ಮೊದಲ ಟೆಸ್ಟ್‌  ಸಿಕ್ಸರ್‌ಗೆ ತುಂಬಿತು 123 ವರ್ಷ  

ಅಡಿಲೇಡ್‌: ಎಲ್ಲರೂ ಭಾರತ-ಆಸ್ಟ್ರೇಲಿಯ ನಡುವಿನ ಬ್ರಿಸ್ಬೇನ್‌ ಟೆಸ್ಟ್‌ ಪಂದ್ಯದ ಗುಂಗಿನಲ್ಲಿ ಮುಳುಗಿರುವಾಗ ಇದೇ ಕಾಂಗರೂ ನಾಡಿನಲ್ಲಿ ಸರಿಯಾಗಿ 123 ವರ್ಷಗಳ ಹಿಂದೆ ವಿಸ್ಮಯವೊಂದು ಗೋಚರಿಸಿದ್ದನ್ನು ನೆನಪಿಸಿಕೊಳ್ಳುವುದು ಸೂಕ್ತವೆನಿಸುತ್ತದೆ. 1898ರ ಜ. 14ರಂದು ಟೆಸ್ಟ್‌ ಇತಿಹಾಸದ ಪ್ರಪ್ರಥಮ ಸಿಕ್ಸರ್‌ ಅಡಿಲೇಡ್‌ ಅಂಗಳದಲ್ಲಿ ಸಿಡಿದಿತ್ತು. ಇದನ್ನು ಬಾರಿಸಿದವರು ಆಸೀಸ್‌ ಬ್ಯಾಟ್ಸ್ ಮನ್‌ ಜೋ ಡಾರ್ಲಿಂಗ್‌.

ಅದು ಪ್ರವಾಸಿ ಇಂಗ್ಲೆಂಡ್‌ ಎದುರಿನ ಸರಣಿಯ 5ನೇ ಹಾಗೂ ಅಂತಿಮ ಪಂದ್ಯ. ಇದರಲ್ಲಿ ಡಾರ್ಲಿಂಗ್‌ ಈ ಸಾಧನೆಗೈದರು. ಅರ್ಥಾತ್‌, ಟೆಸ್ಟ್‌ ಕ್ರಿಕೆಟ್‌ ಆರಂಭಗೊಂಡು 21 ವರ್ಷಗಳ ಬಳಿಕ ಮೊದಲ ಸಿಕ್ಸರ್‌ ಸಿಡಿಯಲ್ಪಟ್ಟಿತ್ತು!

ಸ್ವಾರಸ್ಯವೆಂದರೆ, ಅಂದು ಸಿಕ್ಸರ್‌ಗೆ ಲಭಿಸುತ್ತಿದ್ದುದು ಐದೇ ರನ್‌. ಮುಂದೆ ನಿಯಮ ಬದಲಾಯಿತು, 6 ರನ್‌ ನಿಗದಿಯಾಯಿತು. ಜೋ ಡಾರ್ಲಿಂಗ್‌ ಆಸ್ಟ್ರೇಲಿಯದ ಯಶಸ್ವಿ ನಾಯಕ ಹಾಗೂ ಪ್ರತಿಭಾನ್ವಿತ ಎಡಗೈ ಆಟಗಾರನಾಗಿದ್ದರು. ಇದೇ ಸರಣಿಯ ಸಿಡ್ನಿ ಟೆಸ್ಟ್‌ ಪಂದ್ಯದಲ್ಲಿ ಅವರಿಂದ ಮತ್ತೂಂದು ದಾಖಲೆ ನಿರ್ಮಾಣಗೊಂಡಿತ್ತು. ಟೆಸ್ಟ್‌ ಇತಿಹಾಸದಲ್ಲಿ ಶತಕ ಬಾರಿಸಿದ ಮೊದಲ ಎಡಗೈ ಬ್ಯಾಟ್ಸ್‌ಮನ್‌ ಎಂಬ ಹಿರಿಮೆಗೆ ಡಾರ್ಲಿಂಗ್‌ ಪಾತ್ರರಾಗಿದ್ದರು.