ಗೋರಖ್‌ಪುರ ಆಸ್ಪತ್ರೆಯಲ್ಲಿ ಆ.31ರಂದು 16 ಶಿಶುಗಳ ಸಾವು

ಗೋರಖ್‌ಪುರ : ಶಿಶುಗಳ ನಿರಂತರ ಸಾವಿಗೆ ರಾಷ್ಟ್ರಮಟ್ಟದಲ್ಲಿ ಕುಖ್ಯಾತಿ ಪಡೆದಿರುವ ಇಲ್ಲಿನ ಬಾಬಾ ರಾಘವ ದಾಸ್‌ ಮೆಡಿಕಲ್‌ ಕಾಲೇಜು ಆಸ್ಪತ್ರೆಯಲ್ಲಿ  ನಿನ್ನೆ ಗುರುವಾರ ಆಗಸ್ಟ್‌ 31ರಂದು 16 ಶಿಶುಗಳ ಸಾವು ಸಂಭವಿಸಿರುವುದಾಗಿ ವರದಿಯಗಿದೆ. 

ಮೃತಪಟ್ಟಿರುವ ಈ ಹದಿನಾರು ಶಿಶುಗಳ ಪೈಕಿ ಒಂದು ಶಿಶು ಮೆದುಳು ಜ್ವರಕ್ಕೆ ಗುರಿಯಾಗಿ ಸತ್ತಿದೆ. ರಾಜ್ಯ ಸರಕಾರ ನಡೆಸುತ್ತಿರುವ ಈ ಆಸ್ಪತ್ರೆಯಲ್ಲಿ 2017ರ ಆಗಸ್ಟ್‌ ತಿಂಗಳೊಂದರಲ್ಲೇ 415 ಶಿಶುಗಳ ಮರಣ ಸಂಭವಿಸಿದೆ. 

2017ರ ಜನವರಿಯಿಂದ ಆ.31ರತನಕ ಅವಧಿಯಲ್ಲಿ ಈ ಆಸ್ಪತ್ರೆಯಲ್ಲಿ 1,256 ಶಿಶುಗಳ ಸಾವು ಸಂಭವಿಸಿವೆ ಎಂದು ಬಿಆರ್‌ಡಿ ಮೆಡಿಕಲ್‌ ಕಾಲೇಜ್‌ ಪ್ರಾಂಶುಪಾಲ ಪಿ ಕೆ ಸಿಂಗ್‌ ದೃಢೀಕರಿಸಿದ್ದಾರೆ. 

ಸಿಂಗ್‌ ಕೊಟ್ಟಿರುವ ಮಾಹಿತಿಯ ಪ್ರಕಾರ ಈ ವರ್ಷ ಜನವರಿಯಲ್ಲಿ 152, ಫೆಬ್ರವಲಿ 122, ಮಾರ್ಚ್‌ 159, ಎಪ್ರಿಲ್‌ 123, ಮೇ 139, ಜೂನ್‌ 137 ಮತ್ತು ಜುಲೈಯಲ್ಲಿ 128 ಶಿಶುಗಳ ಸಾವು ಸಂಭವಿಸಿವೆ.