2 ವರ್ಷದ ಬಾಲೆಯ ತಲೆ ಮೇಲೆ ಬಿದ್ದ ಟಿವಿ ಸೆಟ್: ಮಗು ದಾರುಣ ಸಾವು

ಚೆನ್ನೈ: ಎರಡು ವರ್ಷದ ಹೆಣ್ಣು ಮಗುವಿನ ತಲೆಯ ಮೇಲೆ ಟಿವಿ ಸೆಟ್ ಬಿದ್ದು ದಾರುಣವಾಗಿ ಮೃತಪಟ್ಟ ಘಟನೆ ಚೆನ್ನೈ ನಲ್ಲಿ ನಡೆದಿದೆ.

ಶನಿವಾರ ಸಂಜೆ 5 ಗಂಟೆ ವೇಳೆಗೆ ಚೆನ್ನೈ ಆಯನವರಂ ಪ್ರದೇಶದಲ್ಲಿ ಈ ದುರ್ಘಟನೆ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮಗುವು ಟಿವಿ ಸೆಟ್ ಇರಿಸಲಾಗಿದ್ದ ಸ್ಥಳದ ಬಳಿಯಿದ್ದ ಟೇಬಲ್ ಮೇಲೆ ನಿದ್ರಿಸುತ್ತಿತ್ತು. ಈ ವೇಳೆ ಬೆಕ್ಕೊಂದು ಟಿವಿ ಸೆಟ್ ಬಳಿ ಸುಳಿದಾಡಿದ್ದರಿಂದ ಅದು ಜಾರಿ ಕೆಳಗೆ ಬಿದ್ದಿದೆ. ಮಾತ್ರವಲ್ಲದೆ ಮಗುವಿನ ತಲೆಗೆ ನೇರವಾಗಿ ಅಪ್ಪಳಿದೆ.

ಕೂಡಲೇ ಪೋಷಕರು ಮಗುವನ್ನು ಸರ್ಕಾರಿ ಆಸ್ಪತ್ರೆಗೆ ಕೊಂಡೊಯ್ದಿದ್ದಾರೆ. ಆದರೇ ಅಷ್ಟರಲ್ಲಾಗಲೇ ಮಗು ಮೃತಪಟ್ಟಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.