 ತಿಂಗಳುಗಳಿಂದ ಮುಖ್ಯ ಶಿಕ್ಷಕಿಯಿಂದ 47.84 ಲಕ್ಷ ರೂ.ಗಳನ್ನು ತನ್ನ ಖಾತೆಗೆ ಜಮೆ ಮಾಡಿಸಿಕೊಂಡಿದ್ದ.