165 ಮಂದಿಗೆ ಸ್ಥಳದಲ್ಲೇ ಉದ್ಯೋಗ

ನೆಹರೂನಗರ: ಗ್ರಾಮೀಣ ಭಾಗದ ಪ್ರತಿಭೆಗಳಿಗೆ ಉದ್ಯೋಗಾವಕಾಶ ಒದಗಿಸಿಕೊಡುವ ದೃಷ್ಟಿಯಿಂದ ವಿವೇಕಾನಂದ ವಿದ್ಯಾವರ್ಧಕ ಸಂಘವು ಹಮ್ಮಿಕೊಂಡ ವಿವೇಕ ಉದ್ಯೋಗ ಮೇಳದಲ್ಲಿ 165 ಮಂದಿ ವಿದ್ಯಾರ್ಥಿಗಳಿಗೆ ಸ್ಥಳದಲ್ಲೇ ಉದ್ಯೋಗ ಲಭಿಸಿದೆ.

ಉದ್ಯೋಗ ಮೇಳದಲ್ಲಿ ಮಂಗಳೂರಿನ ದಿಯಾ ಸಿಸ್ಟಮ್ಸ್‌, ತಮಿಳುನಾಡಿನ ಟಿವಿಎಸ್‌ ಲಾಜಿಸ್ಟಿಕ್ಸ್‌, ಪುತ್ತೂರಿನ ಮಾಸ್ಟರ್‌ ಪ್ಲಾನರಿ, ಬೆಂಗಳೂರಿನ ಟೇಫ್‌ ಕಂಪೆನಿ, ಎಚ್‌ ಡಿಎಫ್‌ಸಿ ಬ್ಯಾಂಕ್‌, ಹರ್ಷ, ಆಕ್ಸಿಸ್‌ ಬ್ಯಾಂಕ್‌, ಎಸ್‌ಬಿಐ ಲೈಫ್‌, ಆದಿತ್ಯ ಬಿರ್ಲಾ, ನಂದಿ ಟೊಯೋಟೊ, ರಿಲಯನ್ಸ್‌ ಡಿಜಿಟಲ್‌ ಸಹಿತ ಸುಮಾರು 32 ಕಂಪೆನಿಗಳು ಭಾಗವಹಿಸಿದ್ದವು. ಉದ್ಯೋಗಾಕಾಂಕ್ಷಿಗಳು ಸುಮಾರು ಒಂದು ಸಾವಿರದಷ್ಟು ಮಂದಿ ನೊಂದಾವಣೆ ಮಾಡಿಕೊಂಡಿದ್ದರು. ವಿವಿಧ ಹಂತಗಳಲ್ಲಿ ನಡೆದ ಪರೀಕ್ಷೆ, ಸಂದರ್ಶನಗಳಲ್ಲಿ ಒಟ್ಟು 165 ಮಂದಿಗೆ ಸ್ಥಳದಲ್ಲೇ ಉದ್ಯೋಗ ದೃಢಪಡಿಸಿಕೊಳ್ಳಲಾಯಿತು. 223 ಮಂದಿ ಶಾರ್ಟ್‌ಲಿಸ್ಟ್‌ನಲ್ಲಿ ಕಾಣಿಸಿಕೊಂಡು ಅಂತಿಮ ಹಂತಕ್ಕೆ ಆಯ್ಕೆಯಾಗಿರುವುದು ಉದ್ಯೋಗ ಮೇಳದ ಯಶಸ್ಸಾಗಿ ಪರಿಣಮಿಸಿತು.