100 ಅಡಿ ಬಾವಿಗೆ ಬಿದ್ದಿದ್ದ ನಾಲ್ಕು ಸಿಂಹಗಳ ರಕ್ಷಣೆ

ಅಹಮದಾಬಾದ್‌: ಗುಜರಾತ್‌ನ ಗಿರ್‌ ಅರಣ್ಯದಲ್ಲಿ 100 ಅಡಿ ಆಳದ ತೆರೆದ ಬಾವಿಗೆ ಬಿದ್ದಿದ್ದ ನಾಲ್ಕು ಸಿಂಹಗಳನ್ನು ಭಾನುವಾರ ರಕ್ಷಿಸಲಾಗಿದೆ. ಸರಸಿಯಾ ಪ್ರಾಂತ್ಯದಲ್ಲಿ ತಿರುಗಾಡುತ್ತಿದ್ದ 2-3 ವರ್ಷದ ಸಿಂಹಗಳು ಶನಿವಾರ ಬಾವಿಗೆ ಬಿದ್ದಿದ್ದವು. ಈ ಬಾವಿ ಬಳಸದೆ ಬಿಟ್ಟಿರುವ ಕೃಷಿ ಭೂಮಿಯಲ್ಲಿತ್ತು. ಈ ಜಮೀನಿನ ಮಾಲೀಕರು ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ ಹಿನ್ನೆಲೆಯಲ್ಲಿ, ಶನಿವಾರ ರಾತ್ರಿಯಿಂದ ಅರಣ್ಯ ಇಲಾಖೆ ಅಧಿಕಾರಿಗಳು ಕಾರ್ಯಾಚರಣೆ ನಡೆಸಿ ರಕ್ಷಣೆ ಮಾಡಿದ್ದಾರೆ. ಸಿಂಹಗಳನ್ನು ಬಾವಿಯಿಂದ ಎತ್ತಿ ತೆಗೆಯಲು ಗ್ರಾಮದ ಜನರು ನೆರವಾಗಿದ್ದಾರೆ.

ಈ ಭಾಗದಲ್ಲಿ ಪಾಳು ಬಾವಿಗೆ ಸಿಂಹಗಳು ಬೀಳುವುದು ಅತ್ಯಂತ ಸಾಮಾನ್ಯವಾಗಿದ್ದು, 37 ಸಾವಿರ ತೆರೆದ ಬಾವಿಗಳಿಗೆ ಪ್ರಾಕಾರ ನಿರ್ಮಿಸಿದ್ದೇವೆ ಎಂದು ಇತ್ತೀಚೆಗಷ್ಟೇ ಗುಜರಾತ್‌ ಹೈಕೋರ್ಟ್‌ಗೆ ರಾಜ್ಯ ಸರ್ಕಾರ ತಿಳಿಸಿತ್ತು. ರಾಜ್ಯದಲ್ಲಿ ಸುಮಾರು 50 ಸಾವಿರ ತೆರೆದ ಬಾವಿಗಳಿದ್ದು, ಇವು ವನ್ಯಜೀವಿಗಳಿಗೆ ಅಪಾಯಕರವಾಗಿವೆ.