ISRO: ವಿಕ್ರಮ್‌ ಇಳಿದಾಗ ಚಂದ್ರನ 2 ಟನ್‌ ಮಣ್ಣು ಸ್ಫೋಟ

ನವದೆಹಲಿ: ಚಂದ್ರನ ಮೇಲೆ ಚಂದ್ರಯಾನ-3 ನೌಕೆಯ ವಿಕ್ರಮ್‌ ಲ್ಯಾಂಡರ್‌ ಯಶಸ್ವಿಯಾಗಿ ಇಳಿದಾಗ ಭಾರತೀಯರ ಹರ್ಷ ಮೇರೆ ಮೀರಿತ್ತು. ಆದರೆ ಆ ಹೊತ್ತಿನಲ್ಲಿ ಚಂದ್ರನ ಮೇಲೆ ಏನಾಗಿರಬಹುದು ಎಂಬ ಪ್ರಶ್ನೆಗಳಿಗೆ ಈಗ ಉತ್ತರ ಸಿಕ್ಕಿದೆ.

ಪ್ರಜ್ಞಾನ್‌ ರೋವರ್‌ ಅನ್ನು ತನ್ನ ಒಡಲಲ್ಲಿ ಇಟ್ಟುಕೊಂಡಿದ್ದ ವಿಕ್ರಮ್‌ ಚಂದ್ರನಲ್ಲಿಳಿದಾಗ; ಚಂದ್ರನಲ್ಲಿದ್ದ 2 ಟನ್‌ಗಳಷ್ಟು ಮಣ್ಣು ಮೇಲಕ್ಕೆ ಸಿಡಿದಿದೆ. ಲ್ಯಾಂಡರ್‌ನ ವೇಗವನ್ನು ತೀರಾ ಕಡಿಮೆ ಮಾಡಿ ನೆಲಕ್ಕಿಳಿಸಿದ್ದಾಗಲೂ, ಅದರ ಕಾಲುಗಳು ಚಂದ್ರನ ಮೇಲ್ಮೈಗೆ ಬಡಿದ ಹೊಡೆತಕ್ಕೆ ಹೀಗಾಗಿದೆ. ಪರಿಣಾಮ ಲ್ಯಾಂಡರ್‌ನ ಸುತ್ತ ಒಂದು ಬಿಳೀ ಆವರಣ ಕಂಡುಬಂದಿದೆ. ಆ ಚಿತ್ರಗಳೀಗ ಇಸ್ರೋಗೆ ಸಿಕ್ಕಿವೆ.

ಚಂದ್ರಯಾನ-2ರ ವೇಳೆ ಆರ್ಬಿಟರ್‌ ಕ್ಯಾಮೆರಾ ಇದನ್ನು ಸೆರೆ ಹಿಡಿದಿದೆ. ಒಂದು ಹಂತದ ಚಿತ್ರಗಳು ವಿಕ್ರಮ್‌ ಇಳಿಯುವ ಕೆಲವು ಗಂಟೆಗಳ ಮುನ್ನ, ಇನ್ನೊಂದು ಹಂತದ ಚಿತ್ರಗಳು ಇಳಿಯುವ ಹೊತ್ತಿನದ್ದಾಗಿವೆ. ವಿಕ್ರಮ್‌ ಇಳಿದಾಗ ಚಂದ್ರನ ಮೇಲಿರುವ ಮಣ್ಣು ಮತ್ತು ರೆಗೋಲಿಥ್‌ ಎಂದು ಕರೆಯಲ್ಪಡುವ ಬಂಡೆ ಸಿಡಿದಿದೆ. 108.4 ಚದರ ಮೀಟರ್‌ ಪ್ರದೇಶ ವ್ಯಾಪ್ತಿಯಲ್ಲಿ 2.06 ಟನ್‌ಗಳಷ್ಟು ರೆಗೋಲಿಥ್‌ ಚದುರಿಹೋಗಿದೆ.