ಭಾರತಕ್ಕೆ ಬಂದಿಳಿದ ಮತ್ತೆ 3 ರಫೇಲ್‌ ಯುದ್ಧವಿಮಾನ

ಜಾಮ್‌ನಗರ್‌: ಫ್ರಾನ್ಸ್‌ನಿಂದ ಬುಧವಾರ ಹೊರಟ 3 ರಫೇಲ್‌ ಯುದ್ಧವಿಮಾನಗಳು ಗುರುವಾರ ರಾತ್ರಿ 11ರ ಸುಮಾರಿಗೆ ಗುಜರಾತ್‌ನ ಜಾಮ್‌ನಗರ ವಾಯುನೆಲೆಗೆ ಬಂದಿಳಿದಿವೆ. ಈ ಮೂಲಕ ಭಾರತೀಯ ವಾಯುಪಡೆಯಲ್ಲಿ ರಫೇಲ್‌ ಯುದ್ಧವಿಮಾನಗಳ ಸಂಖ್ಯೆ 14ಕ್ಕೆ ಏರಿದಂತಾಗಿದೆ.

ಫ್ರಾನ್ಸ್‌ನ ಬೋರ್ಡಾಕ್ಸ್‌ನಲ್ಲಿನ ಮೆರಿಗ್ನ್ಯಾಕ್‌ ಏರ್‌ಬೇಸ್‌ನಿಂದ ಬುಧವಾರ ಬೆಳಗ್ಗೆ 7ಕ್ಕೆ ಈ ಯುದ್ಧ ವಿಮಾನಗಳು ಭಾರತದತ್ತ ಹೊರಟಿದ್ದವು. ಈ ನಡುವೆ, ಗಲ್ಫ್ ಆಗಸದಲ್ಲಿ ಯುಎಇ ಏರ್‌ಫೋರ್ಸ್‌ ಇಂಧನ ತುಂಬಿಸಿದ್ದು, ಅಲ್ಲೆಲ್ಲೂ ರಫೇಲ್‌ಗಳು ನಿಲ್ಲದೆ ಸೀದಾ ಜಾಮ್‌ನಗರಕ್ಕೆ ಬಂದಿಳಿದಿವೆ. ಅತೀ ಶೀಘ್ರದಲ್ಲಿಯೇ ಇವು ಹರಿಯಾಣದ ಅಂಬಾಲ ವಾಯುನೆಲೆಯ ರಫೇಲ್‌ ಬಳಗಕ್ಕೆ ಸೇರ್ಪಡೆಗೊಳ್ಳಲಿವೆ ಎಂದು ಐಎಎಫ್ ಮೂಲಗಳು ತಿಳಿಸಿವೆ.