ಮೆಲ್ಬರ್ನ್: ಆಸ್ಟ್ರೇಲಿಯದ ಮಾಜಿ ಸ್ಪಿನ್ನರ್‌ ಬ್ರಾಡ್‌ ಹಾಗ್‌ ಸಮಕಾಲೀನ ಟೆಸ್ಟ್‌ ಸಾಧಕರ ತಂಡವೊಂದನ್ನು ಪ್ರಕಟಿಸಿದ್ದಾರೆ. ಅಚ್ಚರಿ ಯೆಂದರೆ, ಇದರಲ್ಲಿ ಭಾರತದ ನಾಲ್ವರು ಆಟ ಗಾರರಿದ್ದರೂ ವಿರಾಟ್‌ ಕೊಹ್ಲಿ ಸ್ಥಾನ ಪಡೆಯಲು ವಿಫ‌ಲರಾಗಿದ್ದಾರೆ!
“ಈ ತಂಡದಲ್ಲಿ ವಿರಾಟ್‌ ಕೊಹ್ಲಿ ಯಾಕಿಲ್ಲ ಎಂದು ಎಲ್ಲರೂ ನನ್ನನ್ನು ಕೇಳುತ್ತಿದ್ದಾರೆ. ನಾನು ಕಳೆದ 15 ಟೆಸ್ಟ್‌ ಇನ್ನಿಂಗ್ಸ್‌ಗಳಲ್ಲಿ ಆಟಗಾರರ ಸಾಧನೆಯನ್ನು ಪರಿಗಣಿಸಿ ಈ ತಂಡವನ್ನು ರಚಿಸಿದ್ದೇನೆ. ಆದರೆ ಕೊಹ್ಲಿ ಕೇವಲ 4 ಸಲವಷ್ಟೇ 31 ರನ್‌ ಗಡಿ ದಾಟಿದ್ದಾರೆ. ಹೀಗಾಗಿ ನನ್ನ ಟೆಸ್ಟ್‌ ತಂಡದಲ್ಲಿ ಕೊಹ್ಲಿ ಇಲ್ಲ’ ಎಂಬುದಾಗಿ ಬ್ರಾಡ್‌ ಹಾಗ್‌ ಸ್ಪಷ್ಟಪಡಿಸಿದ್ದಾರೆ.
ಈ ತಂಡದಲ್ಲಿರುವ ಭಾರತದ ನಾಲ್ವರು ಕ್ರಿಕೆಟಿಗರೆಂದರೆ ಮಾಯಾಂಕ್‌ ಅಗರ್ವಾಲ್‌, ರೋಹಿತ್‌ ಶರ್ಮ, ಅಜಿಂಕ್ಯ ರಹಾನೆ ಮತ್ತು ಮೊಹಮ್ಮದ್‌ ಶಮಿ. ಇವರಲ್ಲಿ ಅಗರ್ವಾಲ್‌ ಮತ್ತು ರೋಹಿತ್‌ ಆರಂಭಿಕರಾಗಿದ್ದಾರೆ. ಮಾಯಾಂಕ್‌ ಅವರ ಫ್ರಂಟ್‌ ಫ‌ುಟ್‌ ಕವರ್‌ ಡ್ರೈವ್‌ ಮತ್ತು ಪುಲ್‌ ಶಾಟ್‌ ಅತ್ಯಾಕರ್ಷಕವಾಗಿದ್ದು, ಅವರ ಬ್ಯಾಟಿಂಗ್‌ನಲ್ಲಿ ಸ್ಥಿರತೆಯನ್ನು ಕಾಣಬಹುದು ಎಂಬುದಾಗಿ ಹಾಗ್‌ ಹೇಳಿದ್ದಾರೆ.
ದಕ್ಷಿಣ ಆಫ್ರಿಕಾದ ಕ್ವಿಂಟನ್‌ ಡಿ ಕಾಕ್‌ ಈ ತಂಡದ ನಾಯಕ ಹಾಗೂ ಕೀಪರ್‌ ಆಗಿದ್ದಾರೆ.
ಬ್ರಾಡ್‌ ಹಾಗ್‌ ಟೆಸ್ಟ್‌ ಇಲೆವೆನ್‌
ಮಾಯಾಂಕ್‌ ಅಗರ್ವಾಲ್‌, ರೋಹಿತ್‌ ಶರ್ಮ, ಮಾರ್ನಸ್‌ ಲಬುಶೇನ್‌, ಸ್ಟೀವನ್‌ ಸ್ಮಿತ್‌, ಬಾಬರ್‌ ಆಜಂ, ಅಜಿಂಕ್ಯ ರಹಾನೆ, ಕ್ವಿಂಟನ್‌ ಡಿ ಕಾಕ್‌ (ನಾಯಕ/ವಿ.ಕೀ.), ಪ್ಯಾಟ್‌ ಕಮಿನ್ಸ್‌, ಮೊಹಮ್ಮದ್‌ ಶಮಿ, ನೀಲ್‌ ವ್ಯಾಗ್ನರ್‌, ನಥನ್‌ ಲಿಯೋನ್‌.
