ನವದೆಹಲಿ: ದ್ವಿಚಕ್ರ ವಾಹನ ಕ್ಷೇತ್ರದಲ್ಲಿ ತನ್ನದೇ ಆದ ಗ್ರಾಹಕ ವರ್ಗವನ್ನು ಹೊಂದಿರುವ ಕವಾಸಕಿ ಕಂಪನಿ ಇದೀಗ ಹೊಸ 2020 ನಿಂಜಾ ಝಡ್‌.ಎಕ್ಸ್. 14ಆರ್‌ ಬೈಕನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಸಜ್ಜಾಗಿದ್ದು ಈಗಾಗಲೇ ಈ ಬೈಕಿನ ಬುಕ್ಕಿಂಗ್ ಪ್ರಾರಂಭವಾಗಿದೆ. ಆಕರ್ಷಕ ರೂಪದಲ್ಲಿ ಮತ್ತು ಸುಧಾರಿತ ತಂತ್ರಜ್ಞಾನದಲ್ಲಿ ಹೊರಬರುತ್ತಿರುವ ಈ ಸ್ಪೋರ್ಟ್ಸ್ ಬೈಕಿನ ಎಕ್ಸ್ ಶೋರೂಂ ಬೆಲೆ 19.70 ಲಕ್ಷ ರೂ ಆಗಿರಲಿದೆ.
ಈ ಬೈಕುಗಳ ಮುಂಗಡ ಬುಕ್ಕಿಂಗ್ ಈ ತಿಂಗಳ 19ನೇ ತಾರೀಖಿನವರೆಗೆ ಮಾತ್ರ ಇರಲಿದೆ. ಯಾಕೆಂದರೆ ಈ ಬುಕ್ಕಿಂಗ್ ಆಧಾರದ ಮೇಲೆ ಬೈಕ್ ಗಳ ಉತ್ಪಾದನೆ ನಡೆದು ಆ ಬೈಕುಗಳು ದೇಶದಲ್ಲಿ ಬಿ.ಎಸ್.6 ನಿಯಮಾವಳಿ ಜಾರಿಗೊಳ್ಳುವ ಮೊದಲು ಅಂದರೆ 2020ರ ಎಪ್ರಿಲ್ 1ನೇ ತಾರೀಖಿನೊಳಗೆ ರಸ್ತೆಗಿಳಿಯಲೇಬೇಕಾಗಿರುವುದರಿಂದ ಬುಕ್ಕಿಂಗ್ ಅನ್ನು ತ್ವರಿತಗತಿಯಲ್ಲಿ ನಡೆಸಲಾಗುತ್ತಿದೆ ಎಂದು ಡೀಲರ್ಸ್ ಗಳು ಮಾಹಿತಿ ನೀಡಿದ್ದಾರೆ.
2020 ಕವಾಸಕಿ ಝಡ್‌ಎಕ್ಸ್ 14 ಆರ್‌. ಬೈಕ್ ಗಳು ಮೆಟಾಲಿಕ್‌ ಡಯಾಬ್ಲೊ ಬ್ಲಾಕ್‌ ಹಾಗೂ ಗೋಲ್ಡನ್‌ ಬ್ಲೇಜ್ಡ್ ಗ್ರೀನ್‌ ಎಂಬ ಎರಡು ಆಕರ್ಷಕ ಬಣ್ಣಗಳಲ್ಲಿ ಗ್ರಾಹಕರಿಗೆ ಲಭಿಸಲಿದೆ. ಮಾರುಕಟ್ಟೆಗೆ ಹೊಸದಾಗಿ ಬರಲಿರುವ ಈ ಸ್ಪೋರ್ಟ್ಸ್ ಬೈಕ್ ಸದ್ಯ ಮಾರುಕಟ್ಟೆಯಲ್ಲಿರುವ ಎಲ್ಲಾ ಬೈಕ್ ಗಳ ಬಣ್ಣಕ್ಕಿಂತ ವಿಭಿನ್ನವಾಗಿ ಕಾಣಿಸಿಕೊಳ್ಳಲಿದೆ ಎಂಬ ಭರವಸೆಯನ್ನು ಕಂಪನಿ ನೀಡಿದೆ.
ಬಿಎಸ್‌ 4 ಎಂಜಿನ್‌
ಇದರಲ್ಲಿ ಬಿಎಸ್‌ 4 ಎಂಜಿನ್‌ ಅನ್ನು ಅಳವಡಿಸಿದ್ದು, ಹೊಸ ಬಣ್ಣದ ಹೊರತಾಗಿ ಈ ಬೈಕಿನಲ್ಲಿ ಹೆಚ್ಚಿನ ಬದಲಾವಣೆಗಳಾಗಿಲ್ಲ. ಇದೀಗ ಮಾರುಕಟ್ಟೆಗೆ ಬರಲಿರುವ ಈ ಬೈಕ್ ಸದ್ಯ ಮಾರುಕಟ್ಟೆಯಲ್ಲಿರುವ ಝಡ್‌.ಎಕ್ಸ್. 14 ಆರ್‌. ಮಾದರಿಯ ಕೊನೆಯ ಆವೃತ್ತಿಯಾಗಿರಲಿದ್ದು ಆ ಬಳಿಕ ಕವಾಸಕಿ ಕಂಪನಿಯು ಶೀಘ್ರದಲ್ಲೇ ಈ ನವೀನ ಮಾದರಿಯ ಬೈಕ್ ಗಳನ್ನು ಹೊರತರುವ ನಿರೀಕ್ಷೆ ಇದೆ.
ಕವಾಸಕಿ ಝಡ್‌ಎಕ್ಸ್ 14 ಆರ್‌. ಬೈಕಿನಲ್ಲಿ 1,441 ಸಿಸಿಯ ಲಿಕ್ವಿಡ್‌ ಕೂಲ್ಡ್ ಇನ್‌ ಲೈನ್‌ ನೊಂದಿಗೆ 4 ಸಿಲಿಂಡರ್‌ ಎಂಜಿನ್‌ ಅಳವಡಿಸಲಾಗಿದ್ದು, ದೊಡ್ಡ ಗಾತ್ರದ ಎಂಜಿನ್‌ ಎರಡು ಪವರ್‌ ಔಟ್‌ ಪುಟ್‌ ಗಳನ್ನು ಉತ್ಪಾದಿಸುತ್ತದೆ. ಎಂಜಿನ್‌ ಅಲ್ಲಿ ಒಟ್ಟು ಆರು ಸ್ಪೀಡಿನ ಗೇರ್‌ ಬಾಕ್ಸ್‌ ಇದ್ದು, ಕವಾಸಕಿ ಟ್ರಾಕ್ಷನ್‌ ಕಂಟ್ರೋಲ್‌ ಸಿಸ್ಟಂ ಜೊತೆಗೆ ಹೆಚ್ಚುವರಿ ಸುರಕ್ಷತೆಗಾಗಿ ಡ್ಯುಯಲ್‌ ಚಾನೆಲ್‌ ಎಬಿಎಸ್‌ ಅನ್ನು ಅಳವಡಿಸಲಾಗಿದೆ.
