40 Years Of Service: ಭೂಸೇನಾ ನೂತನ ಮುಖ್ಯಸ್ಥರಾಗಿ ಲೆ.ಜ. ಉಪೇಂದ್ರ ದ್ವಿವೇದಿ ನೇಮಕ

ನವದೆಹಲಿ: ಜಗತ್ತಿನ ಅತೀ ದೊಡ್ಡ ಮಿಲಿಟರಿ ಪಡೆಗಳಲ್ಲಿ ಒಂದಾದ ಭಾರತದ ಭೂಸೇನೆಯ ನೂತನ ಮುಖ್ಯಸ್ಥರಾಗಿ ಲೆಫ್ಟಿನೆಂಟ್‌ ಜನರಲ್‌ ಉಪೇಂದ್ರ ದ್ವಿವೇದಿ ನೇಮಕಗೊಂಡಿದ್ದಾರೆ. ಸದ್ಯ ಭೂಸೇನೆ ಉಪ ಮುಖ್ಯಸ್ಥರಾಗಿರುವ ಅವರು ಜೂ.30ರಂದು ಅಧಿಕಾರ ಸ್ವೀಕರಿಸಲಿದ್ದಾರೆ.

ಇದನ್ನೂ ಓದಿ:Bantwala: ಮನೆಗೆ ನುಗ್ಗಿ ಒಂಟಿ ಮಹಿಳೆಗೆ ಲೈಂಗಿಕ ಕಿರುಕುಳ; ಆರೋಪಿ ಬಂಧನ

ಜನರಲ್‌ ಮನೋಜ್‌ ಸಿ.ಪಾಂಡೆ ಅವರು ಜೂನ್‌ 30ರಂದು ಸೇವೆಯಿಂದ ನಿವೃತ್ತರಾಗಲಿದ್ದು, ಅಂದು ಲೆ.ಜ. ಉಪೇಂದ್ರ ದ್ವಿವೇದಿ ಅಧಿಕಾರ ಸ್ವೀಕರಿಸಲಿದ್ದಾರೆ ಎಂದು ವರದಿ ವಿವರಿಸಿದೆ.

ಲೆ.ಜ.ಉಪೇಂದ್ರ ದ್ವಿವೇದಿ ಹಿನ್ನೆಲೆ:

1964ರ ಜುಲೈ 1ರಂದು ಉಪೇಂದ್ರ ದ್ವಿವೇದಿ ಜನಿಸಿದ್ದು, ಸೈನಿಕ್‌ ಶಾಲೆ ರೇವಾ, ನ್ಯಾಷನಲ್‌ ಡಿಫೆನ್ಸ್‌ ಕಾಲೇಜು ಮತ್ತು ಅಮೆರಿಕದ ಆರ್ಮಿ ವಾರ್‌ ಕಾಲೇಜ್‌ ನಲ್ಲಿ ಶಿಕ್ಷಣ ಪಡೆದಿದ್ದರು. ಡಿಫೆನ್ಸ್‌ & ಮ್ಯಾನೇಜ್‌ ಮೆಂಟ್‌ ಸ್ಟಡೀಸ್‌ ನಲ್ಲಿ ಎಂ.ಫಿಲ್‌ ಪಡೆದಿದ್ದು, ಜೊತೆಗೆ ಎರಡು ಮಾಸ್ಟರ್‌ ಪದವಿ ಗಳಿಸಿದ್ದಾರೆ.

1984ರ ಡಿಸೆಂಬರ್‌ 15ರಂದು ದ್ವಿವೇದಿ ಅವರು‌ ಭಾರತೀಯ ಸೇನೆಯ ಜಮ್ಮು-ಕಾಶ್ಮೀರ ರೈಫಲ್ಸ್ ಪದಾತಿಗಳಕ್ಕೆ ನೇಮಕಗೊಂಡಿದ್ದರು. ಸುದೀರ್ಘ 40ವರ್ಷಗಳ ಸೇವೆಯಲ್ಲಿ ದ್ವಿವೇದಿ ಅವರು ಹಲವಾರು ಹುದ್ದೆಗಳಲ್ಲಿ ಕರ್ತವ್ಯ ನಿರ್ವಹಿಸಿದ್ದರು.

ಜಮ್ಮು-ಕಾಶ್ಮೀರ್‌ ರೈಫಲ್ಸ್‌ ನ ಕಮಾಂಡ್‌ ಆಫ್‌ ರೆಜಿಮೆಂಟ್ಸ್‌, ಬ್ರಿಗೇಡ್‌ (26 ಸೆಕ್ಟರ್‌ ಅಸ್ಸಾಂ ರೈಫಲ್ಸ್)‌, ಇನ್ಸ್‌ ಪೆಕ್ಟರ್‌ ಜನರಲ್‌ ಸೇರಿದಂತೆ ವಿವಿಧ ಹುದ್ದೆಗಳನ್ನು ದ್ವಿವೇದಿ ಅಲಂಕರಿಸಿದ್ದರು.

ಲೆಫ್ಟಿನೆಂಟ್‌ ಜನರಲ್‌ ದ್ವಿವೇದಿ ಅವರು 2022-2024ರ ಅವಧಿವರೆಗೆ ಡೈರೆಕ್ಟರ್‌ ಜನರಲ್‌ ಇನ್‌ ಫ್ಯಾಂಟ್ರಿ & ಜನರಲ್‌ ಆಫೀಸರ್‌ ಕಮಾಂಡಿಂಗ್‌ ಇನ್‌ ಚೀಫ್‌ ಆಗಿ ಸೇವೆ ಸಲ್ಲಿಸಿದ್ದರು.

ಉಪೇಂದ್ರ ದ್ವಿವೇದಿ ಅವರ ಸೇವೆಯನ್ನು ಪರಿಗಣಿಸಿ ಪರಂ ವಿಶಿಷ್ಠ ಸೇವಾ ಪದಕ, ಅತಿ ವಿಶಿಷ್ಟ ಸೇವಾ ಪದಕಕ್ಕೆ ಭಾಜನರಾಗಿದ್ದಾರೆ.