ಏಜು ನಾನ್ಸೆನ್ಸ್ ಆದರೂ ಹೆಣ್ಮಕ್ಕಳ ಮೇಲೆ ತುಂಬು ಗೌರವ!

ಲೋಕೇಶ್ ನಿರ್ಮಾಣದಲ್ಲಿ ಮೂಡಿ ಬಂದಿರುವ 19 ಏಜ್ ಈಸ್ ನಾನ್ಸೆನ್ಸ್ ಚಿತ್ರ ಇದೇ ಡಿಸೆಂಬರ್ 6ರಂದು ತೆರೆಗಾಣಲಿದೆ. ಇದೀಗ ವಿಶಿಷ್ಟವಾದ ಶೀರ್ಷಿಕೆಗಳ ಜಮಾನವೊಂದು ಕನ್ನಡ ಚಿತ್ರರಂಗದಲ್ಲಿ ಚಾಲ್ತಿಯಲ್ಲಿದೆಯಲ್ಲಾ? ಆ ಸಾಲಿಗೆ ಸೇರ್ಪಡೆಯಾಗುವ ಗುಣ ಲಕ್ಷಣಗಳೊಂದಿಗೆ ಈ ಸಿನಿಮಾ ಒಂದಷ್ಟು ಸದ್ದು ಮಾಡಿತ್ತು. ಪ್ರೇಕ್ಷಕರು ಶೀರ್ಷಿಕೆಗೆ ತಕ್ಕುದಾದ ರೀತಿಯಲ್ಲಿಯೇ ಕಥೆಯ ಬಗ್ಗೆಯೂ ಅಂದಾಜಿಸಿದ್ದರು. ಆದರೆ ಟ್ರೇಲರ್ ಬಿಡುಗಡೆಯಾದ ನಂತರ ಈ ಸಿನಿಮಾ ಪ್ರೇಕ್ಷಕರ ವಲಯದಲ್ಲಿ ಗಂಭೀರ ಚರ್ಚೆಗೊಳಗಾಗಲಾರಂಭಿಸಿದೆ.

ವಿಶೇಷವೆಂದರೆ ಈ ಚಿತ್ರದಲ್ಲಿ ಟ್ರೇಲರ್‌ನಲ್ಲಿ ಕಾಣಿಸಿದ್ದಕ್ಕೂ ಮಿಗಿಲಾದ ಹತ್ತಾರು ವಿಚಾರಗಳಿವೆ. ಇದೀಗ ಸಮಾಜದಲ್ಲಿ ಹೆಣ್ಣುಮಕ್ಕಳನ್ನು ಪೂಜ್ಯನೀಯವಾಗಿ ಕಾಣುತ್ತಾ ಬಂದಿದ್ದ ಮನಸ್ಥಿತಿ ಮಾಯವಾಗುತ್ತಿದೆ. ಈ ಕಾರಣದಿಂದಲೇ ಅತ್ಯಾಚಾರದಂಥಾ ಪ್ರಕರಣಗಳು ವ್ಯಾಪಕವಾಗಿ ನಡೆಯುತ್ತಿವೆ ಎಂಬಂಥಾ ಮಾತುಗಳೂ ಕೇಳಿ ಬರುತ್ತಿವೆ. ಆದರೆ ಇಲ್ಲಿ ಹತ್ತೊಂಭತ್ತರ ಹರೆಯದ ಹುಡುಗರು ಹೆಣ್ಣನ್ನು ಅದೆಷ್ಟು ಪೂಜ್ಯನೀಯವಾಗಿ ನೋಡುತ್ತಾರೆಂಬುದರ ಚಿತ್ರಣವಿದೆ. ಹೆಣ್ಣಿನ ಬಗೆಗಿನ ಗೌರವದ ತಿರುಳು ಇಲ್ಲಿನ ಕಥೆಯಲ್ಲಿಯೇ ಅಡಕವಾಗಿದೆಯಂತೆ.

ಕಾಲ ಅದೆಷ್ಟೇ ಮುಂದುವರೆದಿದೆಯೆಂದರೂ ಇಲ್ಲಿ ಈಗಲೂ ವಿಧವಾ ವಿವಾಹ ಮುಂತಾದವುಗಳಲ್ಲಿ ಮಡಿವಂತಿಕೆ ಪ್ರದರ್ಶಿಸಲಾಗುತ್ತಿದೆ. ಇದರಲ್ಲಿ ತಲ್ಲಣಿಸೋದು ಹೆಣ್ಣು ಜೀವಗಳೇ. ಇಲ್ಲಿ ವಿಧವಾ ವಿವಾಹಕ್ಕೆ ಉತ್ತೇಜನ ಕೊಡುವಂಥಾ ಕಥೆಯಿದೆ. ಬಹುಶಃ ಹತ್ತೊಂಭತ್ತರ ಹರೆಯದ ಹುಡುಗ ವಿಧವೆಯೊಂದಿಗೆ ಲವ್ವಲ್ಲಿ ಬೀಳೋ ಸನ್ನಿವೇಶಗಳಿದ್ದರೂ ಅಚ್ಚರಿ ಪಡುವಂತಿಲ್ಲ. ಅಂತೂ ಈ ಚಿತ್ರದಲ್ಲಿ ಅದ್ಭುತವಾದ ಪ್ರೇಮ ಕಥಾನಕ, ಫ್ಯಾಮಿಲಿ, ಸೆಂಟಿಮೆಂಟ್, ಮಾಸ್ ಸೇರಿದಂತೆ ಎಲ್ಲ ಅಂಶಗಳನ್ನು ಹೊಂದಿರೋ ಕಥೆ ಇರೋದಂತೂ ಸತ್ಯ. ಅದೆಲ್ಲವೂ ಡಿಸೆಂಬರ್ ಆರರಂದು ಅನಾವರಣಗೊಳ್ಳಲಿದೆ.