ಫಿಫಾ ಅಂಡರ್‌-17 ವಿಶ್ವಕಪ್‌ ಫ‌ುಟ್ಬಾಲ್‌  200 ದಿನಗಳ ಕ್ಷಣಗಣನೆ ಆರಂಭ

ಹೊಸದಿಲ್ಲಿ: ಫಿಫಾ ಅಂಡರ್‌-17 ವಿಶ್ವಕಪ್‌ ಫ‌ುಟ್ಬಾಲ್‌ ಕೂಟ ಆರಂಭವಾಗಲು ಇನ್ನು 200 ದಿನಗಳು ಬಾಕಿ ಉಳಿದಿದ್ದು ಅಂತಿಮ ಹಂತದ ಸಿದ್ಧತೆಗಳು ಭರದಿಂದ ಸಾಗುತ್ತಿವೆ. ಭಾರತದಲ್ಲಿ ನಡೆಯಲಿರುವ ಈ ಕೂಟ ಮಹೋನ್ನತ ಉತ್ಸವವಾಗಿ ಸಾಗುವ ಆತ್ಮವಿಶ್ವಾಸ ನನಗಿದೆ ಎಂದು ಫ‌ುಟ್ಬಾಲ್‌ನ ವಿಶ್ವ ಮಂಡಳಿ ಹೇಳಿದೆ.

ಭಾರತವು ಬೃಹತ್‌ ಮಟ್ಟದ ಫಿಫಾ ಕೂಟದ ಆತಿಥ್ಯ ವಹಿಸುತ್ತಿದೆ. ಈ ಬೃಹತ್‌ ಕೂಟ ಅದ್ಭುತವಾಗಿ ಸಾಗಲು ಸಕಲ ಸಿದ್ಧತೆಯಲ್ಲಿ ಭಾರತ ತೊಡಗಿದೆ. ದೇಶದ ಆರು ಪ್ರಮುಖ ನಗರಗಳಲ್ಲಿ (ಕೋಲ್ಕತಾ, ಕೊಚ್ಚಿ, ಹೊಸದಿಲ್ಲಿ, ಮುಂಬಯಿ, ಗುವಾಹಾಟಿ ಮತ್ತು ಗೋವಾ) ನಡೆಯಲಿರುವ ಈ ಕೂಟ ಅಕ್ಟೋಬರ್‌ 6ರಿಂದ 28ರ ವರೆಗೆ ಸಾಗಲಿದೆ. ಆರು ನಗರಗಳ ಕ್ರೀಡಾಂಗಣವನ್ನು ಈ ಕೂಟಕ್ಕಾಗಿ ಸಿದ್ಧಗೊಳಿಸಲಾಗಿದ್ದು ಬಹುತೇಕ ಎಲ್ಲ ಕೆಲಸಗಳು ಮುಗಿದಿವೆ. 

2013ರ ಡಿಸೆಂಬರ್‌ನಲ್ಲಿ ಅಜರ್‌ಬೈಜಾನ್‌, ಅಯರ್‌ಲ್ಯಾಂಡ್‌ ಮತ್ತು ಉಜ್ಬೆಕಿಸ್ಥಾನದ ಪ್ರಬಲ ಸ್ಪರ್ಧೆ ನೀಡಿದ್ದರೂ ಭಾರತ ಅಂಡರ್‌-17 ವಿಶ್ವಕಪ್‌ನ ಆತಿಥ್ಯ ವಹಿಸುವ ಹಕ್ಕನ್ನು ಪಡೆಯಲು ಯಶಸ್ವಿಯಾಗಿತ್ತು.