14.99 ಲ.ರೂ. ಮೌಲ್ಯದ ವಾಹನ ಗೆದ್ದಿರುವುದಾಗಿ ನಂಬಿಸಿ ವಂಚನೆ

ಮಂಗಳೂರು: ಸ್ಕ್ಯಾಚ್‌ ಕೂಪನ್‌ ಮೂಲಕ 14.99 ಲ.ರೂ. ಬಹುಮಾನ ಬಂದಿರುವುದಾಗಿ ನಂಬಿಸಿ 90,400 ರೂ.ಗಳನ್ನು ಖಾತೆಗೆ ವರ್ಗಾಯಿಸಿಕೊಂಡು ವಂಚಿಸಿರುವ ಘಟನೆ ನಡೆದಿದೆ.

ದೀಪಕ್‌ ಪಾಂಡೆ ಎಂಬ ವ್ಯಕ್ತಿ ದೂರುದಾರರಿಗೆ ಕರೆ ಮಾಡಿ ತನ್ನ ಸಂಸ್ಥೆ ಸರಕಾರದಿಂದ ಮಾನ್ಯತೆ ಪಡೆದಿದ್ದು ಮೆಗಾ ಡ್ರಾ ಕೂಪನ್‌ ಕಳುಹಿಸುತ್ತಿರುವುದಾಗಿ ತಿಳಿಸಿದ್ದ. ಜೂ.10ರಂದು ದೂರುದಾರರಿಗೆ ಕೊರಿಯರ್‌ ಮೂಲಕ ಸ್ಕ್ಯಾಚ್‌ ಕೂಪನ್‌ ಬಂದಿತ್ತು. ಅದರಲ್ಲಿ ಹೆಲ್ಪ್ ಲೈನ್‌ ಸಂಖ್ಯೆ ಕೂಡ ಇತ್ತು. ಕೂಪನ್‌ ಸ್ಕ್ಯಾಚ್‌ ಮಾಡಿದಾಗ ಅದರಲ್ಲಿ 14,99,000 ರೂ. ಮೌಲ್ಯದ ವಾಹನ ಹೆದ್ದಿರುವುದಾಗಿ ನಮೂದಿಸಲಾಗಿತ್ತು.

ಹೆಲ್ಪ್ ಲೈನ್‌ ಗೆ ಕರೆ ಮಾಡಿ ವಿಚಾರಿಸಿದಾಗ ಅದನ್ನು ಸ್ವೀಕರಿಸಿದ ವ್ಯಕ್ತಿ ಮೊದಲನೇ ಬಹುಮಾನ ಬಂದಿದೆ ಎಂದು ನಂಬಿಸಿದ. ಬಳಿಕ ಆರಂಭಿಕ ಶುಲ್ಕ ಪಾವತಿಸಬೇಕು ಎಂದು ತಿಳಿಸಿದ. ಅನಂತರ ದೂರುದಾರರ ಖಾತೆಯಿಂದ ಹಂತ ಹಂತವಾಗಿ ಆತನ ಖಾತೆಗೆ ಒಟ್ಟು 90,400 ರೂ.ಗಳನ್ನು ವರ್ಗಾಯಿಸಿಕೊಂಡಿದ್ದಾನೆ. ಆದರೆ ಯಾವುದೇ ಬಹುಮಾನ ನೀಡದೆ ವಂಚಿಸಿದ್ದಾನೆ ಎಂದು ಮಂಗಳೂರಿನ ಸೆನ್‌ ಪೊಲೀಸರಿಗೆ ದೂರು ನೀಡಲಾಗಿದೆ.