2021ರ ಐಪಿಎಲ್‌ ಹರಾಜು ರದ್ದು?

ಹೊಸದಿಲ್ಲಿ: ಮುಂದಿನ ವರ್ಷದ ಐಪಿಎಲ್‌ಗೆಂದು ಯೋಜಿಸಲಾಗಿದ್ದ “ಮೆಗಾ ಹರಾಜು’ ಪ್ರಕ್ರಿಯೆಯನ್ನು ಬಿಸಿಸಿಐ ಬಹುತೇಕ ರದ್ದುಗೊಳಿಸಲಿದೆ ಎಂದು ತಿಳಿದು ಬಂದಿದೆ. ಎರಡು ಐಪಿಎಲ್‌ ಪಂದ್ಯಾವಳಿಗಳ ನಡುವೆ ಕೆಲವೇ ತಿಂಗಳ ಅಂತರ ಇರುವುದೇ ಇದಕ್ಕೆ ಮುಖ್ಯ ಕಾರಣ.

2020ರ ಐಪಿಎಲ್‌ ಸೆ. 19ರಿಂದ ಮೊದಲ್ಗೊಂಡು ನ. 10ರ ತನಕ ಯುಎಇಯಲ್ಲಿ ಸಾಗಲಿದೆ. ಎಲ್ಲವೂ ಯೋಜನೆಯಂತೆ ನಡೆದರೆ 2021ರ ಐಪಿಎಲ್‌ ಎಂದಿನಂತೆ ಮಾರ್ಚ್‌ ತಿಂಗಳಲ್ಲಿ ಆರಂಭವಾಗಬೇಕಿದೆ. ಆಗ ಎರಡು ಐಪಿಎಲ್‌ ಕೂಟಗಳ ನಡುವೆ ನಾಲ್ಕು ತಿಂಗಳ ಅಂತರವಷ್ಟೇ ಇರುವುದರಿಂದ “ಮೆಗಾ ಆಕ್ಷನ್‌’ಗೆ ಸಿದ್ಧತೆ ಸಾಲದು ಎಂಬುದಾಗಿ ಬಿಸಿಸಿಐ ತೀರ್ಮಾನಿಸಿದೆ ಎನ್ನಲಾಗಿದೆ. ಆಗ ಫ್ರಾಂಚೈಸಿಗಳು ಈಗಿನ ಆಟಗಾರರನ್ನೇ ಮುಂದುವರಿಸಿಕೊಂಡು ಹೋಗುವುದು ಅನಿವಾರ್ಯವಾಗುತ್ತದೆ.

ಅಲ್ಲದೇ ವರ್ಷದ ಆರಂಭದಲ್ಲಿ ಇಂಗ್ಲೆಂಡ್‌ ತಂಡ ಭಾರತಕ್ಕೆ ಆಗಮಿಸಿ ಎಲ್ಲ ಮೂರು ಮಾದರಿಗಳ ಸರಣಿಯನ್ನು ಆಡುವ ಕಾರ್ಯಕ್ರಮವಿದೆ. ಇದೊಂದು ಸುದೀರ್ಘ‌ ಸರಣಿ. ಇದರಿಂದ ಐಪಿಎಲ್‌ ಹರಾಜಿಗೆ ಸೂಕ್ತ ಯೋಜನೆಗಳನ್ನು ರೂಪಿಸಲು ಸಾಧ್ಯವಾಗದು ಎಂಬುದು ಇನ್ನೊಂದು ಕಾರಣ.