14 ವರ್ಷಕ್ಕೇ ಅಪ್ಪನಾದ ಬಾಲಕ, ತಾಯಿ ಮೇಲೆ ಕೇಸ್‌

ತಿರುವನಂತಪುರ: ಆತನಿನ್ನೂ 8ನೇ ತರಗತಿ ಹುಡುಗ. ಪ್ರಾಯ ಕೇವಲ 14. ಆದರೆ ಅಷ್ಟರಲ್ಲಾಗಲೇ 2 ತಿಂಗಳ ಹಸುಗೂಸಿನ ಅಪ್ಪ! ಇನ್ನು ಆ ಮಗುವನ್ನು ಹೆತ್ತ ಯುವತಿಗೆ 18 ವರ್ಷ. 

ಇಂಥದ್ದೊಂದು ಹುಬ್ಬೇರಿಸುವ ಘಟನೆ ಕೇರಳದ ಕೊಚ್ಚಿಯಲ್ಲಿ ನಡೆದಿದೆ. ಈ ಘಟನೆಯ ಹಿಂದಿನ ಕಥೆ ಹೀಗಿದೆ. ಹಿಂದೆ ಬಾಲಕಿ, ತನ್ನನ್ನು ಸೋದರ ಸಂಬಂಧಿ ಬಾಲಕ ಅತ್ಯಾಚಾರವೆಸಗಿದ್ದಾಗಿ ದೂರು ದಾಖಲಿಸಿದ್ದಳು. ಬಳಿಕ ಆಕೆ ಗರ್ಭಿಣಿಯಾಗಿದ್ದು, ಇತ್ತೀಚೆಗೆ ಆಕೆಗೆ ಪ್ರಸವವಾಗಿತ್ತು. ಪ್ರಕರಣ ಕುರಿತಂತೆ, ಮಗುವಿನ ತಂದೆ ಯಾರು ಎಂಬ ಬಗ್ಗೆ ವೈದ್ಯಕೀಯ ಪರೀಕ್ಷೆ ನಡೆಸಲಾಗಿದ್ದು, ಈ ಸಂದರ್ಭ ಬಾಲಕನೇ ಹಸುಗೂಸಿನ ತಂದೆ ಎಂಬುದು ತಿಳಿದು ಬಂದಿದೆ.

ಆದರೆ ವಿಚಾರಣೆ ವೇಳೆ ಬಾಲಕ, ತನಗೂ ಆಕೆಗೂ ಮೊದಲೇ ಸಂಬಂಧವಿತ್ತು ಎಂದು ಆರೋಪಿಸಿದ್ದಾನೆ. ಈ ಹಿನ್ನೆಲೆಯಲ್ಲಿ ಅಪ್ರಾಪ್ತನನ್ನು ಲೈಂಗಿಕವಾಗಿ ಬಳಸಿಕೊಂಡಿದ್ದಕ್ಕಾಗಿ 18ರ ಯುವತಿ ವಿರುದ್ಧ ಪೋಸ್ಕೋ (ಲೈಂಗಿಕ ಅಪರಾಧಗಳ ವಿರುದ್ಧ ಮಕ್ಕಳ ರಕ್ಷಣಾ ಕಾಯ್ದೆ) ಅಡಿ ಪ್ರಕರಣ ದಾಖಲಿಸಲಾಗಿದೆ. ಪ್ರಕರಣ ಕುರಿತಂತೆ ಹೇಳಿಕೆಗಳನ್ನು ಕೋರ್ಟ್‌ಗೆ ದಾಖಲು ಮಾಡಲಾಗಿದೆ.